عشرات البراهين على أن بشار حق -الجزء الثالث-

برهان اللواء زعوري:
1-العرعور طبجي ولاد.
2-ومنه نستنتج أن بشار حق.

البرهان الكوميدي:
1-ههههههههههههههه!
2-كشفناكن موووووووووووو؟!
3-ومنه نستنتج أن بشار حق.

برهان بسام القاضي:
1-عندي سؤال للمتظاهرين.
2-[سؤال]
3-جوابك غلط.
4-ومنه نستنتج أن بشار حق.

البرهان من الممانعة (أو البرهان من ولدنة الحرام)ـ:
1-اسرائيل دولة بنت حرام.
2-كل فصل نائص بتعملو بدّو حلم الله.
3-ومنه نستنتج أن بشار حق.

البرهان من التعددية:
1-عندي عشرات البراهين على أن بشار حق.
2-إلا ما تكون وحدة منن صح.
3-ومنه نستنتج أن بشار حق.

البرهان من الأعجوبة العسكرية:
1-اجت البارجة الالمانية ع بانياس يا شباب ويلي تعد أحدث القطع الإلكترونية لدى حلف الأطلسي.
2-ومنه نستنتج أن الألامان بيحكو ألاماني.
3-إيضاً, بشار حق.

البرهان السقراطي:
1-كل إنسان فان.
2-سقراط إنسان.
3-إذاً سقراط فان.
4-بشار مانو سقراط.
5-ومنه نستنتج أن بشار حق.

البرهان الديكارتي:
1-أنا طاغية.
2-إذاً أنا موجود.
3-كوغيتو ايرغو طز.
4-ومنه نستنتج أن بشار حق.

البرهان من العمى السياسي:
1-هدول المتظاهرين والغوغائيين يلي عم يطالبو بالحريّة لا يفقهون شيء بالسياسة.
2-العين تطرئن أصلاً شو يعني “اسقاط نظام” ما بيعرفوا.
3-ومنه نستنتج أن بشار حق.

البرهان من الحيادية:
1-أنا شخص محايد. وكشخص محايد عندي بعض الاستنتاجات المحايدة. وبأكّدلك انو استنتاجاتي المحايدة قمّة بالحياد. وفينك تسأل عندي رفقات كتير منحبّكجية ورفقات كتير مندسّين لذلك ما فينك تتهمني بحياديتي أبداّ.
2-بس بشار حق.

البرهان من البلاغة اللغوية:
1-** اختكون ع اخت الحريّة!
2-ومنه نستنتج أن بشار حق.

البرهان من الاسترقاق:
1-المواطن ما ب يوجّه ملاحظات وأوامر للرئيس.
2-فهمان ولك حيوان؟
3-ومنه نستنتج أن بشار حق.

البرهان من الحماس المفرط:
1-شايفو لهاد يلي عم يرقصيدبكيزمّريهتفيجعّريغنّييلطميتشحتف ل سيادتو؟
2-هيك حب الوطن وحب القائد بيتمثّلو وبيتجلّو بصدق, يا جحش.
3-ومنه نستنتج أن بشار حق.

برهان المدام:
1-لك تئبر ئلبي أسماء ما أحلاها!
2-شفتلّي هالأناقة وهالبسمة الأكابرليّة؟
3-لك حتّى مجلّة Vogue عملت معا مقابلة.
4-♥
5-ومنه نستنتج أن بشار حق.

البرهان من النظرات:
1-هكذا تنظر الأسود.
2-نظرتك ترعبهم.
3-إن تكون سورياً يعني أن تكون في البر درفيلاً وفي البحر جمبريّاً وفي الجو بطريقاً.
4-ومنه نستنتج أن بشار حق.

البرهان من الحساسية:
1-بشار حق.
2-[حجّة إندساسية مضادّة]
3-ما بسمحلك! إيّا تشكيك بأن بشار حق هو إهانة شخصيّة إلي.
4-[طمزة]
5-ومنه نستنتج أن بشار حق.

البرهان الطبقي:
1-ياااي, شفتلّي هالمتزاهرين شو فولغير ومشحورين؟
2-لأ, أنا طلبت الموكاتشينو مع سكيمد ميلك. رجعلي ياها, هي كليرلي مش فات-فري.
3-ومنه نستنتج أن بشار حق.

البرهان من الخسائر البشريّة:
1-يعني هادا رجل الأمنالمخابراتالجيششبّيح كيف مات؟
2-تفركش ووقع ع الرصاصة يعني؟
3-ومنه نستنتج أن بشار حق.

البرهان من الانهاك (ملخّص)ـ:
1-بتخيّل فينا نتّفق انا ويّاك ع الأطروحة البديهيّة (س), صح؟
2-مندس: أكيد.
3-طب شو رأيك بالأطروحة المعدّلة شوي (سَ). كمان مزبوطة, صح؟
4-مندس: أمممم, لأ مو بالضرورة لأن—
5-عال, بما انّو اتفقنا, شو رأيك بالأطروحة المعدلة فرتوكة زيادة (سً). أطروحة فخمة هي, مزبوط؟
6-مندس: لأ! وبالمناسبة ما وافقت على (سَ)!
7-ممتاز. بما انو هالأطروحات صحيحة, أكيد ح توافقني أنو الأطروحة (ع) صحيحة أيضاً, ما هيك؟
8-لأ يا أخي! ولحد هلئ ما وافقت معك على شي غير ع (س). لوين آخدني ب هالسيرة أساساً؟
9-عظيم!
…
…
34-لحد هلّئ استخدمنا الأطروحات (س), (سَ), (سً), (ع), (عَ), (عً), (ص), (صَ), (صً) لنوصل لبناء الأطروحة السليمة حتماً (د). في شي غلط هاد الكلام؟
35-مندس: لك ايه ايه في شي غلط هاد الكلام. من وقت (س) ما حكيت كلمة صح. لوين بدّك توصل أصلاً كرمالو ل الحلزون؟
…
…
85-ومنه نستنتج أن كل من الأطروحات (ك), (كَ), (كً) صحيحة ومفزورة صحّة كمان. معي انت؟
86-لك يحمّو ل ئلبك شو تيس. باستثناء (س) ولا كلمة قلتا صح. لوين بدّك توصل فزرتو ل ئلبي!
…
…
123-(ي), (يَ), (يً)…
124-[المندس يموت متأثراً بجراحه]
125-ومنه نستنتج أن بشار حق.

البرهان من الانهاك البصري (ملخّص)ـ:
1-انظر أيّها المندس الأحمق, اقدّم لك البرهان الذي لا جدال فيه ولا ريب على أن بشار حق:
2-[نص طويل كتير كتير وما في ولا نقطة وولا فاصلة وولا سطر فراغ كل كلمة بطيز الكلمة التانبة الله وكيلك شي بيعمي عمي إلي 6 ساعات عم حاول فكفك بطلاسمو انحولو عيوني وانكسر ضهري ودمّلو رجليي وأنا عم حاول افهم شو بدّو هاد بس عبس فالج لا تعالج تئول مو معلمينو أدوات التنقيط بالمدرسة لأ والأنكى من كتر مو طويل بدّو 4 ذهابجة عربي يتناوبو عليه 5 ورديّات بس لحتى يزبطوه نحويّاً ولغويّاً ونقطيّاً انو العمى ضربو للجحش بموت الزلمة إذا حطّلو شي فاصلة أو نقطة أو سطر فراغ لك ياخد نفس كرمال الواوي لعمى والله شي بحط العئل بالكف تئول عم يدفع حق النقطة أو الفاصلة مصاري خزيت العين نبعة كلمات نبعة كلمات بدون توقّف أو استراحة ايه شو العمى تئول قطار بخاري لك حتى القطار بوئّف ع الاستراحة ولو الشغلة بعدد الكلمات كانت مجلدات تان تان بتاخد الدهبيّة لك ويا سيدي يحط مجلدات تان تان كلّا ما عندي مانع بس انو يعني يطأمشلي هالنص شوي ريتا العين تطرئو تقول صار معو اسهال لغوي حاد وانبحت ومبئا يعرف يتلملم لسّا بيطلع من حارة بفوتني بزاروب بس بسيطة وين بدّو يروح من الله…]
3-ومنه نستنتج أن بشار حق.

ولسّا…
<مانا ضربة اللازمة, بس إذا بدّك فينك تشوف الجزء الأول من سلسة براهين   <هون.
<والجزء التاني   <هون.

وصلة قصيرة   http://wp.me/p1zAl3-ii

.