السهرة عند أبو الياس لسا بأولها.. والشباب من حديث لحديث.. وإذ..
(أبو إلياس) يا عدرا.. شو هالصوت هاااد؟
• يا ربي دخيلك.. اللهم عافنا.. هدول الكلاب عمي.. الهيئة بلشو الضرب بالمدفعيات
لك الله يهدّن.. الله يهدّن. مافي مين يردن هدول
• والله يا عميم مصيبة المصايب هدول.. الله يسترنا من شي قذيفة آخرت هالليل
تفّ من تمك لك ابني.. ناقصنا نحن
الله يحمي هالعالم.. الله يحميهم.. لك هدول مافي مين يردن
• ما تخاف عمي.. الجيش الحر أدها إن شاء الله
الله يحميهم.. والله أبطال
• والله يا عميم.. من كم يوم قابلت كم واحد منن، شباب متل الوردة، ورجال ولا كل الرجال
اي لكن لك عمي، هووون بتبين الرجال
هاد الجيش الحر عمي.. ذكرني بالثوار على دور الفرنساوية، كان كل شب متل الوردة، بنام بالفلا، وبياكل الخبز اليابس، كرمال يقاتلن وياخد بحق هالناس الضعيفة
• وانت ابو الياس، ما حملت سلاح وقاتلت معن؟ ولااااا!!!
لك انت ما بتزوء، تضبضب يا ولد، انا بعمر أبوك..
لك انا وتنين من أخواتي ما كنا نعرف الليل من النهار
• الله حيو ابو الياس، كمل عمي كمل
ياسيدي مرة من المرات، بنص الليل نايم انا واخي ابو انطوان بأمان الله، وأبو زياد، أخي التالت عم يحرسنا..
بفيقنا فجأة ، وإذ بدورية فرنساوية جاي صوبنا..
• ايييي!!
اي شو اي.. اخدنا البارودة وتخبينا بين الشجر.. مافي نص ساعة .. بعملك كان في دورية.. بعلمك راحو بخبر كان
• بهالسهولة…
لا والله ما بهالسهولة.. ليك عمي شايف هون عند خاصرتي
هي الرصاصة الوحيدة اللي صابتنا.. وكانت شرف الي.. ولهلأ كل ما بشوفا بنبسط بهديك الأيام
وماحدا رجعها غيركم
• الله يبارك فيك يارب.. والله يا عمي مانك قليل
اي لكن عمي، مشان هيك ومتل ما حكيت.. هالثورة بدون همة هالجيش الحر اللي عم ينشق ما رح تزبط عمي.. ما رح تزبط
• بس والله يا عميم بدن دعم.. وفي نقص كتير
لك شو عم تحكي.. لك انا بارودتي بزماناتو الوالدة اللي يرحمها، باعت دهباتها مشان نقدر اشتريها وحارب هالفرنساوية
لك عكازتي هي اللي شايفها بعيونك.. والله لو اعرف انها بتنباع وبتجيب حق رصاصة ها.. ما بقصر..
• ما تاكل هم عميم.. الشباب ما عم يقصرو.. لا بمال ولا بغيرو…
يتبع…
