مهما كنت دقيقاً في الشرح فلن استطيع اعطاء التجربة حقها في الوصف
وأيا كان من يقرأ فلن يستطيع تخيل صعوبة الوضع فالأمر جد مؤلم
17\3\2012
كنت راجع من الاردن مع زوجتي واولادي بعد زيارة دامت لاسبوع
طلعنا من الحدود الاردنية الى الحدود السورية
حديثا في جميع مداخل سوريا اول من تقابل مفرزة المخابرات الجوية دخولا كان او خروج
اعطيت الجوازات لعنصر المخابرات الجالس خلف الكمبيوتر مشان التفييش
جوازي وجواز مرتي وجوازات تلات اطفال
لما دق الفيش تبعي صفن العنصر صفنة بتخوف
قلتلو في شي قاللي لاء قلتلو قبل ماتساوي شي بس اتطلع بالسيارة في مرتي وتلات اطفال لا تبهدلني الله يسترك برجع بالسيارة مترين بس لورا وبصير بالاردن
قللي مافي شي بس تعال لنشوف هالشب راح نادى لعنصر تاني وصار يتوشوش معو يللي سمعتو من الحديث انو هو مرتو واولادو بالسيارة
من وقت صفن هالعنصر هو وعم يفيش الجواز صارت كل الالوان يللي عم شوفا سودا وتذكرت كل مقاطع فيديو التعذيب للمعتقلين على ايدي الشبيحةيللي شفتا
بتحس كانو وقفت الدنيا و بلشت النهاية
اليوم
ركب العنصر التاني جنبي بالسيارة وقللي بدنا نروح عالمفرزة عم قللو شو في قالي شغلة بسيطة يمكن تشابه اسماء
طبعا بهيك حالة بتحب تصدق كل شي ممكن يخايك تتفائل
نزلنا انا والعنصر من السيارة واخد موبايلي والجواز وفتنا عالمفرزة
فات على غرفة وضليت انا واقف عالباب عم بنتظر شو بدو يصير بعد شي ساعتين طلع من الباب قلتلو شوفي قالي عم زبطلك الوضع شغلتك بسيطة قلتلو خليني بس روح سكر شبابيك السيارة الدنيا برد مشان مرتي والاولاد او خليني بس امنن بسيارة عالبيت بس مارضي ولا بايا طريقة
بعد شي ساعة نادوني عالغرفة وراح العنصر وبقينا انا وواحد مابعرف شو شغلتو
خلاني دير وشي عالحيط وكانو كان عم يتاكد للمرة الاخيرة من هويتي او ما بعرف شو بس فجاة وقف وقللي هات كلشي معاك اغراض وجاب الحزامات البلاستيك وحاول يربطلي ايدي مابعرف ليش ماكانت توزبط معو الربطة
قام نادى لعنصر وقللو حطو بالنظارة
بكل معنى الكلمة كل دقيقة عم تمرق بتحسا دهر
شو صار بمرتي واولادي ليش مسكوني شو بدو يصير فيني قديش بدي اتعزب ممكن اطلع للحياة مرة تانية ياترى رح شوف امي
بعد ما ودعتا بالاردن قبل ما اطلع صارت تبكي كانا كانت عرفانة ش بدو يصير
شو بدو يصير فيها بس تعرف اني انمسكت
كل هالاسئلة كنت اسالا لحالي بكل دقيقة
بالنظارة كان في شب حمصي سنة اولى طب اسنان جاي من السعودية وانمسك لانو جايب معو مصاري كتير امنات من سوريين بالسعودية لاهلن بسوريا كان كافي هالذنب انن يعتقلوا ويعذبوا
من حسن حظي انو النظارة كانت ملانة مصادرات وحطونا بغرفة فاضية وكانت شوي شوي عم تتعبا مصادرات فرشات بطانيات ادوية تمر بسكوت يعني اشكال الوان كل فترة كان يدخل علينا ضابط او مساعد او عنصر ويسال كل واحد انت شو قصتك وانت شو قصتك انا مابعرف شو قصتي وكنت قلن بس خبروني شو قصتي خبروني شو صار مع عيلتي ……. لا جواب
رابع يوم نحنا لهلأ بالنظارة تبع المخابرات الجوية عالحدود بدرعا
فتحو الباب ونادونا انا والحمصي وكلبشونا ورفعوا كنزاتنا من عند الضهر وغطوا وجوهنا فيها قلتلن بس خلوني اطمن على عيلتي شو صار فيهن قال لا تخاف امناهن بسيارة عالبيت شو مفكرنا يهود !!!!!!!!
شدوا الكلبشات البلاستيك على ايدي بطريقة غريبة لدرجة انو الوجع لليوم مأثر على ايدي
ركبنا بالسيارة مكلبشين ومطمشين ومن درعا لمطار المزة نزلوا الحمصي ( شب متل الوردة الله يحميك وين ما كنت )
وانطلقنا الى حرستا فرع المخابرات الجوية ذائع الصيت
سلموني للعناصر يللي جوا وراحو
فكو الكلبشات ونزلولي الكنزة وبلشوا يسالوني عن اسمي وهالقصص اجا واحد مسك التقرير مع يللي كان عم يسالني وصار يقرا فيه اي ها يا هيك الشغل يا بلا
تبسمت لاني مالي عرفان شو القصة يللي كان ماسك التقرير بالاول قال للتاني هاد توصاية من معلمنا القديم اجا واحد تالت قاللي عم تعمل مراجل ولاك … وطاخ
كانت اول ضربة باكلا ……… شو الحل كيف بدي رد بهالحالة قد ما حاولت تواسي حالك انو انضربت بموقف غير عادل بيضل الوجع عم يحفر بالصميم
خلصوا اجراءات الاستلام ونادو عنصر وقالولو خدو عالاولى
الاولى اجا هالاسم بالصدفة ولا لانا الاولى بالعذاب ولا الاولى بشو مابعرف
لما كنا جايين من درعا كان في شوية فرح جواتي او كنت عم واسي حالي مابعرف بس كنت عم قول انو محل ما عم ياخدوني اكيد رح التقي بناس لازم يكونو صفوة المجتمع ثوار مفكرين اقلام حرة ابطال مسعفين اطباء ميدانيين صحفيين ورح نعمل شغل كتير حلو للثورة بعد ما نطلع ازا ضلينا عايشين
كان حلم
الجماعية الاولى بفرع المخابرات الجوية بحرستا عبارة عن غرفة 3.5*3 متر فيها تواليت وحمام من ضمن هي الغرفة بطول مترين وعرض متر
يا جماعة الحكي مو متل الشوف كنا 54 شخص جوات هالغرفة 11 منن موجودين دائما بالحمام بياكلو وبيشربوا وبينامو وبيستقبلو يللي جاي يقضي حاجتو وهن جوا
اول ماتدخل الجماعية لازم تشلح كل الاواعي وتقعد بالداخلي لانو الشوب لا يحتمل ولانو يللي حواليك ما بيحتملو
تمديدات الصرف الصحي كانت دائما عم تنقط علينا ومع الرطوبة العالية بالجو والمي يللي دائما بالارض مع شدة التصاق الناس ببعض لما حدا يتحرك يمين او يسار بتسمع عالاقل تأوه اربع او خمس اشخاص من الوجع الجلد بيتسلخ والشعر بيتنتف واللحم بيتفزر بس لمجرد حدا يحرك حالو
كان في ناس قاعدة عالارض وكتير ناس واقفة وكتير ناس واقفة على رجل وحدة
على رجل وحدة مو تعبير مجازي على رجل وحدة بكل معنى الكلمة لانو تحت الرجل التانية يا في حدا قاعد يا رجل حدا المهم مافي مكان للرجل التانية
المشوار من درعا لحرستا كان مرهق كتير مع الارهاق الفكري لاربع ايام مع وجع الكلبشات
اول مادخلت عالاولى قالولي الشباب شلاح بوطك وبنطلونك وكنزتك وخليك بالداخلي مشان الشوب
من كتر التعب قلتلن بس بدي 10 دقايق ارتاح لاني كتير تعبان
يتزكر اني فتحت عيوني لاقيت الشب يللي قعدني محلو عم يهويلي بالكنزة تبعو ما قدرت قللو شكرا من التعب رفعت ابهامي وفهم علي اني عم بشكرو
قعدت بالاولى 10 ايام
منن 5 ايام واقف على رجلتين ويومين على رجل وحدة
كنت بوعيي بس اول 10 دقايق لانو الضغط النفسي والعجقة و قلة الاكسجين مدري شو بيصير بالمخ بصير ياخد ويعطي يعني بيفصل الوقت الوحيد يللي كنت صحصح واعرف شو عم يصير وقت اطلع عالتحقيق يمكن لانو في اكسجين اكتر او لانو نحنا بالداخلي قاعدين والجو برا كتير برد او من الخوف طبعا هاد كللو خبروني في بعدين انا ما كنت واعي شو عم يصير كنت بس ارجع من التحقيق احكيلن شو سالوني وشو جاوبت وشو صار معي طول هالفترة انا مانمت ولا دقيقة ومع هيك كنت دائما عايش كابوس واتخيل شغلات وحس حالي باماكن غريبة وموحشة كابوس مخيف ومؤلم بشكل مستمر ويللي عرفتو كمان انو خلال هالفترة صار عددنا 65
65 ضمن مساحة 10.5 متر يعني بيطلع لكل واحد 16 سانتيمتر يسرح ويمرح على كيفو
كان في بالحيط فتحتين واحدة لسحب الهواء والتانية بتجيب هوا من برا
وكانو يقطعو علينا الكهربا
اوقات شي 3 ساعات وطبعا هدول الفتحتين يصيرو لا عمل لهما
بهاد الوقت النفس يللي بتصير تتنفسو بيحرق القصبات الهوائية ازا بتتنفس بتختنق وبتتوجع وازا بتحبس نفسك بتختنق وبتموت بس غريزة الحياة بتخليك تتنفس او لانو نحنا مو بوعينا والتنفس عملية لا ارادية منضل عم نتنفس
عم نستنا الموت لحظة بلحظة ما ضل اكسجين
والاسئلة ما بتطلع من راسك شو صار مع مرتي واولادي يا ترى امي عرفت اني انحبست ولا لسا
يمكن من رحمة رب العالمين انو الواحد يفقد عقلو بهيك حالة بس الكوابيس مافارقتني ولا لحظة
بعد 8 ايام بالجماعية الاولى استدعوني عالتحقيق
طبعا معصوب العينين و مكلبش اليدين بتعرف حالك عم تمرق من كوريدورات و تفوت من بواب وبرد شديد لانك شبه عاري وخوف خوف بينشف الدم بتعرف حالك اعم تتعامل مع ناس مجردين من ايا نوع من انواع الانسانية وشايفينك الشخص يللي بدو يحطم اصنامن ويكفر بآلهتن عدو بكل معنى الكلمة
اصوات الضرب والتعذيب ما بتتوقف على مدار الساعة ومعروف انو هي السياسة للتخويف و لتمزيق الحالة النفسية للمعتقلين
بالتحقيق عرفت انا ليش انمسكت ومين يللي كتب فيني التقرير
بعد ما قرا المحقق شو مكتوب (حسيت حالي اهم من اسامة بن لادن رحمة الله عليه ) قللي اي شو بتجاوب نفيت كل شي حكا وشرحتلو يللي كتب التقرير شوغايته من التقرير و ليش كتبو
وقلتلو انا فيني وطنية لهالبلد اكتر من كل الناس يللي بهالبلد
مابعرف ليش ماعاد خفت وقتا بس حسيت حالي عم قدم شي للثورة
قللو للسجان يللي طمشلي عيوني وربطلي ايدي وجابني لعندو
حطو عالدولاب خللي يعترف كتير كنت اسمع هالجملة بس ما توفعت اني يوم من الايام ممكن تصير معي
بتتسطع على ضهرك وبهي اللحظة حاول تستمتع لانك بتكون نسيان طعم هالتسطيحة المهم بتضب يعني كعابك بيدقو بقفاك بيدخلو الدولاب من الركبتين وبيحطو حدية بين الركبتين من ورا وبين الدولاب وبتصير عاجز عن الحركة بيقلبوك على بطنك بيصيرو رجليك لفوق وبيبلش الفلم
لما قلبوني مدري شو حكالو العنصر للمحقق قام المحقق قللو فكو ورخللي لبكرا الصبح بلكي الله بيهديه وبيعترف
ما عرفت ليش حسيت انو المحقق صدقني بس اكتشفت بعدين انو من كتر الوقفة والمي والجو الفاسد صار شكل حجم رجلي من الركبة ولتحت شي تلات اضعاف الحجم العادي ورجلي من تحت كانو مفزرين وشبه رح يبين العضم
رجعني عالاولى وحكيت للشباب شو صار معي هن قالولي انا ما عم اتذكر انو حكيت لحدا شي
سمعت حكي انو الدكتور قال ازا ما نام ورفع رجليه لفوق ما رح يطيب ماكنت عرفان انو الحكي عني بس بعد يومين طالعوني من الجماعية الاولى واخدوني عالتنفس
التنفس غرفة 6 * 12 متر تقريبا ما الا سقف والدنيا برد وانا شبه عاري
عالبرد والاكسجين صرت شوي ادرك شو عم يصير شوي مو كتير بس في حدا لبسني بنطلون بجامة وجاكيت و نمت على ضهري روفعت رجلي عالحيط
ضليت يومين على هالحالة بس بدون وعي وعم اتصرف واحكي بطريقة غريبة
بعد يومين استدعوني عالتحقيق مرة تانية نفس الظروف نفس الاسئلة نفس الاجوبة نفس الدولاب بس هالمرة ما توشوشو السجان والمحقق وبلش الضرب
كنت اسمع انو بس اول ضربة بتوجع بس طلع مو مزبوط هالحكي
كمية الوجع يللي بتحس فيها شي بيفوق الوصف والخيال لما تاكل الضربة التانية بتستغرب ليش ما متت من اول ضربة بالضربة التاتة بتكتشف انو الانسان بيتحمل ضرب اكتر من الحيوان بعد ش يعشر ضربات توشوشو المحقق والسجان ووقف الضرب وقللو رجعوا وخللي للصبح بلكي الله بيهديه وبيعترف
اكتشفت بعدين انو طلعو رجليي مو طيبانين منيح وعالضرب اتفزروا مرة تانية وكتير صار يطلع منن دم
التنفس مخصص لحتى يطالعو الناس عليه كم ساعة ويرجعوهن عالزنازين فما كان مجهز بحمام وتواليت
بس بهالفترة من شدة الاقبال عالمعتقلات السورية كنا شي 150 شخص مقيمين بالتنفس
كان الوضع مقرف بشكل كبير بلا ما نحكي فيه
من تاني تحقيق لتالت تحقيق ضليت 25 يوم ماحدا حكا معي شي
سالت واحد من الخبراء بالسجون انو ليش تاركيني ما عاد حققوا معي فقاللي في احتمالين يا عم يستنوك لتطيب يا اما التقرير المكتوب فيك ما كتير مصدقينو
قاللي يللي كتب فيك التقرير الله عمى على قلبو و زودا كتير لحد انو صار خرافي
بس بالاخير طلع ظنو الاول هو الصحيح انو عم يستنوني لطيب مشان ياخدوا راحتن
لما طلعت من الجماعية الاولى عالتنفس كان العدد 65 بس شكلو زاد كتير لانو بعد فترة صارو يطالعو نزلاء الجماعيات عالتنفس ونحنا كنا نروح عالجماعية يللي يطلعوا المعتقلين يللي فيها عالتنفس مشان نتحمم ونشرب مي لانو بالاحوال العادية ما بيطلعلك غير كاسة مي وحدة باليوم
العدد بالجماعية الاولى اكيد زاد عن ال 65 لانو لما كانو يجو عالتنفس كانت اجسامن محروقة من شدة الاحتكاك والله منظرن كان متل الفراريج المشوية والدم عم ينزف من كل مكان
الاعمار داخل المعتقل كانت بين ال 14 و 60 والتهم مختلفة واكثرها كان حسب المنطقة لانو من برزة او لانو من حمص او او
بالجماعية الاولى ب 10 ايام اكلت اقل من نص رغيف طول الفترة
بالتنفس كان الاكل متوفر بس البرتقال كان الو نكهة غير شكل بتحسو شي من الجنة لما تشوف حبة البرتقال كنت احكي لحالي ازا طلعت من هون ما عاد اكل غير برتقال يا لطيف شو كان منعش لدرجة انو كنا ناكلو بقشرو بس مشان ما يروح فكركن لبعيد كان باكتر الاوقات يطلع لكل خمس اشخاص برتقالة
بالمعتقل بتكون مجرد من كل صفات البشرية بادنى مستوياتها
ارهاق نفسي لابعد الحدود لدرجة انك ما بتتذكر انو مر يوم حلو بحياتك
بعد 25 من تاني تحقيق استدعوني وكانو رجلي من تحت طابو تمام بس في تقرحات تحت الركبة و العضم شبه باين بس هن بيهمن المنطقة السفلى من القدم
نفس الظروف نفس الطريقة كلبشات مطمش العينين لما وصلت لعند المحقق سالني مين انت استغربت من السؤال لما قلتلو مين انا استغرب وقللي شو يللي عامل فيك هيك قلتلو انتو قللي لو اعترفت من اول مرة مو كان احسنلك وما كان صار فيك هيك قلتلو انت ما عم تصدقني
رجع لنفس الاسئلة وانا نفس الاجوبة
عالدولاب
باول ضربة بتقول معقول في وجع بالدنيا هلقد
بتاني ضربة بتستغرب ليش ما عم تموت
شكلن رجلي طابو منيح لانو ما عم يحكو مع بعض المحقق والسجان
والضرب ما عم يوقف
بعد شي عشرين ضربة بتقول طيب ازا ما رح موت لو افقد الوعي او يغمى علي
الوجع غير محتمل
لما تتاكد انك ما متت او ما فقدت الوعي بيصير الامل الوحيد عنك انو السجان يتعب
بالفعل بعد شي 50 ضربة بيتعب السجان وبيصير يستعمل عصاية الكهربا
طلعت عصاية الكهربا شغلة فاضية مقارنة بالضرب عالرجلين مع انو فولطية عالية وعم يضربو على اماكن حساسة وعالاضافر وعالرقبة بس مقارنة بالضرب عالرجلين شي لا يذكر
بس ضليت عم اصرخ وعيط مشان يفكرو اني عم اتوجع لاني كنت خايف يرجعوا للدولاب
كان جسمي كلو ينتفض وارتفع عن الارض وصار ينزل دم من تمي وانفي بس معليش ارحم من الدولاب
تاني تحقيق السجان لما كان عم يرجعني قللي لا تعترف شو ما عملو فيك قلتلو انا ما لي عامل شي قاللي انا من حماة بس لا تحكي لحدا اني حكيتلك شي
تالت تحقيق هو وعم يرجعني سمعت كلمة اخلاء سبيل بس ما استرجيت اسالو شو عم تحكي خفت عليه مشان ما حدا يشوفني عم بحكي معو و خفت كون سمعان غلط و يضل عندي امل
بعد يومين طلع اسمي وقالولي ضب اغراضك
ضب اغراضك معناتا افراج
مافي فرحة بالدنيا بتعادل هيك خبر
يا جماعة يللي عندو مكان ينام فيه ان شاء الله عالبلاط بيكون عايش بنعمة كبيرة الله لا يقدر وينحرم منا
ضليت عم ادعي الله يتمم على خير وتكمل الاجرائات على خير و ضلينا ش يساعتين لحتى خلصنا اجرائات
يالطيف شو طوال هالساعتين كانو
واخيرا طلعت من الباب وعاهدت حالي اني ماعاد امرق من هالمكان ليسقط الطاغية بشار الاسد
لما اطلعت بالتكسي كان عندي فضول اعرف كيف كان منظري
اتطلعت بالمراية ورجعت عالمقعد استغربت من الشخص يللي شفتو
اتطلعت مرة تانية وفهمت ليش المحقق بتالت تحقيق استغرب و قللي ليش هيك صاير فيك
لما وصلت عالبيت دقيت الباب
فتحولي ولادي قالولي اهلين عمو اتفضل
وقعت عالارض وصرت عيط يا امي ولادي ما عرفوني
وسمعتن عم يقولو تيتة في زلمة عالباب بدو ياكي
لما اجت امي كمان ما عرفتني
متل لما اتطلعت عالمراية وما عرفت حالي
لكل انسان في عندو ذرة من الانسانية
يللي عم يصير بالسجون السورية يفوق الخيال و الوصف
لكل مؤيد للنظام
لكل واحد كان سبب باعتقال شخص بالمعتقلات السورية
الحساب عسير
صفحة كنت معتقلاً
