أنا بالشام… شو إعمل؟

باولو الشامي
—————————–

اليوم الشام عمتمرق بوضع مانها مارقة فيه من قبل، بما أنو عدد سكان ريف دمشق أكتر من سكان دمشق فكتيرين بيناتنا علقانين برات الشام حالياً، وغير اللي معهن سيارات النزلة على قلب الشام كتير صعبة، لهيك إذا كنت بقلب الشام فإنتِ إلى حدٍ ما عملة نادرة، لهيك في كتير شغلات لازم تعملها، أول شي بدك تفكر فيه هو أنو اللي عميصير بالشام صراع مسلح، لهيك شو ما كان موقفك مو وقت تهليلك لانتصارات الطرف اللي بتأيدو، والحراك السلمي مو كتير حيجيب نتيجة بهيك وقت، هي قائمة بالشغلات اللي فيك تعملها:

1. كتير من مدارس الشام وأبنية تانية انفتحت لتستقبل لاجئين من مناطق دمشق وريف دمشق المختلفة، لا تقلي ما بتعرف وين لأنو عالفيسبوك وتويتر صار منشورين فوق العشر آلاف مرة، فيك تروح تساعدهن كبني آدم بتوصيل الغراض اللي بدهن ياها، أو تعرف شو حاجياتهن وتربطهن بالأشخاص اللي بتعرف أو عندهن القدرة المادية أو غير المادية على تأمين هي الحاجيات، فيك تخبر رفقاتك اللي بهديك المناطق اللي فيها ملاجئ يروحوا عليها ويساعدوا.
2. التنقلات بقلب الشام كتير غامضة، لهيك دور بغروبات الأخبار مين عميسأل وخبرهن بمنطقتك والمناطق اللي متأكد منها شو وضع الطرقات، وشو المناطق والشوارع اللي خطيرة المرقة منها، وتأكد ما تطمن حدا عن منطقة إذا مانك متاكد منها 100%، موضوع التنقل كتير مهم، وكتير عميكون عائق للي عميشتغلوا بالمساعدات، وكل ما خبرت ووضحت الغموض المتعلق بالطرقات كل ما ساعدتهن أنو يعملوا مهمتهن بأسرع وقت ممكن وبشكل يحافظ على سلامتهن.
3. الزبالة بلشت تتراكم بالطرقات، وبكتير مناطق بقلب الشام مانها مشتعلة حتى، الحملات كترت عالفيسبوك مشان لم الزبالة بس هاد ما بيكفي، حاول نسق مع الناس اللي مبلشين هي المبادرات، ونسق مع الشباب والصبايا اللي بمنطقتك أو بحارتك أو بحيك، وحاولوا نسقوا موضوع الزبالة شوي، وتأكدوا أنو تتصلوا وتسجلوا شكوى على موضوع الزبالة، يمكن الموضوع تحسوه مو كتير مهم، بس بكزا حالة بمدن غير دمشق صارت حالات انتشار أوبئة أو عالأقل أمراض مؤذية سبب هاد الموضوع، إذا ما صارلك شي بسبب السلاح، بلا ما يصيرلك شي بسبب الزبالة.
4.  الصيدليات أزمة كتير مهمة، بغض النظر عن الناس اللي عمتتصاوب وتنصاب بسبب الاشتباكات والقصف في ناس أساساً عندها أدوية دورية ممكن تكون عمتلاقي صعوبة بإيجادها، لهيك بس يكون في صيدلية قريبة منك فاتحة دغري خود رقم تلفونها وانشور الخبرية قد ما فيك، ممكن حدا متلك يكون فاتح فيسبوك ويلاقي بسببك صيدلية يجيب منها دوا السكري أو القلب تبع أبوه أو جدو، تخيل كم حياة ممكن تنقذ بهي الطريقة.

هي لينك لمجموعة من أكبر المجموعات اللي عمتنسق العمل داخل دمشق، والناس اللي قائمين عليها واللي عميتواصلوا عن طريقها عميشتغلوا لإنقاذ الإنسان وبس، ومالن أي توجهات سياسية.
https://www.facebook.com/groups/266146126825377/
وهاد لينك لمجموعة أخبار شباب سورية اللي كتير الناس عمتعتمد عليها بمعلوماتها، شارك وخبر وإذا شفت خبرية أو معلومة بتعرفها غلط لا تتردد بنفيها لأنو أصغر غلطة بهالوقت ممكن يكون تمنها حياة بني آدم..

https://www.facebook.com/groups/synews/