"دستور من بعثكم"

TK
————————–

على سيرة الغاء المادة الثامنة و كونو حزب البعص يللي انا ما بنتمي له و نفدت من التنسيب الالزامي بلمدرسة برفضو علناً و ما عملولي شي (هلحكي بشي 2001) ايه و كونو هلحزب العتيد لم يعد القائد للدولة و المجتمع كما كان بموجب الدستور السابق اطالب بما يلي:

1. الغاء منظمة شبيبة الثورة يللي كمان ماني عضو فيها (كمان رفضت الانتساب بالـ 1998)

2. الغاء منظمة طلائع البعث

3. اراحة حناجر الطلاب و اذان من يسكن بجوار المدارس الحكومية و الخاصة من موضوع الشعار تبع متل مسجلة قرب جرب اي قطعة بـ 10 ليرات (امة عربية واحدة >>> ذات رسالة خالدة /// اهدافنا >>> وحدة حرية اشتراكية)

4. الغاء المعسكر تبع بعد البكلوريا (صاعقة و انتاجي) تبع يللي بيعطي علامات زيادة لطلاب الباكلوريا (كمان ما رحت عليه كوني مو شبيبي و الله لا يحيجنا جبتها بعلاماتي)

5. تغيير كل لافتات (ارامات) المدارس العامة و الخاصة و الدوائر الحكومية و الجامعات و ثكانات الجيش يللي عليها شعار الحزب العتيد و تنظيف حيطانها من الشعار المذكور6. ازالة كل صور الحزب و اعلامو و شعاراتو من الاماكن المذكورة اعلاه

7. اغلاق مراكز الفرق الحزبية و شبيبة الثورة و منظمة الطلائع من الاماكن المذكورة اعلاه و توضيح سندات تمليك او اجار المراكز يللي براتهم و من وين اندفع حئها او اجارها

8. سحب قطع الاسلحة من محارس هلمراكز و توضيح رواتب الحراس و الحجاب و الموظفين مين حيدفعها من هللئ و رايح

9. الغاء مادة التربية القومية الاشتراكية من كل الصفوف من الاول للبكالوريا و الغاء مادة الثقافة من الجامعة

10. اعادة سيارات الفرق الحزبية الى الدولة

11. ازالة كل اللوحات الرخامية يللي عليها شعار الحزب و انو قام الرفيق المناضل فلان بافتتاح الدائرة الحكومية الفلانية

12. الغاء عطلة ثورة الثامن من آذار (مع انو حنخسر يوم استرخاء بس الدستور دستور)

13. الغاء الاحتفالات و اللافتات يللي كانت تصير بـ 7 نيسان عيد ميلاد الحزب و بلمعية تبع 16 تشرين شيت الحركة التصحيحية

14. الغاء جريدتي البعث و الثورة او ابقائهما مع توضيح مصادر تمويلهما

15. الغاء ترديد شعار الحزب العتيد اثناء الاجتماعات الصباحية و تدريبات الجيش العربي السوري

هدول طلعو معي بصفنة بسيطة، اذا تذكرت شي اضافي حارجع طالب فيه بس هدول يعتبرو اولويات