السيد:رئيس الجمهورية العربية السورية الحرة..فاقد الشرعية
منذ ١٥ اذار الفائت..انت تعاني..ونحن،،رغم الدم رغم الشهداء نشعر بشعور..عاشه اجدادنا فقط!
بت اعرف معنى كلام الجيل السابق..عن المظاهرات..متعتها..متعة نقاش سياسي حول -المتة -ليلا
النقاش ليس عن سيادتك فاقد الشرعية..فانت نقاش انتهى منه الكثيرون!
لست هنا لامارس الاستفزاز..ليس لعبتنا بقدر ماهي لعبتك..-لا استغرب كم انت محصن ضد الاستفزاز عموما!!-
كنت اطالع صفحات عابدي اصبع رجلك الصغير..ما بعرف ليش الصغير تحديدا..يمكن كل واحد وقيمتو خيي!
شفت صورة وانت عم توجه وتاشر عالخريطة و الله اعلم شو تخبص!
ملحوظة قلبت عالعامي لانو الفصحى تقيلة عليك يمكن تكون!
المهم خيي..صفنت..انو يلعن اخت هالحالة..هلأ هالشخص اللي قدامي هاد..فهمان شو عم يعمل ولا انا سيجارتي مضروبة و متقل بالعرق؟
الصورة حلوة..عرفان تنقي مين يصورك..و الست اسماء دايرة بالها عليك و مهتمة بلبسك يعني .مو حاكي شي
بس صفنت صفنة تانية اضرب من هديك..وبعدا عطول تمنيت..تمنيت لو انو انت فعلا فهمان شو عم تعمل!
تمنيت لو انك حقيقة مو خيال..تمنيتك حلم حلو..مو غراب جوا كابوس
تمنيت لو شفت هالصورة و انت عم توجه القادة حواليك لتحرير الجولان..و تمنيت لو انو ضحكتك جوا البرلمان..كنت تحولها لبسمة بوجوه اطفال الشهدا !
تمنيت لو انك كنت حكيم..و نزلت لعند اهل درعا..وبست جبينون لهالناس الطيبين وقلتلون حقكن عليي وجبتلكن عاطف نجيب بين ايديكون عملو اللي بدكن يا!
قلك شي،،بعرف انك مو فهمان شي من هالحكي اللي فوق..خيي سماع لقلك
تذكر دائما انو الوطن اكبر
وانو الشعب اللي وقف جنبك ب ٢٠٠٥
هو نفسو الشعب اللي ضدك ب ٢٠١١..من غبائك
وانو اعند من الشعب..مافي
تمنيت..كونو انت رئيس جمهورية..احكي معك بطريقة..اكتر احتراما من هيك..بس للاسف..ما بتستاهل!!
مع تحيات..م ن د س!!
———————
Y. M
