-هالثورة مش عم تمشي…بدها حدا يدفشها دفشي
– لك أبي منو قلك مش عم تمشي؟
– يا اخي من 3 اسابيع ما في تقدم بأعداد المظاهرات وما صار اعتصام بالشام
– طيب مالك شايف أنو القبضة الأمنية وصلت معون للماكس؟ أنو الآر بي إم شيت الدولة رح يطق…وطلعت ريحة المحرك لعند الرفيق الأعلى؟وقريبا طالعة روح المحرك لعند الرفيق الأعلى انشالله…
يعني بالعربي حاليا هنن ركبانين أعلى ما بخيلون…في شي أعلى من الدبابة بينركب معون؟أنو في خازوق ما اختلفنا بس هاد لسا ما صار وقتو…
-طيب ليش مو كل المحافظات عم تطلع؟
– لك أبي شو ما عملنا ما منخلص منكن…يعني ضليتوا تتحججوا بحلب لحتى هالاسبوع حلب طلعت الفرق،ومو بس بالمدينة الجامعية…طلعت كزا مظاهرة جوات حلب
قلتوا دعاية النظام الطائفية انطلت ع الاقليات…وليكا ضيع مسيحية عم تطلع مظاهرات عن بكرة أبيها،وسلمية طلعت كلا…أنو ع شوي رح يطلع الماغوط من قبرو مظاهرة،وبيني وبينك في مين سمعو عم يزلغط بقبرو…وبنفس الوقت كان عم يسب ع الجحش اللي عملو بني آدم،هلأ مين هاد الجحش اللي عملو الماغوط بني آدم ما بعرف!
– بس يا أخي لازم المظاهرات السلمية تزيد بقا يعني مو معقول تضل القصة بدرعا وبانياس وحمص ودير الزور وريف دمشق وجبلة واللادقية وسلمية…
-طيب بكرة بطالعلك مظاهرة بطاريق بالقطب الشمالي…على عيني
-شو عم تتمسخر؟ هالثورة ماشية بآلية سلحفاتية…
-مزبووووووط…انت عيني وهلأ بلشت تفهم،المواطن السوري من لمى يوعى ع الدنيا،وقبل ما يصير رفيق طليعي ويستعد دائماً،وقبل ما يتعلم يفك البارودة التشيكية نصف الآلية عيار 7,62…وقبل ما يتعلم كل هالشغلات الأساسية بالحياة،أول شغلة بيتعلما هي قصة الأرنب والزلحفة…وأنو الزلحفة هي اللي سبقت
يعني بشرفك…شعب كلو سلاحف مو أحسن من شعب كلو أرانب؟؟؟؟
– والله بلشت تقنعني انت…يعني الشعب عامل خطة انو تكون الثورة زلحفة؟
– خطة وبس؟ بلشت القصة من لما انعمل هاد الفيديو
يعني هاد الفيديو هو اللي خوف الناس من أسلوب الأرنب،وتم الاتفاق على اتباع طريقة الزلحفة
-طيب فيك تشرحلي خطة الزلحفة كيف؟أنو سلاحف الثورة كيف رح تتعامل مع هالنظام؟
– هلأ شوف،هي الخطة كانت سرية على ما يبدو تسربت…ولكن أنا كنت خايف انشرها ع موقع المندسة تقوم تحمر العين عليه ويتهكر،بس بما أنو تهكر ومشي الحال..ما عاد في خوف…
الزلحفة عندا سبات شتوي،وبتفيق بالربيع متل ما كلنا منعرف،السنة فاقت الزلحفة قبل موعدها باسبوع،يعني بنص آدار،وبليلة من آدار مدري شو اللي صار…أجا القصف القصف اللي هبط البيت البيت اللي فيو الكميرا الكميرا اللي صورت الجيش الجيش اللي اقتحم درعا درعا اللي اتحدّت الأمن الأمن اللي اعتقل قرقور وقرقور الكان صغيور…ولما تعلم يقرا ويكتب قلعولوا اضافيرو بالفرع…
منرجع للزلحفة بينما يطولوا اضافير قرقور لأنو رح يعتازون قريباً…
-أنا سمعت رفقاتي بالجامعة عم يقولوا انو بدون يجمعوا سلاحف…في شب بلش يعملها بضيعتو وعم يلونوا الزلحفة بالعلم السوري ويكتبوا عليها حرية ويبعتوها…صاروا عاملين شي 20 وحدة يمكن هي الخطة تبع الزلحفة؟؟؟
– يخرب بيتك والله تاريك جحش من تحت تبن!! عظيمة هي تبع الزلحفة لازم تتعمم خصوصي انو عندنا كمية زلاحف رهيبة بسورية،لازم ينزلوا الزلاحف ع الشام يكتبوا عليهن حرية ويفلتوهن…وخلي المخابرات الجوية تلقط زلاحف..
– شو دخل المخابرات الجوية بالزلاحف؟؟؟
– لك بدي ضل عم علمك أنا؟؟خود طس هي الصورة بتعرف
– طيب صرلك ساعة ما عم ترضى تقلي خطة الزلحفة تبعك…
-حبيبي ما فيها شي الخطة بسيطة كتير،وفي فيديو بيشرحلك كيفية تنفيذ خطة الزلحفة،لا تعطيه لحدا!! الفيديو بأيد الغشيم بيفضح…يوضح هاد الفيديو كيف لازم تتعامل سلاحف الثورة مع النظام
– اي بس ممكن أنو كل هالـ…. ما بيحبّل!!
– يلعن سلّافك روح اقعدلك بنص *** الزلحفة لأعرف إزا بيحبّل لما لأ؟؟؟حل عن طيزنا ياه والله أبو نظير فيه مخ أكتر منك…
1952011
