تشبيحات النظام المواربة وكيفية الرد عليها

من أحلى تشبيحات منحبك الموارية وكيفية التعامل معها:

الأولى: إنو وانا متلك والله بكره النظام وعمي أو خالي اعتقل شي مية سنة بالسجون السورية بس ليك سوريا أكبر من عمي أو خالي… وبقاء هالنظام بحميها من حرب طائفية!!
فخلونا نخليه ونطالب بإصلاحات عن طريق رجعتكن إنتو المتظاهرين على البيت وهو من كل ولا بد رح يصلح الوضع بسوريا !!!!……..

هاد العبقري قلو: حبيبي شايفني ابنك أو بنتك وعم تحكيلي قصة قبل النوم مثلاً!!! … وإذا هيك فنعست ولازم نام وتصبح على وطن أكبر منك ومن بشار ومن عمك أو خالك.

والتانية: شكراً لحذف تعليقاتي وطبعاً أنت بتكون لا حاذف ولاشي بس إيحاء للأخرين أنك متعصب ولا تستحق طلب الحرية….
هاد امسح فيه الأرض وقلو أنو تافه وهالأسلوب صار قديم و بااااااايخ متل شكلك وبعدين احذفوا لأنو ملعون وواطي.

التالت: يا أخي هاد النظام ما بسقط بسهولة، إنو إلو شعبية ولازم إنتو إذا فعلاً أحرار وبتحترموا أراء السوريين كافة تحترموا أنو في ناس بتحبوا حب مرضي للقائد المفدى العميد الركن القائد الأعلى للجيش والقوات المسلحية والفريق، رئيس عضو القيادة القطرية طبيب العيون وساحر قلوب العذارى صبايا وشباب طبعاً ( وبتقولولي ليش في بطالة بسوريا وليش الشباب عم ينرفضوا من عذراوات سوريا !! ) سيد الأكوان بشار الأسد المكنى بأبو حافظ علماً أنو اسم ابنو حيدر والذي خسر أحد مشاركين من سيربح المليون الجائزة الكبرى لإصراره على سؤال ما اسم ابن بشار الأسد بـ حافظ بدل حيدر… أنو هاد الزلمي إذا سمعكن عم تقولو أبو حافظ كم مسبة بيكون عم يسبكم بالنهار………. هلأ المهم:

هاد التالت بتقلو: ولووو الله … مين قال ما بنحترم رأي الأخرين؟ حتى لو هني ما احترمونا وداسوا علينا معنوياً وواقعياً بالبوط العسكري، نحن الأحرار رح نكون أرقى و رح نحترمن وببساطة خلوهن يلاقونا على صناديق الاقتراع الرئاسية على شرط تكون نزيهة و يا أخي إذا فازوا بنتحملوا كمان دورة انتخابية لأبو حيدر….. بس هني ليش خايفين من صناديق الاقتراع يا ترى ؟؟؟

الرابع : إنو انتو شو بدكن … بدكن تخربوا البلد، مابتعرفوا أنو هاد النظام ما بسقط بسهولة وأنو قمعي عندو سلاح و فيه يدمر كل سوريا بمدافعو، وبجيشوا بفرعيه الميداني و الإلكتروني رح يبيدكن …….

هاد بتقولو: أنو سمعت حدن طلع مظاهرة لإسقاط نظام مانو قمعي.. سيران مثلاً؟ فشة خلق إنو فئنا الصبح وقلنا شو بدنا نعمل يا الله … إنو ملينا سينما خمس نجوم و ملاهي ومصارينا كوام كوام وما ضل في حتى فقرا نتصدق علين … هون بينط واحد منا وبقول شو رأيكن شباب نعمل مظاهرة، إنو أكشن وهي يلا ومنصورين وشغل الله حيو …. وبنلعب لعبة طميمة مع الجند والعسكر …. وإذا متنا يلا هيك بنكون كسرنا الملل والروتين!!!!

* طبعاً هاد البوست ما رح يخلص .. لأن بصراحة الشبيحة مبدعين … مبدعين بشي واحد بس غبائن والأغبى ادعائن الذكاء ….. وبالنتيجة هني بدن مطلب واحد: فوتوا على بيوتكن منشان الله …. ارجعوا انضبوا و انسوا الـ 1900 وشوي الي ماتوا و انسوا الـ 40 سنة قمع ولم تنتهي بعد وانسوا المقارنات مع كل دول العالم لوضع الشباب السوري وتذكروا أمر واحد فقط … أن نظامنا نظام قومي، نظام ممانعة وهذا سيغفر له كل السطرين السابقين.

إي إي لا تنجلطوا … نظام الممانعة مبرر قوي لابقاء الحجرة فوق صدرنا والعصبة فوق أعيننا و السكارات في أذاننا وهيا إلى تحرير فلسطين والعراق من أيادي الإمبريالية الصهيونية الاستعمارية والعدو الغاشم….

شو وين رحتوا؟ عم أمزح معكن…. هيا إلى مكان واحد فقط: الشارع السوري لنصرخ معاً.
هييي يلاااا يلاااا هيي يلااااا منصورين بعون الله  🙂  🙂  ومافي للأبد ما في للأبد أخر أيامك بشار الأسد.

بقلم:  شذى

المقال يعبر عن رأي الكاتب