مالك داغستاني
أم علي أول شي البقية بحياتك ومن قلبي وصدقيني من قلبي بتمنى تعينك الحياة إنك تكملي حياتك وتربي ولادك متل ما بتحلم كل أم
يا أم علي هادا اللي كاتب نافق على صورة أبو علي (وأنا إذا بتصدقيني بعتبر هالكلمة المكتوبة جريمة.. وأنا مع الثورة من قبل الثورة بشي 30 سنه) هادا اللي كاتب هيك يمكن بأول الثورة بقي يصرِّخ: الشعب السوري واحد لحتى انبح صوتو. بس يا أم علي الكرسي اللي عامي عيون اللي قاعد عليه ما خلا النظام يسمعو وكان يسميه خاين ويقتلو يحبسو وأنا ماني متأكد انتي وأبو علي بهديك الأيام شو كنتو عم تسموه؟ خاين ولا صاحب حق وعم يطالب بحقو متل كل البشر بالعالم.. يا أم علي اللي قتلهن أبو علي بدارة عزة ويمكن بغير بلدات قبل ما يموت كمان كان عندهم ولاد وعندهن زوجات وأمهات وراح أبو علي عضيعهم (وأنا سمعتك وانتي عم تذكريه إنك ما كان بدك ياه يروح) بس هوي اختار وراح عضيعهم لأنو في حدا خوفو منهم وخبرو إنو إذا ماقتلهن وقتل ولادهن هني رح يجو لعندك عالضيعة ويقتلوك ويقتلو ولادك.. وهون المشكلة يا أم علي إنو أبو علي صدقهن..
يا أم علي أنا قضيت سنين من عمري بسجون حافظ أسد واللي عذبوني بالدولاب والكهربا والكبل الرباعي كانوا أبو علي وأبو خالد وجورج.. واللي كانوا يعتنوا بجروحي بالمهجع 9 بفرع فلسطين كانوا أبو علي وأبوخالد وجورج وصدقيني كان أهم واحد اعتنى فيي هوي أبو علي.
يا أم علي انتي وولادك سوريين وأجدادكن سوريين.. انتو ما جيتو عسوريا بعهد حافظ وابنو لحتى تخافو على حالكن إذا سقط النظام.. يا أم علي اليوم الوضع صار صعب كتير وما بدي اكذب وقلك انو الحل سهل.. النظام دمر مدن وخلا ناس تقتل ناس وخبر كل اللي استشهدو بالحولة وبكرم الزيتون وبالقبير وقطنا والحراك وبكل سوريا.. خبر أهالي كل الشهداء انو اللي قتلهم هوي أبو علي وحط أبو علي بالواجهة. بس أكيد يا أم علي بدو يجي يوم ويكتشف السوريين اللي هني اليوم مجروحين إنو أبو علي كمان كان ضحية النظام متلو متل كل السوريين. ويومها يمكن يروحو رجال ونسوان من الخالدية وجورة الشياح لعندكن عالضيعة ليقروا الفاتحة على روح أبو علي.. ادعي معي يا أم علي لنوصل لهداك اليوم.
[youtube id=”JS-EuUYlNNc” width=”600″ height=”350″]
