ذكريات أبو إلياس: الحلقة الحادية عشر- واجبنا

• صباح الخير..
صباح النور.. هلأ هيك بقولو صباح الخير.. من راس مناخيرن؟

• طيب، صباح الخييير
لك شبك حمزة. شبك ابني مانك مصحصح، متل الميت

• آآآآخ يا عمي، آآخ
لك شبك، ما تحكي، وللا قلك.. طول بالك خلينا نشرب فنجان قهوة، وصحصح، مشان تعرف تقعد عالقليلة

• والله يا عميم، مبارح شو ليلة، ما شفنا طعم النوم

ههه، اي وشو جبت جديد، كيف بدك تنام وصوت الرصاص بكل دقيقة

• لك يا ريت انقضت على هيك!

مسيك هالفنجان وحكيلي، شو صاير؟

• هاد يا عمي، اتصلو فيي الشباب وفي معن 3 جرحى، وما عرفانين شو بدن يعملو فين
يا عدرا.. اي

• والله يا عميم، ما عرفان كيف عتمت العين شوي، رحنا انا ورفيقي حسن، بتعرفو ما هيك؟
لك اي بعرفو.. وبعدين

• والله يا عمي، حملناهن على كتافنا، ووينك يا لبنان، من على الحدود
شو هالسبحة لك ابني..

• الله يسامحك، بالله عليك، هيئتي هيئة واحد الو مروة يسحب ويعمل مقالب..
طيب وكيف صار..

• من عالحدود عمي، استلمناهن هنيك، وحسن بيعرف البراري والطرق منيح، وشي 5 ساعات لحتى وصلنا على حدود لبنان، سلمناهن لجماعة، ورجعنا
لك روحو، الله محيي البطن اللي حملكن
وان شالله ما كان في خطورة

• الخطورة موجودة عميم، بس الحمدلله هالمرة مرقت على خير
والله ذكرتني وقت تصاوبت ونقلوني رفقاتي عالخيل، وشي يومين، نوم واكل وشرب بالبراري، بين ما وصلوني على قرايبيني بالضيعة

• ايمت هي عمي؟!
هي على دور الفرنساوية لك ابني

• والله ما قصرت يا حجي، الله يطول بعمرك
لك انتو اللي يحميكم، ويحمي شبابكم..

• هاد واجبنا عميم،، ما حدا عم يعمل غير واجبو..

يتبع…