أهم واول طريقة للتعذيب هيي الترهيب والتخويف ومتل ما حكينا من قبل بيستعمل رجال الأمن العياط والصريخ لحتى يرعب الشباب ويسيطر ع اعصابون .. يمكن يتفاجأ الواحد بس يعرف انو اقسى نوع من أنواع التعذيب هوي وقت يسمع صوت المعتقلين الاخرين وهنن عم يتعذبو.. لأنو سماع اصوات التعذيب بشكل متكرر بيخلي الواحد يصير يتخيل شو رح بيصير فيه وقت يكون عم يتعذب.. وبيخليه يضل متوتر ساعات طويلة بانتظار دورو يلي ممكن يجي بأي لحظة.. لذلك النصيحة المعتادة هيي انك تلهي حالك بحديث او بفكرة معينة ببالك او ذكرى بتعنيلك تكون بعيدة عن السجن قدر الامكان عل وعسى تقدر تبعد عن ادنك وعقلك هالأصوات المؤلمة
[youtube=http://www.youtube.com/watch?v=NAfxiz-CPwE&feature=youtu.be]
هلأ وسائل التعذيب التقليدية صارت معروفة تقريبا.. وفي معلومة مهمة لازم نعرفها انو وسائل التعذيب يلي عم بيتم استعمالها بالسجون السورية صارت أقل وحشية من الوسائل يلي كانت معروفة وشائعة بالتمانينات.. هالشي بيرجع بالدرجة الاولى للضغط الهائل يلي عم بيتعرضولو فروعة الامن ولعدد المعتقلين الكبير كتير يلي عم يتواجد بالسجون.بالتأكيد هادا ما بينفي انو ومتل ما عم نسمع كلياتنا عم بيصير حالات تعذيب وحشية وعم بيستشهدو شباب تحت التعذيب بالسجون والمعتقلات…
بيقول احد الشباب عن تجربته عن التعذيب
لا أعرف حقيقةً طريقة معينة للتعامل مع الضرب، إلا أنني أكاد أجزم أن الشعور بالمهانة
والذل هو الأكثر إيلاماً من الضرب بحد ذاته ربما لأن الجسد أثناء الضرب يكون في مرحلة
خدر، لذا لا بدّ من التخلص من هذا الشعور والتفكير بشيء مختلف تماماً
اهم طرق التعذيب هيي:الجلد ومعروف انو هوي اكتر طرق التعذيب استعمالا خاصة خلال الثورة بسوريا.. بيتم الضرب على الرجلين والضهر بشكل رئيسي
الدولاب طبعا بأقبية كل فروعة المخابرات في كميات هائلة من الدواليب من كل القياسات والاحجام.. بيتم حشر الشخص جوات الدولاب بطريقة معينة لحتى يضل مثبت وبيتوجه الضرب على الرجلين بشكل رئيسي..
الكهرباء.. طرق التعذيب بالكهربا متعددة وكتيرة.. وكان سابقا يتم استعمال كل الطرق هي.. بس بالوقت الحالي بيستعملو العصا الكهربا بشكل رئيسي..الشبح وهوي لما بيعلقو الشخص على شي عالي ممكن يكون باب غالبا وبنترك معلق فترات طويلة وأحيانا بيترافق التعليق مع الضرب على الضهر او الصدر والبطن بشكل متناوب
هدول هنن اهم اساليب التعذيب يلي عم بيتم استعمالها بهي الفترة
هلأ اذا اجينا للتحقيق كمان الجماعة عندون اساليب متعددة.. فينا نقسم اساليب التحقيق ل 3 أقسام
التحقيق الصارم
بيعتمد الضغط المتواصل يلي ما بيسمح للمعتقل حتى انو ياخد نفس او يفكر وهالشي بيصير عن طريق استخدام كافة وسائل الضغط من الأسئلة المتكررة
والسريعة يلي يترافق معها التعذيب المتواصل والكثيف بشتى أنواعه وغالبا ما يكون المحقق
صارم أيضا ودموي وبهي الحالة ممكن كتير يكون المحقق هوي نفسو الجلاد.
التحقيق الموارب
وهوي لما بيحكي المحقق مع المعتقل وكانو بدو مصلحتو وبيصير يعبر عن امتعاضو و عدم موافقته على الشي يلي عم بيصير داخل المعتقل من ضرب وتنكيل.. وبيصير كمان يوهم المعتقل انو هوي متعاطف مع مطالب الثورة وانو بيقدر يتفهم قضيته وحابب يساعده.. وهيك ممكن انو يزلق الواحد ويحكي شي معلومة بالغلط بسبب ارتياحه بالتعامل مع هالمحقق.. وهي المعلومة ممكن تورطه اكتر واكتر
التحقيق الرجعي
وهوي لما بيخلو الواحد يفكر انو تحقيقه انتهى وبيتركوه كم يوم بيرتاح وبيسترخي وبيكون نسي تفاصيل التحقيق والمعلومات والتواريخ والاسماء وفجأة ما بيلاقي حالو غير مشحوط عن جديد وبيبلشو فيه على أسئلة وتحقيق وخبيط وقتل.. مشان هيك مفروض حتى لو حس المعتقل انو خلص تحقيقه يضلو يراجع معلوماته كل يوم مرة أو مرتين.. لحتى ما ينسى شي..
هي الأساليب كلها او جزء منها ممكن انو تتبع من قبل المخابرات بالتحقيق وكل مرة بيتغير المحقق فيها بيطلع على ملف التحقيقات السابقة وبيدرسه قبل ما يباشر التحقيق.. لذلك لازم الواحد يدير بالو على دقة المعلومات وتسلسل التواريخ والتفاصيل وما يغرير بافادته شي لأنو أي تغيير ممكن يخليهون يدققو عليه ويرجعو يعيدو التحقيق من الاول..
