آذار 2011
يلي استحو … ماتو
و الله ينزع أوقاتو …
و يا ريتو ما حكى … و ضل منقطنا بسكاتو ..
و الله هالكرسي أكتر منو بحس …
و الله محيي كل حرة و كل مندس
يعني سكت دهر … و نطق كفر
و بأخر يوم من الشهر
أتحفنا سيادتو بخطاب فظيع
و نسي أنو اللي صاير شنيع
يعني الدنية ربيع …
و الجو بديع
و قفلي على كل الموضيع
طبعا هو ما عم ينام الليل .. لأ …
و عم يرجف قصب
هيك مبين و على جبينو انكتب
و مشان يهدو و يفهمو انو لساتو أسد …
و أنوِ الشعب عم يهتفلو … للأبد
فما ضل موظف بوظيفتو
و لا بالمدارس خلو ولد …
عملولو نفشو و شوف مأجحشو
و ضلك كتر العدد
و بمجلس الشعب يلي مو للشعب
و مافي بالوفى متل الكلب ..
و هو اشتغل التصفيق …
عندو اشتغل الكذب ..!!
طبعا استقبلن بضحكة بلهاء
و نسي دم الشهداء ..!!
و كل ما يحكي كلمتين … يزفقولو
و إذا ابتسم … يهتفولو
يعني تمسيح جوخ و كولكة
و كل واحد يحكي كلمة مفزلكة
اكتشف أحدهم أنو سيادتو قليلة عليه سوريا
و أنو لازم يقود العالم
ايه و الله لا أنت و لا هو … بتشبهو البني آدم ..!!
المهم .. و بلا طول سيرة
أخدتو الحالة و بالمؤامرة راسنا انصرع
و بمسيرة التأييد رقصني يا كدع
ما عرف يداري الشعب و لا عرف يداوي الوجع
و فكر انو من الرصاص .. الشعب خاف و ارتدع
مو عرفان انو راح الخوف اللي من زمان فينا انزرع
وقال شو !! صار السفاح عم يوعد بالأصلاح !!
إيه و حياة الدم الي نزل مالح ترتاح ..
وفوقا … ما جاب سيرة اللي قتل
بس بدو يحارب أهل اللي انقتل !!
يعني و باختصار …
هاد اللي صار ..
لك لااااء …
نسيت قلكن .. انو انقطع البث
و طلع أبو رومية المندث
ما خاف و قال شو صار بدرعا
و هو صار يهز براسو متل البجعة ..
لك و كأنو لسة ما بيعرف شو يعني كلمة فزعة
و قالتلو الياسمينة …طيب و منتحاسب يوم الجمعة
و حياة سوريا مافي رجعة …
و لو عالموت … طاب الموت …
و مافي رجعة ….
بقلم: وئام عيسى
لمتابعة الحلقات السابقة من حكواتي الثورة <هنـــا>
