تنويه: تمت كتابة الجزء الأساسي من هذا المقال نهاية شهر آب الماضي حين بدأ الحديث في أوساط الشارع السوري الثائر وبعض ف المعارضة السياسية عن ضرورة التدخل والحماية الخارجية، وكان ذلك قبل حوالي أسبوعين من “جمعة الحماية الدولية”. اليوم وبعد أن صوت غالبية المشاركين على صفحة الثورة لاختيار اسم “جمعة الحظر الجوي”، أود أن أعيد تقديم هذا المقال مع الأخذ بعين الاعتبار ما تغير خلال هذين الشهرين من استمرار تساقط الشهداء في سوريا من جهة وسقوط نظام القذافي تحت ضربات النيتو وثوار ليبيا من جهة أخرى.
أنوه بأني لست خبيراً عسكرياً أو استراتيجياً، وكل ما سيرد أدناه ناتج عن مراقبة ما يحدث وعن أبحاث في مواقع متعددة على الإنترنت بالإضافة لآرائي الشخصية التي تحتمل الصواب كما تحتمل الغلط.
—————————————————-
بعد هالمقدمة الفصحى رح احكي شغل شباب، عامية على فصحى، وماحدا يزعل الله يخليكم.
حابب شارككم برأيي وببعض التفاصيل اللي ضروري نفكر فيها قبل ما نحكي عن تدخل عسكري ومنطقة حظر جوي.
أول شي، لازم نحاول نعرف بالضبط:
شو يعني منطقة حظر جوي، أو حظر طيران؟؟
بحسب ويكيبيديا :
“منطقة حظر الطيران: تعني منع تحليق الطائرات في أجواء منطقة معينة أو دولة ما، استنادا إلى قرار من مجلس الأمن الدولي، لكن بعض الدول اتخذت قرارات فردية بحظر الطيران كما حدث في العراق أوائل تسعينيات القرن الماضي.
ويتطلب فرض الحظر الجوي إقامة دوريات على مدار الساعة فوق المجال الجوي للدولة المستهدفة، وأحيانا تدمير مضادات الطائرات لذلك البلد.
ومن آثار الحظر حرمان القوات الجوية للبلدان من سيادتها الجوية على أراضيها، وإفساح المجال لقوات أخرى بالتحرك في الأجواء على حساب صاحب الأرض، والإضرار الكبير بالحركة الاقتصادية وحرية النقل الجوي”
بحالة سوريا،معظم الدول صرحت أنها غير مستعدة للتدخل بدون قرار من مجلس الأمن تحت الفصل السابع، وبالتالي اذا روسيا والصين ضلوا على نفس الموقف فهيك قرار مستحيل يصدر عن المجلس بفضل “الفيتو” (مشروب الأبطال).
خلينا نتجاوز هي النقطة، ولنفرض جدلاً انو طلع القرار، وبلش التنفيذ. الخطوة الأولى لتنفيذ حظر جوي هو تدمير الدفاعات الجوية لسوريا لأنو أكيد الجيش ما رح يقعد يتفرج على طيارات الناتو عم تمر فوقو بدون ما يجرب يتحركشهم بكم صاروخ.
طيب، بهذه المناسبة رح يطلع معنا سؤال تاني:
يا ترى البلد المقصود (سوريا) شو عندها امكانيات بمجال الدفاع الجوي؟؟
دورت كتير عالنت، ومعظم التحليلات بتحكي انو سوريا عندها كم كبير من الدفاعات الجوية لأنو سلاح الطيران اللي عندنا أضعف من سلاح الطيران الإسرائيلي، وبالتالي الجيش السوري اعتمد على تطوير الدفاع الجوي ليعوض عن نقطة الضعف بالطيارات. معظم ترسانة المضادات الجوية اللي عندنا هي من الحقبة السوفييتية، يعني ما عادت كتير مفيدة، بنفس الوقت في جزء مهم منها تم تطويرو بالتعاون مع روسيا بالكم سنة الأخيرات بالإضافة لشراء أنظمة جديدة متطورة من روسيا بآخر 10 سنين.
بالـ 2007 طلع تصريح لمسؤول بالجيش الإسرائيلي بيقول انو نظام الدفاع الجوي السوري هو الأكتر تطوراً بالعالم، بس شكلو هاد التصريح كان بيهدف للطنبرة أكتر منو لأي شي تاني، لأنو بعدها بشهر اجت طياراتهن عملت زيارة ناح دير الزور وراحت، وما طلعت من عندنا ولا فشكة ترحب فيهن… بس بالتأكيد، هيك تصريح مانو مبني على فراغ.
بغض النظر عن هادا الهامش التاريخي، ما فينا ننكر انو الدفاع الجوي اللي عندنا هو فعليا من الأقوى عالمياً ولو انو النظام ما استخدمو لهلأ ولا مرة من الـ 73.
موقع “GlobalFirepower.com” مصنف إمكانيت سوريا بالدفاع الجوي بالمركز الخامس عالميا (هنـــا) وذاكر انو امكانيتها بالدفاع الجوي هي أكتر من 3000 بطارية، بالإضافة لسلاح الجو، يعني أكتر من 5 اضعاف اللي كان موجود بليبيا.
بالنتيجة، بيطلع معنا مجموعة أسئلة جديدة:
الدول اللي ممكن تفكر تعمل حظر جوي، قديش بدها وقت وطلعات جوية لتدمر هي المواقع كلها؟ ومعقول قبل ماتتدمر هالمضادات، ما رح يخسروا ولا طيارة؟؟
وبعد ما دمروهن، نحنا شو رح نستفيد؟؟
كأنو عم ننسى انو في حدا على بعد 60-70 كم جنوب دمشق مستعد وقت بيجد الجد يفوت يعمل منطقة عزل متل اللي عم يقولوا انو تركيا ناوية تعملها مشان “ضمان الحدود”، أو حتى يفوت عالشام بالمعية.
بنفس الوقت، حابب الفت نظر لمسألة بغاية الأهمية وكتار بيعرفوها: الدول الكبرى حاليا عم تمر بأزمة “الديون السيادية” واللي هي بالمختصر انو صار في عجز كبير بموازنات هي الدول عن سداد الديون المترتبة على الدولة نفسها.. ما بظن انو الشباب فاضيين يتكلفوا كذا مية مليون دولار او يورو كرمال عيوننا.
لنفرض جدلاً انو تم تجاوز كل هاي التفاصيل. طيب، الدول اللي بدها تنفذ هيك خطة وتصرف هالملايين عالعمليات العسكرية، شو جاييها بالمقابل؟
نحنا متفقين انو النفط اللي صفيان عندنا “ما بيطعمي خبز” بالنسبة للأطراف الدولية. وبالتالي اذا هني قبلوا يعملوا هالشي، بدنا نعرف شو هو الثمن؟؟ هل هو انو ننسى الجولان؟ هل هو قواعد عسكرية لهي الدول بالبلد؟ هل هو نموذج شبيه بالعراق (حكومة بالإسم تحت وصاية خارجية)؟؟
اذا مشان نخلص من النظام بدنا نبيع البلد.. اي عفواً، الله ما قالها
وللمعلومات أي تدخل من هالنوع رح يقوي النظام بدل ما يضعفو، والناس المحيطة فيه (واللي ما بنقدر ننكر انها مابين 30 و 40% من الشعب السوري) رح يتمسكوا بالنظام بزيادة لأنو رح يعتبروه حاميهن من بطش “المحتلين والإستعمار والمؤامرات الدولية…”
حابب خبركن شغلة تانية، اللي صار بليبيا ما كان بس حظر جوي، والضربات اللي انعملت هي شي مختلف تماما، ورح تكون موضوع لحديث تاني بعدين. وعلى سيرة ليبيا، الناتو (الله يخليه لأهلو) اعترف أنو أكتر من مرة ضرب مواقع مدنية بالغلط، وهادا الحكي بليبيا اللي مساحتها أكبر من سوريا بكتير وما فيها غير 6 ملايين شخص، ومعظم مناطقها صحرا، ومع هيك انضربوا مدنيين بالغلط.. معناها قديش الاحتمال أكبر بسوريا اللي مساحتها أصغر وعدد سكانها 23 مليون؟ وشو حيكون شعورنا اذا أكلنا قصف من الناتو بالغلط فوق قصف النظام اللي مو بالغلط؟
تساؤل أخير وسئيل: اذا صار اي شي من كل هاد الحكي، فكركن ايران رح تضلها قاعدة عم تتفرج؟؟؟؟؟؟؟
يا جماعة، كلنا قلبنا محروق عاللي عم يصير بالبلد وعالإجرام اللي عم يرتكبو النظام، كلنا انقتللنا قريب أو صديق أو أكتر من واحد، كلنا في النا معتقلين بسجون النظام.. بس صدقوني، الحل بسوريا ما رح يكون غير من جوا سوريا. وضروري نتذكر منيح شو الهدف وشو الموقف.. نحنا ضد النظام مو ضد سوريا
آسف عالإطالة وسامحوني اذا دايقت حدا بكلامي
بعض المراجع المفيدة:
ويكيبديــا – عن منطقة حظر الطيران
The international Institute for Strategic Studies
————————-
أبو الطيب
(من مجموعة سوريا اليوم)
