اللي صار اليوم يا جماعة انو وصلنا بكير عالميدان وكان الطريق سلس والشبيحة والأمن بمدخل الميدان أقل من العدد اللي متعودين عليه …
مشينا شوي وإلا أبو حبل مليان مؤيدين وشبيحة… صرنا نتفتل … بما انو في مسيرة تأييد كان في كنا نتحرك انا ورفقاتي البنات براحة كبيرة انو خلص على اساس نحنا بالمسيرة ازا صار شي ….
بعد شوي اجتمعت مع كل رفقاتي وقعدنا بنص أبو حبل على طاولة كبيرة حوالي الـ12 شخص كلنا بنات غيرمحجبات وشباب وكان واضح شكلنا انو مو من المنطقة وطلبنا شاي ….
وكانو المؤيدين عم يتفتلو بصمت هنن ووجوه معروفة من الشبيحة وكانت معن مراسلة قناة الدنيا وطاقم التصوير وكانو عم يصوروا بوجوه العالم كلا ونحنا كنا نحاول نخبي وجوهنا …
أدن العصر وهنن بعدون ساكتين بعدين مشيت المسيرة وصاروا يهتفوا (شبيحة للأبد لأجل عيونك يا أسد) قام سكتون واحد وهتف واحد واحد واحد الشعب السوري واحد على أساس انون يعني محترمين …. مرقوا من جنب طاولتنا والكاميرا عم تصورون … عم يهتفوا بشارعنا للأسد .. نحنا كتير كنا هاديين وما تفاعلنا معون بأي شكل ….
بس مرئت المسيرة توجه لطاولتنا خمس شبيحة أو أكتر …. اتطلع علينا اجحش واحد فيهون ورفس كرسي رفيقنا وقال (طلبتوا ولا لسا ) وضرب رفيقنا …
وهجموا علينا كللون ضربونا بالعصي وقلبو علينا الطاولات ولاحقونا …حتى اجا شخص هرب نصنا واخدنا عالحارات … طبعا اصبنا انا وصبية بحالة بكاء هيستيرية من هالوحشية والسفالة والقذارة اللي شفناها رغم انو اغلبنا ما أتأزى …
في شب من اللي كانو معنا اكل ضربة قوية وانا قلبت الطاولة على رجليي … لما دخلنا عالحارات عصبت انا كتير وأصريت ارجع عأبو حبل وتركتون كلون ورجعت اجت معي رفيقتي وقتا….
رجعنا كانو جماعة الدقاق نصون محاصرين جوا والباقي طالعين مظاهرة وملاحقين والغاز كان منتشر بكل الشارع وقوي كتير كتير لدرجة انو ما بتقدروا بتوقفوا …
دخلنا على أحد البنايات ولاقينا بنات تانيين مخبايين من الغاز وشب وعرفنا انو بالبناية التانية كمان كان في بنات كتار مخبايين …
ضلينا محاصرين بالبناية فوق النص ساعة وقت قررنا انو نطلع اجت بنت عالبناية عم تبكي لأنو اعتقلوا رفقاتنا بنتين…
رجعنا بقينا بالحارات كمان نص ساعة تانية بعدا طلعنا عالشارع وووقفنا وما كنا خايفين كنا عم نحاول نلاقي طريقة لنروح عالجامع والشبيحة بعدون محاصرين كل الحارات … فجأة بيلعبوا تمثيلية بايخة كتير بيرمو قنبلة صوتية رقعت بأدني رقع على بعد 50 متر منا بنص شارع أبو حبل وبيصيروا يركضوا ويتجمعو ويشاوروا على بناية قال من هون انرمت القنبلة ….
وبعدين ركضو بالاتجاه المعاكس لجوا الحارات .. هون اجا شخص وقاللنا انو في اتفاقية مشان الافراج عن اللي محاصرين بالجامع بجهود الشيخ …
وشرحلنا كيف فينا نساعد بتخليص الشباب وقتا يطلعو من الجامع في حال حاولوا يعتقلوهن .. حملنا حالنا وتركنا شارع أبو حبل لنقضي وقت لبين ما تصير صلاة المغرب ويفرجوا عن المحاصرين …
مشينا باتجاه حديقة الثريا وكان في شبيحة شافونا اجتمعنا مع رفقاتنا ع باب الحديقة قاموا لحقونا …. ولسا ما في اي خبر من الجامع …
اتفرقنا وهربنا من شبيحة الثريا اللي لحقونا لحد الجسر تقريبا .. اخر شي رحت انا ورفيقتي عالسيارة وتركنا المنطقة….
بعد شوي وصلتنا أخبار انو افرجو عن اللي بالجامع واللجنو وصلت بعد اكترمن ساعة لمدة لا تتجاوز الـ 10 دقايق … وما كان في اي شي بالميدان وقت اجوا…
————————
R.H
