ذكريات أبو الياس: الحلقة الخامسة | اي ما سكتنا

• السلااااام عليكم، مرحبا
وعليكم السلام.. والرحمة والإكرام.. أهلين عمي حمزة.. تفضل..

• الله يزيد فضلك يا عميم، شايف عندك ضيوف عمي، برجعلك بعدين؟
فوت هلأ خلصني، بلا لت وعجن، انا بدي ياك تشوفن

• الله يعطيكن العافية يا رب
هاد هو حمزة اللي كنت عم احكيلكن عنو، هاد هو الحشري أبو أسئلة، الله وكيلكن بحس حالي بشي فرع مخابرات

• هههه، له يا أبو الياس، هيك من أولها، لسا الشباب هي اول مرة منقعد معن.
ما تاكل هم ابني، الشباب مننا وفينا، كلو مقضي لمصدي

• اصبح اذا سألتكن هلأ ليش سكتو كل هالوقت، في حدا يجاوبني
بلشنااااا من أولاااا
عمي، يمكن نكون سكتنا، لانو هالنظام الزفت خلانا نلتهي بأكلنا وشربنا
اذا المحارم والموز كانت رفاهية، وما توصل عالبلد غير تهريب، بشو بدنا نلتهي
هي غير الأصابع الناعمة اللي كانت تكتب كل تقرير ولا التاني.

• عمو هلأ كلككن كنتو موظفين مو؟
صح، ما عدا أبو أيهم كان فاتح مكتبة لحالو
طيب عمو معلش لو سألت سؤال ولو فيه غلاظة؟
سآل سآل، ما هلكتني غلاظة. ههههههه

• يعني اديش كان تقريباً كان راتب الواحد فيكن؟
– اففف طرق عالوتر.. طيب.. هادا يا سيدي
– تعى انا بجابو
– ههه هي عمك ابو سبيع رح يجاوب
– انا كنت اشتغل بالمطاحن، وكان راتبي 600 ليرة، هادا الحكي بالسبعينات بدك تقول، اي شو كنت سلطان زماني
وبالتسعينات قبل ما اطلع عالمعاش كان راتبي شي 4000 ليرة.. اي ماكانوا يكفو أكل وشرب

• حجي بالله عليك، موظف راتبو 400 ليرة وضليت ساكت!! شفت هادا حكينا سكتو عالصغيرة والكبيرة
لك شو قصتك اليوم مخك مسكر
بتحب هي الموجودين عندك، كل واحد قد جدك، خليلك كل واحد يحكيلك قصتو، شو عمل وشو ساوا..
وفوق هاد كلو ما نفع.

• والله يا ريت.. السهرة اليوم صبّاحية..

يتبع…

———————
مجلة سورية بدا حرية