يعني بالعربي كل مين ع بيتو…لساتكن عم تقرو؟؟يلا أبي سكرنا هالثورة…
هالأحداث الأخيرة خلتني فكر بكتير شغلات…وكتير أقوال مأثورة كنت حس أنو مالها معنى،بس طلع الها
يعني مثلا مين كان يفكر بالحكمة من المثل : “يا شعبان ليش ما بتجي برمضان؟قلو كل شي بوقتو حلو”
طبعاً هاد المتل هو اللي خلا الرفيقة المناضلة الدكتورة الممانعة بثينة شعبان ما تطلع علينا بأي تصريح منذ تصريحها الأول وحتى مبارح…مع أنو ثقافتي الهجرية ضعيفة بس بتخيل أنو أجا شعبان…وباسم كل المندسين بحب قلو أهلا شعبان…شعبان جانا
هلأ بغض النظر إذا شعبان من الأشهر الحرم لما لأ…مشي الحال وتم القضاء على الأمير النائم…بس ما تطلعلنا شي أميرة نائمة بقا بشي محافظة تانية وخود تعا قيمني لنلاقيلا مين يبوسا…المهم انتشر الخبر انو الزلمة كان عم يركب بالهليكوبتر تبعو…ويا حزركون مين لقطو؟؟؟؟؟عجزتوا ما؟
المخابرات الجوية!! يعني هي الحادثة بتكفي لتخريس كل جحش وكر صارلو من أول الأحداث عم يسأل شو دور المخابرات الجوية بالمظاهرات…أنو والله الشباب عم يطلعوا يتظاهروا مشاة مو روكيتيرز…مزبوط لك عمي مو روكيتيرز (يلي ما بيعرف هي الكلمة بيكون خاين وعمرو مو لعبان ريد اليرت)..اي بس المخابرات كانت عرفانة من بداية الاحداث انو في طيارات بالموضوع ومشان هيك استلمتا المخابرات الجوية…وهي صورة حية مباشرة لعملية القبض على الهليكوبتر تبع الامير السلفي…طبعا الصورة فيها طيارتين لأنو سمو الأمير كان طالع هو بطيارة وحريمو بطيارة تانية مع الجواري والخصيان…منعاً للاختلاط…لمشاهدة طائرة الأمير اضغط هنا
هلأ في أخبار أنو الأخلاقية رح تستلم ملف المظاهرات قريباً…خاصة أنو النظام بلش ينـ… سفلو (يعني البنية التحتية تبعو)
ويا سادة يا كرام لازم كلياتنا بكل محافظات القطر نحتفل بالقضاء ع الأمير الحمصي،يلي حسب شهود عيان تمت تصفيتو،وكانت أمنيتو الأخيرة ياكل حلاوة الجبن ع طريق الشام…وبعدين لحشوه بالبحر حسب الشريعة الإسلامية على مذهب الإمام بوعمامة…مبروك علينا وعليكن بلد الأمن والأمان…وهلأ بما أنو خلصت وما عاد في مهلوسين وبندريين ومسلحين وموساد واخوان وزعران…إلخ
اسمحولنا نتظاهر بكيفنا،ولإخواني السلفيين بقول :
من كان يثور للأمير فإن الأمير قد مات
ومن كان يثور للحرية فإن الحرية لا تموت…
لذلك طالعين يوم الجمعة الجاية بعد صلاة الغائب على روح أمير حمص الغارق في الأعماق…لنعيد الحرية للآفاق
وبتظاهركم يتم سرورنا…
ملاحظة:جنة الأمن مخافرهم
1152011
