على سيرة اسقاط النظام…

عبدالأول السقا
——————–

على سيرة اسقاط النظام…
ياترى كيف بدو يسقط النظام؟!!
وليش لازم يسقط النظام؟!!
ومن وين بدنا نجيب نظام بديل؟!!
اسئلة راودتني كتير ولهلأ كل يوم بكتشف اجوبة وبلغي اجوبة كنت اكتشفتها قبل..!
يمكن كل واحد عندو رؤية معينة واجوبة مختلفة لهالاسئلة…
شي بدو يسقط النطام بالمظاهرات
وشي بدو يسقطو بالاضراب
وشي بدو منطقة عازلة لحماية وتأمين المنشقين
وشي عم يدعي انو تصير معجزة ويتقاتل النظام مع بعضو
وشي عم يحلم انو بشار يفهم بقا ويتنحى او يهرب لعند صحابو
وسيناريوهات كتيرة واحلام كبيرة وتصورات منها خيالي ومنها واقعي
احسن شي لازم نعملو انو بعد هالتسعة اشهر والستة الاف شهيد ما نيأس… ونضل عم نحلم ونتخيل ونجرب ونأضرب ونتظاهر وندعي ونصلي وننشق ونقول كلمة الحق ونترحم عالشهدا… كل هدول مو عيب انو نشتغل علين… كملو شغل يا جيل الحرية نحنا وبإذن الله كلنا شو ماكانت طريقتنا عم نشتغل صح… لا تيأسو كل واحد مننا الو دورو والو طريقو يللي اختارو ونحنا كلنا اخترنا طريق الحرية بس يمكن وسيلة الوصول مختلفة من واحد للتاني…
حبايبي جيل الحرية… بفتخر اني منكن وبفتخر انو نحنا الجيل يللي ما رح نعمل متل ما عملو اباءنا وتركونا نعيش تحت رحمة الظلام و رسخو بعقولنا كلمة ” مادخلنا” نحنا رح نعلم ولادنا انو ” دخلنا” لانو هاي بلدنا و السوريين كلن اهلنا، رح نعلم ولادنا يقولو لا للظالم اذا ظلم ، و نرسخ بعقولن انو سورية للشعب السوري مو لاشخاص وعيلة ونظام…
شكرا للثورة يللي بتستحق كلمة “ثورة”
وشكرا ليللي مارضي وماسكت عن الظلم، شكرا لاطفال درعا وحمص وحماه وشكرا اخيرة للقيادة ” الحكيمة” يللي من غبائها نستمد بعضاً من قوتنا …