• شو عميم.. من وين هالقشطات المرتبات..
والله يا ابني هدول القشطات شغل قرايبينا بالضيعة، والقطايف شغل ايدين خالتك ام الياس
• تعييييش، اي عمي أبو أيهم..
اي يا ابني.. امرني
• ما يؤمر عليك ظالم يارب
حجي.. هلأ انت كان عندك مكتبة ما هيك؟
اي مزبوط
• كيف كان وضع الكتب والكتابة وقتها..!
عادي جدا، اللي بيكتب متل ما بدن أهلا وسهلا في،، واللي ما بيعجبن كتابو،،، بياخدو وبياخدو كل شي بيعرفو
• ما عندك شي كتاب من هون او هون.. من الذي منو يعني..
هلأ بيت السبع ما بيلخى من العضام، بس بدك تدير بالك، ترا اللي كانو يمسكو عندو هيك كتب، ما حدا يعرف عنو شي.
على مبدأ يا بتقرا اللي بدنا ياه وبتعمي قلبك وعيونك (بعيد عنك يعني)، يا أما إلى جهنم وبئس المصير.
• وكان في إقبال على هيك كتب ممنوعة؟
له يا عمي ولَوْ . شو انت مستئل بالبلد واهل البلد. عليم الله ما في قدهن بحب القراية والبحبشة بالكتب خصوصي اليساريين والشيوعيين بهديك الايام، يا أما تكون مجموعة من الشباب طالعين جديد بدن يعرفو كل شي مرة وحدة، او من شي معارض معتق شبعان سجن ما عاد تفرق معو شي.
بس ليك هلأ كللو لازم يتغير ها
• كيف يعني..؟!
هلأ بهمتكم،، اسمكم شعلتوها ثورة.. لا تنسوا بكرا الكتابة والكتاب بعد ما تخلصوا.. ترا الشغل الصح انك تعمر بعد ما تهد..
• وصلت حجي.. وصلت
وحياتك بكرا لتشوف ابداعات من هالشباب اللي حوالينا … بترفع الراس.
بس شو مشان.. ليش ما توظفت وفتحت مكتبة.. على علمي انو الوظيفة كانت شغلة كبيرة..!!
يتبع…
ذكريات أبو إلياس: الحلقة الأولى
ذكريات أبو إلياس: الحلقة الثانية
ذكريات أبو إلياس: الحلقة الثالثة
ذكريات أبو لياس: الحلقة الرابعة
ذكريات أبو لياس: الحلقة الخامسة
———————
مجلة سورية بدا حرية
