سترينغ للوطن

مؤخراً،كل يوم عم نسمع باسماء جديدة عم تنتسب لحزب المؤامرة…وعم تبيع ضميرها (المنفصل أساساً) مقابل “حفنة” من الدولارات…هلأ بعرف أنو كتير عالم بلشوا يتوسوسوا من هي “الحفنة” خاصة أنو عم نسمع فيها كتير هاليومين بدون ما نعرف شو هي…مبدأياً بحب طمنكن أنو الحفنة مو طايفة ولا مذهب…مشان ما حدا يخلط بين الحفنة والحنفية…وبما انو صارت وصارت ،اسمحولي وباسم الجماعة الحنفية بسورية أني استنكر قطع المي عن درعا…ونقلاً عن صديقة حورانية حنفية متلي،قطع المي ما رح يفيد،والحوارنة رح يشخوا عليكن برغم العطش…

اسمحولي بقا فوت بالموضوع من أوسع أبوابو…كلياتنا منعرف أنو رأس الدولة سبحانه قال بخطابه العزيز: “ليس هناك نظرية مؤامرة،وإنما هناك مؤامرة”

هلأ أنا صارلي فترة عم حاول اجمع خيوط هالمؤامرة مشان اعمل منها لباس وأهديه لسيادتو…يعني مشان نستر عورة هالنظام..بس المشكلة عم ينقصني خيط،والخيط اللي عم ينقصني هو خيط أساسي ومحوري وبدونو لا يصح اللباس -واللي هو سترينغ حقيقة-ولا تقوم له قائمة…لكن اليوم الصبح وبعد ما صفيت نيتي المندسة وقريت المنطلقات النظرية للحزب على نية التوفيق،فتحت هالحاسوب…فتحت نافذة جديدة ودخلت باصبعتي اليمين ع الويكيبيديا… (كبيس هون)

وعينكن ما تشوف إلا الخيط…

وهون بلشت اربط خيوط المؤامرة مع بعضا…للوصول إلى السترينغ العربي الاشتراكي الموحد (يعني فينا نحط فيه طيز مبارك وبن علي وباقي الحكام العرب وذلك حسب المفهوم القومي للاشتراكية)،بس ازا مناخد قوانين الفيزياء بالاعتبار،منشوف أن خادم الحرمين الشريفين يستثنى من القاعدة…فيزيائياً ما بتوسع…

ومالكن بالطويل…بلشت اربط بها الخيطان…

الخيط الأول: خادم الحرمين الشريفين،وطبعاً معو كل حكام الخليج يلي ما قدر السترينغ الاشتراكي الموحد يستوعب فخامات اطيازن وهاد كان سبب حقدون على قلعة الصمود والتصدي…بس تاري مو هاد هو السبب الحقيقي،وإنما يعود ارتباط الخيط الأول بالمؤامرة لارتباط الخيط التاني…الشيخ سعد الحريري..الصبي المدلل التابع للخيط الاول…

الخيط الثاني : الشيخ سعد الحريري(الرجل ذو الحدوة الذهبية)…هاد الزلمة مدوّد من شي اسمو سورية،ومستعد يدفع كل شي خلفلو ياه المرحوم ذو النعل الذهبي كرمال أنو يسقط النظام السوري،بس أنا بشوف انو ابو السعود “مغرر به”وأمريكا ضحكت عليه وقالولو سورية قتلت أبوك،هون منوصل للخيط التالت…

الخيط التالت :امريكا…طبعاً الكل بيعرف ليش أمريكا متآمرة على سورية…ما في داعي نعدد الاسباب الاقتصادية والجغرافية والشخصية…تخيلوا انو أوباما كان بدو يشتري بيت بالمالكي بس مرتو قالتلو بلا جدبة بحق البيت بتشتري بناية بواشنطن بتستر على هالحريمات،هلأ هو حربوء كان بدو يسكن بالمالكي فكرو يجوز بناتو لشباب شوام…بتعرفو الشب الشامي مرغوب وين ما كان،بس بالنهاية إن كيدهن عظيم….خاصة السيدة الأولى (أم عمامة)…فالزلمة قرر يسقط النظام بسورية ويحتلا مشان يشفطلو شي بيت بالمالكي بدون ما يحط من جيبتو،ولها الغاية كان عم يتذرع بالإرهابيين وأنو سورية بتدعم الإرهاب..واللي هو حقيقة الخيط الرابع.

الخيط الرابع: ويتمثل بالإرهابيين وزعيمهم الامير السلفي عجل الله فرجه،مبدأياً في معلومات موثقة انو الأمير جاية ع درعا وصار بنص نفق درعا والمكسيك ….وجايب معو صناديق تكيلا مشان يساويهن مولوتوف (ازا هاليومين شفتوا شي ارهابي عم يعترف ع قناة الدنيا وقدامو كم بطحة تكيلا لا تستغربوا،هدول مولوتوف)…هلأ أكيد هدول السلفيين بدون يقلبوا الحكم..لانن من شي 30 سنة حاقدين ع النظام من تحت راس القائد رفعت الأسد يلي طلع ارهابي أكتر منن…واللي هو الخيط رقم 5

الخيط الخامس: رفعت الأسد..هاد الزلمة ركن أساسي من أركان المؤامرة…فيكن تقولو أنو بيشكل الخطوط الخلفية أو الخيوط الخلفية…لأنو عم يشتغل ع مهلو من 20 سنة تقريباً…رفعت كان الو عز بزمناتو وفيكن تقولوا كان ناطور المزرعة الكبيرة اللي اسمها سورية…بيقطف من الكرم اللي بدو ياه،بيزرع شعارات بيحصد مصاري متل كتير عالم بهديك الفترة التاريخية…بس كبر راسو بها الزمانات..وفكر يعمل ضرب وطاوة بصاحب المزرعة وفشل…ومن وقتها خلعوه لبطة جابوه باسبانيا،طبعاً انلبط معو بالغلط كل شي عملة صعبة بالبنك المركزي…فدا صرماية صاحب المزرعة…هاد الشي فتح عيون واحد تاني انو يستولي ع الحكم،مع انو سرق بما فيه الكفاية…بس البني آدم طماع،وهون بلش عبد الحليم خدام يفكر كيف بدو يبلع المزرعة بعد ما طار رفعت،وشجعو ع هالشي أنو القائد الخالد كان مريض وابنو باسل الوريث الشرعي للمزرعة “استشهد”بحادث دبابة وهو رايح يحرر الجولان…أنو مالكن مصدقين؟؟اسألوا الكومجي اللي عيرلو دواليب الدبابة قبل الحادثة…المهم بعد هالاستطراد منرجع للخيط رقم 6

الخيط السادس: عبد الحليم خدام…متل ما حكينا هاد الزلمة طمع،وصار بدو يبلع البيضات والتأشيرات…لكنه فشل ببلع البيضات،وربح جائزة ترضية عبارة عن “تأشيرة” ع فرنسا…ومن هنيك صدق حالو وصار بدو يعمل معارضة مستفيدا من علاقتو الشخصية مع جاك شيراك والنظام الفرنسي…اللي هو الخيط رقم 7

الخيط السابع: النظام الفرنسي السابق والحالي…واللي هو نظام استعماري امبريالي لا يقل حقارة وتآمراً عن نظيرو الأمريكي…بس نفوذو أقل بما أنو الفرنساوية ما بيتحمموا وريحتن طالعة،هاد الشي بيأثر على علاقاتن الخارجية وخاصة مع جيرانن وبيضعف موقفون…حتى إعلامن ريحتو طالعة..مؤامرة طبعاً،وخصوصا قناة فرانس 24..اللي هي الخيط 8

الخيط الثامن: القناة الفرنسية فرانس فانت كاتر..يلي روح قلبها تزتزع استقرار بلد الامن والامان وتستضيف معارضين شي بروس وشي بلا روس…طبعاً هي خيط أساسي…بس في خيط امتن وأهم هو الفضائيات العربية،وعلى راسا الجزيرة اللي هي الخيط رقم 9

الخيط التاسع: الجزيرة الخنزيرة (بتذكرني هالكلمة بالمرحوم حافظ..مو لسبب بس لأنو بعهده انتشرت المرسيدس خنزيرة..وتمساحة والذي منو)…منرجع للجزيرة اللي هي قناة صب الزيت على كراسي الحكام…يعني صارت مزحلقة 2 وفي 2 ع الطريق اللي هنن تبع اليمن والقذافي…أما سورية فعلى ما يبدو ما زال عندها مناعة من الزيت ومختلف أنواع المزلقات الأخرى كالفازلين…ومشكلة الجزيرة انو بتزحلق الحكام مع انو بتغطي الثورات بطرق غير شرعية…يعني تقريباً كل اعتمادها ع الانترنت وتحديداً صفحات الفيسبوك…يلي هو خيط مهم جداً،يعني فيكن تقولوا كابتن خيط ولذلك رح نعطيه الرقم 10

الخيط العاشر: الفيسبوك…هاد الاختراع الصهيوني البدعة (اللي حرمه الازهر أثناء ثورة مصر) مضيعة الوقت ومضيعة الحكام التاريخيين…هاد الاختراع هو اصل البلاوي…طبعاً انا بشوف موقع المندسة أخطر من الفيسبوك بس ما علينا…ما بدي ابخش موضوعيتي بآخر المقال،على المستوى العربي ما زال الفيسبوك يتفوق على المندسة…بس الفيسبوك مشكلتو معلوماتو متضاربة وما فيه قاعدة بيانات متل الخلق يعني صفحة الثوار بتحكي ثورة وصفحة منحبك بتحكي منحبك…فهو سلاح ذو حدين…لذلك ما فينا نعتبر أنو الفيسبوك هو أصل الثورة وهو الخيط الأساسي فيها..لأنو الخيط الأساسي بأي ثورة لازم يستند على قاعدة بيانات موحدة ولو كانت قابلة للتعديل من مختلف الاطراف،بالعكس هذا الشي بيعطي البيانات مصداقية خاصة….وهذا الشيء هو بالضبط ما يتوفر في موقع ويكيبيديا…اللي رح يكون الخيط رقم 11

الخيط الحادي عشر: ويكيبيديا…صفحة محجوبة في سورية من حوالي السنة…شكلو النظام كان شامم ريحة المؤامرة من هالموقع من زمان…نظامنا انفو لا يخطئ،بكل بساطة لأنو كلب…ومشان هيك ولأنو ما عندي حاسة الشم الكلبية تبع نظامنا التقدمي…اضطريت اوصل 11 خيط لحتى اوصل لها النقطة…بس مالي زعلان أبداً…ويكيبيديا هي أصل المؤامرة…هي أصل خراب بلدنا،ويكيبيديا قالت للحرامي اسرق..وقالت لفروع المخابرات ربوا ولاد المدارس ع طريقتكن..

ويكيبيديا اعتقلت 10 تالاف سوري…

وقتلت 1000..

ويكيبيديا عم تقنص الأفكار من روس الناس

ويكيبيديا….مسحت درعا وفايته تمسح بانياس

ويكيبيديا ورا الجماعات المسلحة…والسلفية

ويكيبيديا….علمت الشعب المازوخي شو يعني حرية

فيني قول أنو هلأ أتممتلكن هالسترينغ…استري عورتك سورية…

استري شهداءك

وجلاديك

واستري كلمات الحالمين بالحرية…تحت جنازير الدبابات

وزعي أوسمة الحرية طلقاتٍ في صدور شبابك سورية

أيتها الأم العاهرة…

يا من توزعين على أبنائك تهم الخيانة…كما توزع اشبيلية على زوارها رائحة الياسمين

اشتميني سورية…

والعني قلمي

واهدري دمي

لا يهم

لم أعد أنتمي

لم أعد أنتمي…

752011