ثورة بلا بواريد – أنا عم ضرّ الثورة

كيف فينك تكون مع الثورة ، ومفكر حالك ناشط وثائر وعم تضحي بحالك كرمالها و بس بنفس الوقت عم تأذي الثورة ؟

أول شي لازم نتذكر أنو هالثورة قامت لأنو النظام هاد بكل ممثلينه وأطرافه أمن وشبيحة عواينية ومخبرين وحتى جزء من الشرطة والجيش والقضاء.. نظام ما بيحترم الإنسان ولا حقوقه ..

هالثورة قامت لأنو نحنا بدنا عدالة حرية وكرامة بها البلد… والعالم اللي طلعت تخاطر بحياتها والشباب اللي حملو أرواحون على كفوفون وهتفو كانو عم يهتفو كلون بها المبادئ..
وهيك بيصير المعيار الأساسي لكل تصرّف أو سلوك بيمثّل الثّورة أو بيأذيها هوي بالضّبط… كل شي بيحترم حرّية الإنسان وحقوقه وكرامته ، بيكون عمل ثوري. وكل شي بيتعدى عليها، هو سلوك شبيه بسلوك النظام وبالتأكيد ما لازم يكون بالثورة.

طبيعي كتير بعد تسع شهور عنف واعتقال ودم واهانات .. أنو يكون الكل حاقد … معظمنا عندو حقد كبير وقلوبنا عم تغلي.. بس كيف فينا نفجر هالحقد من دون ما نحرف الثورة عن مسارها؟.. وكيف فينا نسيطر على هالحقد بحيث ما يعمي قلوبنا وعقولنا ..

أمامنا طريقين: إما منعبّر عن حقدنا بطريقة خلاّقة .. لصالح الثورة، منتظاهر، منهتف، منشجع على العصيان، منغنيأو منكتب منشارك بالعمل الاعلامي بالثورة منوزع منشورات ومنشارك بالعمل بالجرائد.. ، منعمل تقارير للانتهاكات ومنسجل أسماء المجرمين والعواينية والمخبرين .. ألف طريقة وطريقة .. ومتل ما قال أحد الأصدقاء.. انصر الثورة ولو بفكرة!!!

الطريق التاني للتعبير عن حقدنا هوي الانفلات وترك ردود أفعالنا لتصير بتشبه الفعل تبع النظام ، منقتل منكسر .ومنخرب.. منحرق كلشي.. ومننتقم للدم اللي عم بيسيل.. منصير نحنا كمان شبيحة بس من نوع تاني!!..

خليني أعطيك هالمثال : وقت مندعي لإضراب وبيكون جارك فاتح محله، أنت بدك هالإضراب ينجح فبتضغط ع جارك ليسكر محلو بالتهديد أو حتى يالعنف … هالسلوك اللي غايته سليمة ووسيلته مانا سليمة أبداً عم يأذي الثورة كتير، لأنو سلوكيات متل هي بتخلي جارك اللي يمكن خايف من النظام يصير خايف من الثورة ومن النظام وهالحادثة رح يحكيها لكل الناس اليي حولو واللي خايفين أصلا ورح تخليهون يعيدو النظر مرة جديدة بمسألة الوقوف معنا!!

مثال تاني .. وقت بيصير حالة خطف.. أحيانا بتكون حالات الخطف مشان تبادل الاسرى واحيانا بتصير مشان طلب فدية… وهالحكي خطير.. خطير كتير!!! السوريين اللي لسى ما تحركو معنا .. رح يبطلو يستهجنو حالات الخطف اللي بيعملها النظام ورح يقلك جملة متل .. التنين عم يخطفو والتنين ما عم يقصرو ببعض .. وهالحكي صحيح!!!
وقت منشوف فيديوهات تعذيب للشبيحة من قبل الثوار
وقت منشوف فيديوهات فيها قتل أو تمثيل بجثث.. ومنسكت!! ما مندين التصرف..
وأكتر من هيك ممكن نكون مبسوطين!! وقتها منكون عم نأذي الثورة.. ومنكون عم نغير مسارها وطريقها.. منكون عم نعملها ثورة تشبيح وشبيحة وأشرار مش ثورة أحرار متل ما نحنا عم نقدم حالنا للعالم كلو…

وقت بتطلع بالمظاهرات وانت معتبر أنك طالع لتنصر دينك أو طائفتك وقت بتختصر بلدك كلها بطائفتك!!.. وقتها بتكون عم تأذي الثورة..
وقت بتهتف هتافات طائفية.. مذهبية.. ووقت بتهين الطوائف التانية بهتافاتك
ووقت بتسوق وبتدعم شخصيات طائفية …بتكون عم تأذي الثورة..

اللي بيميزنا عن النظام وسلوكه وتفكيره .. وحتى ميزان القوة تبعه هو تفوقنا الأخلاقي .. نحنا أصحاب حق وثورتنا قامت مشان ترجع كرامة الإنسان مو مشان نوزع الكرامات على البشر على كيفنا..

أسوأ شي ممكن نعملو للثورة هوي أنو نحولها لشي بيشبه النظام بعنفو وسلوكو
أسوأ شي وقت منحسس الناس الخايفة أنو هني بين طرفين ظالمين .. وانو لازم يختارو الوقوف إلى جانب أحد هالطرفين يلي بنظرهون رح بيكونو أسوأ من بعض!!
ووقت منأسس نحنا بسلوكياتنا حاضنة للأفكار اللي بيروجلها النظام حول كون ثورتنا ثورة رعاع وقتلة ومجموعات إرهابية..

هالنظام قدر يعتقل كتيرين مننا يعذبنا ويسحلنا .. بس اللي لازم نقاومو واللي لازم ما نخليه ينجح فيه هو محاولاته لتشويهنا .. محاولاته لنصير نسخة ممسوخة عنه!!…

[youtube=http://www.youtube.com/watch?v=O2ePLDHnW14]