يجوز تستغربوا هي أجمل سنة بحياتي بصراحة طول عمري بشوف الظلم وبفوت بالحيط ليش ساكتين ولاد الضباط ومن مشي بدربهم عم يسبوا رب العالمين بالطرقات وبالجامعات ونحنا متل الصرامي ساكتين .. لا والمصيبة بيناتنا مين بلش يسب بنفس الطريقة وبيقلك لغوة يا محلا اللي ساكتين … بيفوتوا المدعومين وبيشبحوا وبيطلعوا من المخفر منصورين بطريقة ما ونحنا كمان متل الصرامي ساكتين …
كل فترة منسمع عن واحد سحبوه بتقرير حشرة حزبية ورجعوا يا متبهدل يا مجنون من الضرب يا ميت وعالدفن … ومع هيك منقول الله يرحموا ومنكمل عيشة الصرامي … الكل بيحكي عن حيتان البلد ومن اي عيلة هنن وكيف بالعينها وناهبينها وحاميها حراميها ومع هيك كلو بيضل حديث عالواطي وأوعكن تحكوه قدام غريب .. وضلينا صرامي … القضاء عنّا متل الكرخانة واللّي بيدفع بيطلع مبسوط وياما سمعنا عن بلاوي القضاء واللي ما سمع فهو من المستفيدين مفكرها عادي بيثبت حقو بالواسطة والمصاري … وضلينا صرامي … دائما بينحكى عن عشرات الآلاف قتلوا بحماة بالـ83
ومنسمع قصص بتشيب عن طائفية القتلة والتمثيل بالجثث وكيف كانوا يفتحوا بطن الحامل وهي عايشة قدام جوزها ويقتلوا الجنين .. وقصص بلاوي ومع هيك ضلينا ساكتين
ومع كل صمت وسكون منلاقي تبريرات غريبة عجيبة مثلا اذا فساد بيقولوا ليش وين بالدنيا ما في فساد
منقول جرائم حماة بيقولوا مو احسن ما الاخوان يستلموا ويفظعوا!!! وهون ماني متخيل أفظع من عمايل هالنظام اللعين
ولدنا صرامي وعشنا صرامي لحد هالعام 2011 لحتى فاق اللي بيستاهل يتحرر ورجع اللي معدنوا لسّا صرماية … لمّا بشوف موالي بفهم ليش في ظلم بالعالم ببساطة لانو في ناس بتقبل “بألف عين أم تبكي ولا عين أمو تبكي” … أخبث متل سمعتوا بحياتي
واذا بقدر عوّض الأمهات بدموع أمي فان شاء الله بتبكي عليي أمّي ولا حدى غيرها يبكي
ببساطة هنن تنين بالسجن عم يطّلعوا لبرّا واحد شاف السما الصافية والتاني شاف طين وبلاوي … عادي هيك الحياة وبالنهاية ورغم خوفهن من الطين رح نسحبهن سحب لتحت السما وبوقتها رح يفهموا وين كانوا ووين صاروا … ورح يعتذروا … بس بتضل بالقلب مكسب ما خرج يحصلوا عليه ولا بألف سنة …. فرق كبير تاخد حريتك بإيدك أو تكون عالة ومالك أي فضل
الثمن غالي بعرف والله يجيرنا من اللي جايي بس الحمد لله هيك عم نموت وضميرنا مرتاح انو مو ساكتين احسن الف مرة ما نموت بعدها ولو بميت سنة ونحنا مذلولين …
يا معشر الصرامي حطّوها خرزة بأدانكن … ما رح ننذل وما منركع إلا لله فلحقوا حالكن وتعو عالحريّة قبل ما يجي يوم تبلعوا الغصّة وتقولوا يا ريت شاركنا … لا تبلشوا فوبيا هاد مو تهديد .. ما حدى حيقربلكن لا بالدبح ولا شي هههههه انتو صرامي حنكون عم نحتفل ومو واسعتنا الدنيا وان شاء الله يجي يوم نتذكركن أصلاً .. وما بظن
وكل سنة والمجرمين منهانين والفاسدين هربانين والديكتاتور فطسان وجماعتوا بالسجون
وكل عام و أنتم أحرار وسورية حرة وقوية ومقاومة مو بس ممانعة وتكون أحلى بلد بالعالم وأعدل بلد بالعالم ولهالهدف بيهون أي ثمن بالعالم.
—————————
