تنظير من قلب محروق

شام داود

الواقع الطبقي والطائفي للصراع اليوم نتيجة لأسباب عديدة مجتمعية ترسخت عبر 40 عاماً من الاستبداد والظلم الممارس على الشعب السوري بطوائفه كافة…وان بقي هذا الصراع الطائفي ليس عاماً
لا يعني أنه ينبغي لنا الوقوف ساكتين حياله تحت أي عذر كان…بل ينبغي الآن وأكثر من أي وقت مضى التأكيد على وحدة الشعب السوري تحت راية الحرية ومحاسبة الإجرام أي كان وتحت أي مسمى طائفيا كان أم انتقاميا
اذا اردنا تجنيب سوريا السقوط في فخ المزاودات الطائفية على المدى الطويل حتى لو سقط النظام….
سوريا ستكون دولة للجميع بوجودنا جميعا فيها …..ولن يبقى منها شيء اذا تخاذلنا وسكتنا على أي محاولة جذب طائفي من أي كان.
السلاح اللي بإيد الطائفة بيجرح….والعسكر اللي بإيد الطائفة بيلعن رب بلد
40 سنة من الدروس بهل الموضوع
نحنا سوريين ونحنا ببلد اسمو سوريا اسمو محور الممانعة ضد الاحتلال الخارجي…
مو محور الممانعة ضد المشروع السني الشيعي
ولا محور المقاومة ضد الجهاديين …ولا محور أي صراع مانو بيخص الشعب السوري أولا وآخرا
اللي بدو يبدي دينو وفتوى و تبعية مشايخ وكهنة لأشخاص غير سوريين على على الوطن والثورة
واللي بدو يبدي طائفته وتبعيته للنظام والضابط اللي بضيعته على سوريا
لا يتشدق بالوطنية وبحرية سوريا وبالممانعة شو ما كانت
اذا النظام رفع شعار الممانعة وستعملو لا يعني انو الممانعة خيانة للوطن …ما الشعب هو الممانع مو الحاكم
واذا الثوار والناشطين رفعو شعار سوريا لكل السوريين مو يعني انون عميان ومو شايفين الحقن الطائفي اللي عم يتمارس اولا من قبل النظام وتانيا من قبل المتطرفين واللي عم يزت الزيت عالنار ويشعلها
شايفينو منيح …والا ما كانو مضطرين يضلو حاملين هيك شعار بديهي
بس تحط سوريا وشعبها بكل مكوناتها بسلم أولياتك من فوق….متل شعارات الثورة اللي حملناها ومات منشانها الآلاف….
بس تحط صور الشهدا نصب عينيك وانته حامل بندقية او رشاش عم تواجه فيها دبابات وطيران النظام
تأكد أنك ما رح تغلط …حتى لو غلطت …ما انته انسان بالاساس مانك قاتل ….بس ضلك عم تردد سوريا وانا هون لدافع عن اهلي ووجودي اللي هنة جزء من هالوطن متل ما جارك جزء من هالوطن اللي رح نبنيه كلنا سوا

رومانسية ومبادئ يمكن ماتت بقلوب كتير نتيجة الدم…..معلش
بس بدون هي المبادئ على سوريا وعلينا السلام
تنظير وحكي من ورا كمبيوتر معلش هي قدرتي وهي امكانيتي بوقت نحنا كلنا عايشين بسجن…المطلوب جوا مسجون ببلد ….والمطلوبين برا مسجونين برا سوريا

ضلينا نعلم ولادنا سنين انو السرقة حرام ووقت اللي سرق الولد اكيد ما بررناله ضلينا ضد السرقة …