ذكريات أبو إلياس: الحلقة الثانية | شو هي طائفية؟

شو هي طائفية؟

• صباحو عمييييم..
أهلين يا حمزة يا ابني… جيب هالكرسي وقعود.. تشرب متّي؟

• والله يا عمي من إيدك.. ما بتتفوت، هههه شو حجي، شايف اليوم شايل التلفزيون من أصلو!
اي منيح ما زتيتو من الشباك كمان..

• أف أف، خير ليش؟ مين زعلّك فيه؟
لك قاعد عم قلّب متل العادة، وقّفت ع هيْ قناة الدنيا.. الله لا.. لكْ شو بدي ادعي عليهم.. الله لا يوجهلن الخير.. عم يحكو انو العالم بدها تكره بعض ويقلبوها قتل وضرب بين الإسلام والمسيحية، و السنة والعلوية.
غص أبو إلياس، وكأنني لمحت دموعاً في عينيه. بلع ريقه ، ثم نظر في عيني وقال:
دخيل عينك ديرو بالكن على بعضكن

• لا تاكل هم عمي، لا تاكل هم.. يعني بتعرف هيك امور بتصير بكل وقت. اكيد ع زمانكن كان في هيك شي كمان.. بتمر..
معلقتين سكر ما..؟
لك يا عمي، يا عمي، إذا أهل الحارة عنا، لهلأ بذكر كانو يبعتو بناتن إسلام على مسيحية على خالتي ، مشان تعلمن خياطة.
وأمي الله يرحمها كانت تصوم مع المسلمين برمضان، وأبي الله يرحمو كمان ما تركنا إلا ومعلمنا شو هو القرآن والإسلام.
بزماناتو لك يا عمي، كان في عنا جار بالحارة، أبو جعفر، الله يرحمو طيب ولا ميت، كان علوي..
اي كل يوم كنا نسهر سوا ببيت واحد مننا، وعلى لعب طاولة زهر، بس وحياة عينك ما كان ياخد مني ولا دق.
عيب هالحكي لكْ عمي، عيب

• طب عمو، إيمت بلشت هالقصة لكن، وصار في إحساس بتنوع الطوائف بالبلد؟
من وقت ما استلم هالأسد اللي ما حدا قدر عليه غيركن، ومن وقتها لك عمي، بذكر صارو يحاولو يساوو الشارع الفلاني بس علويين، والزقاق الفلاني للمسيحيين، بس مع هاد كللو.
مااا زبطت معن. عمي.. ما زبطت.

• لكن ليش بالتمانينات ما تحركتو، ما عملتو شغلة تشيلو ابن هالـ… فيها؟!
بعد الغصة..كان الجواب

يتبع…

ذكريات أبو إلياس: الحلقة الأولى

———————
مجلة سوريا بدا حرية