ذكـريات أبـو إليـاس: الحلقة الرابعة | ليش سكتنا؟!

• أبو الياس مرحبا..
أوف أوف أوف.. شبك ابني شبك، شبك معصب وعم تقاتل دبان وجهك!

قعود لنشوف.. قعود

• لا تواخذني عمي، متضايق من جارنا، لك تسع شهور ولهلأ عامل حالو مالو خبر.. لك قال مالو علاقة..
لاحول ولا قوة الا بالله، لك عمي، اول شي قوم تحرك عملنا كاستين متة، والله فكرت في شي محرز..

• عمي مشان الله لا تزودها علي، عم قلك لهلأ عم يقول ما دخلني، وكانو مانو عرفان شو صاير برات بيتو..لك يا عمي يا عمي هي يا ربي نفسي هي اللي وصلتنا للي نحنا فيه
هههه، لك يا ابني، يا ابني، عادة الفوران ما بتبطلا انت، أسمعني لقلك : هو معو حق وأنت معق حق

• هو؟؟؟ معو حق؟؟؟
لك أييه ابني، أنتو بدكن تعملو ثورة ع فارم عليكم بس ما بصير تجبرو الناس عليها.. يا عمو كل واحد على عقلو الله يعينو بعدين لك ابني
اي حميد الله العالم كلو عرفان شو عم يصير معكن، ما متل ما صار بالتمانينات.

• ما هاد حكينا عمو ، لأنكن سكتو وقلتو ما دخلنا
آاااخ، اي والله يا حمزة، نحن اللي سكتنا..
سكتنا بعد ما عرفنا وكانت خلصت الشغلة من أصلها..
سكتنا بعد ما راح اكتر من 40 الف واحد
له له له، صرت حاطط جبل شكر عمي، شو صرلك شو عم تعمل قطر؟؟

• لاتواخذني عميم، نرفزت عالرقم،،، هدول بس بحماه؟!
– لك يا عمي هديك الأيام كمان الظروف كانت غير، لك اهل حماه نفسن ما كانو عرفانين ليش الجيش دخل لعندن.
بعدين هدول ما بس بحماه عمي، كمان بحلب وجسر الشغور.. لك بريف دمشق كمان نفس الشي.

• طيب.. سكتوا.. ما اختلفنا.. بس هدول 40 سنة، ما يومين تلاتي.. عملو شي بعدا

ضحكة.. وصفنة.. وكان الجواب..

يتبع…

———————
مجلة سورية بدا حرية