آذار2011
يعني و ما بعرف كيف بدي بلش اليوم …
دم و قتل .. وعيون ماعم تشوف النوم
و عداد الموت … شغال ..!!
و كل يوم على هالحال ..
و كل ما الشهدا عم بتزيد .. الاحتجاج بيزيد
وبوفتا..كان في شي مية و عشرين شهيد ..!!
و من بعد المجازر …
قرر الدكتور الساحر
أنو مع الشعب السوري … يلعب و يقامر ..
و نسي أنو هالشعب قرر و بحياتو مغامر
و ما حسب أنو لح يقلب السحر عالساحر
و مالنا بطول السيرة ..
فبعت المستشارة الشمطاء …
لتخبرنا قرارات بمنتهى الغباء …
طبعا و بعد المقدمة الغريبة العجيبة ..
و حكايات المؤامرة الكونية الرهيبة …
و بأمر من الدكتور ..
و مشان ما حدا يعاتب ..
فجأة … زود الرواتب ..
و قال شو ..؟؟!! بدن ينهو قانون الطوارئ
العين تطرقو و هو مارئ
و أنو بدن يعملو قانون إعلام و قانون أحزاب
بس المشكلة أنو الشعب مالح يصدق كذاب
ما العالم عم تصرخ … و مفلوتة عليهن الكلاب
وبيذكرو منيح .. وقت فطس أبوه المقبور
و أجو بدن يسلمو الدكتور
إيه بثواني عدلو الدستور
يعني هالحركات .. مالح تمشي معن يا تور …
و من بعد تصريح المستشارة المشؤوم ..
بعز الضهر .. صرخت النجوم
و قرر الشعب أنو ما يرجع ..
و أنو العتم ح يزول و الشمس لح تطلع ….
و بما أنو الدكتاتور ..مفكر سوريا مزرعة ..
وأنو هو عملها … و هو جمعا
نسي أنو نحنا بشر .. مو صيصان !!
وصار الواحد ما يعرف .. هو دكتور عيون …
و لا عميان ؟؟!!
و هون … صرخت الياسمينة هي وكل الجيران ..
يا بثينة يا شعبان
الشعب السوري مو جوعان
الشعب السوري ما بينهان …
سمعتي مو جوعان …
بقى علوة لو فهم الفهمان ..!!!!!!!
بقلم: وئام عيسى
لمتابعة الحلقات السابقة من حكواتي الثورة <هنـــا>
