حابين نذكركن بأمر هام جداً للأسف عم نوقع فيه من فترة منيحة.
لكن التذكير منيح و مفيد بأغلب الأحيان.
كتير من شبابنا و بناتنا و كبارنا و صغارنا عم تطالن ايد الغدر من النظام السوري الظالم
وعم يعتقلوا ، وبتتعدد طرق الإعتقال و ظروفها.
في أصدقاء و أهل عم يعتقلوا من بيوتهن من بين اهلن ، وفي أصدقاء عم تعتقل من مظاهرة أو من اجتماع او حتى بكمين خارج المنزل او مكان السكن.
الي عم يصير عالانترنت ، انو الناس من خوفها و زعلها و شدة الأسى عم تروح و تتكل على الله و تعمل شي اسمو صفحة عالفيسبوك للمعتقل ، وتسميها باسمو مع كم كلمة “كلنا فلن او فلانة”.
وتبحت و تنشر هالصفحة …عسى انو يخف عن صديقن او قريبن الي اعتقلوه الوضع داخل المعتقل.
في شوية نصائح لازم ندير بالنا منها وللضرورة.
1-الشخص المعتقل مابيجوز بأي شكل من الأشكال انو نعملوا صفحة من أول يوم أو تنين اعتقلوه فيهن ، لأنو ممكن يكون موضوعوا بسيط و يطلع بهاليومين لهيك مافي داعي نكبر القصة فوراً.
2-مابيصير بأي شكل من الأشكال نعمل صفحة لصديق بدون أخذ اذن ذوي المعتقل المباشرين..امو أبوه عيلتو…لأنو هنن بيكونوا عم يتابعوا موضوعو، وين راح،شو التهمة،شو القضية. ان وافقوا..فهنن أدرى بمصلحتو ساعتها ، ان ماوافقوا..يجب اغلاق أي صفحة تفتح بالمستقبل.
3-الصفحة لدعم المعتقل ، مشان نعرف العالم انو فلان معتقل ولا حدا يتواصل مع اي حساب الو عالنت لأنو وارد يكون الأمن فايت منو..لهيك:
أ-لايجوز بأي شكل من الأشكال ذكر أي معلومة خاصة عن الشخص المعتقل كنشاطو الثوري أو الانساني ، أو وين اعتقلوه أو شو كان عم يعمل أو شو منحب فيه من صفات…الخ
ب-مابيصير حدا يفوت عالصفحة و يلعن و يسب الأمن والنظام لأنو منكون خدمناه لصاحبنا جوا بالتحقيق والمحقق رح يحاسبو عن كل كلمة وهو عم يشوف و يتابع معكن.
ج-الأصدقاء الناشطين يكونوا واثقين انو الأمن عم يتابع الصفحة ، ورح يشوف الأسامي ويحاول يوصل لمعلومات عنها وقد يربط الاسم الي كاتب بصفحة المعتقل..بالمعتقل و يحاول ينزع منو اي معلومة بالضرب والتعذيب..حتى لو ماكان بيعرفو.
4-الأفضل من الصفحة هو توجيه اسم المعتقل و تاريخ اعتقالو و ظروف الاعتقال للمنظمات الانسانية ، بشكل سري.
لا تنسو اخوتكن جميعاً من الدعاء دائماً والله يفك أسر الجميع يارب.
