ذكريات أبو إلياس : الحلقة التاسعة – مالنا غيرك يا الله

•

لاحول ولا قوة إلا بالله، لا حول ولا قوة إلا بالله..!!
مرحبا عميم..

لك أهلين بحمزة، وينك ولك وينك عم تغط كل غطة ولا التانية

• لك آااخ يا أبو الياس.. آخ

لك اييييي، شبك، شبك، شوفييي

• شو شوفي يا عمي، العالم عم تموت، والأطفال عم تنقتل، والنسوان الله أعلم شو عم يصير فين.. ولسا بتسألني شوفي

حمزة.. قعود وركون.. قعود

• لك يا عمي.. يا عمي.. لسا بتقلي قعوود

قعود خلصني وبلا كترة لعي، دوختني.
قعود، متّي ولا شاي؟

• ما بدي شي، مالي نفس لشي ابداً

لك بالناقص، وهي متّة لكن
ليك حمزة، سماع هالكلمتين من عنك أبو الياس، اذا متخيل انو الثورة بتصير برخيص، والحرية تمنها قليل بتكون غلطان، بتكونو كلكن غلطانين

• مين جاب سيرة الرخيص، كل هالأرواح ولسا بتقلي رخص!

ولك كنّ، وحاج تهوبر، وسماع للآخر

• تفضل عمي، مشان الله لا تواخذني..

ابني، هي هلأ صرلنا حوالي السنة، وكل فترة منقول قربت أكتر من قبل..
بس شوف من سنة لهلأ، وين كنا ووين صرنا
شوف من سنة لهلأ، النظام شلون كان وشلون صار
ميزان القوى كلها اختلفت، وحسابات النظام كل مالها عم تتدهور، ولو ما حس حالو بخطر أكتر من قبل ما عمل اللي عم يعملو هلأ

• بس يا حجي، صارو قاتلين أكتر من 8 الاف واحد، بين شباب ونسوان وأطفال، لك ما بشر هدول، والله ما بشر

سكر هالشباك أول، سقعنا..
لك انت مفكر هالـ 8 الاف هدول، الله يرحمهم، راحو هيك؟
هدول اللي شرفونا، بدن يخلونا نشوف الحرية اللي صرلنا زمان عم نحلم فيها
هدول اللي ربك اختارن ليكونوا شرف الهم ولعيلهم

• الله يرحم ترابهم

اي هاد الحكي الصح، بدال ما تقعد تلطم وتجعر من النسوان، شوف شو بتقدر تساوي انت ورفقاتك وما تقصرو بأي شي

• الله يقدرنا يا عمي، بس المشكلة بهالعرب ولاد الـ..

لك يا عمي شو عرب وشو عجم.. هدول ما بهمن غير مصالحن..
بعدين شو بدك فين والأكبر منهم معكم..

• الله يرحم أمواتك يا حجي ويطول بعمرك.. اي والله، الله معنا..

يتبع…