إياد
—————–
سوريا عم تستنزف و أولادها عم تنحر، و الأرض ما عاد تحمله دم وغضب أكتر من هيك … بنفس الأثناء يلي منكون نحنا علقانين ببعض بدل ما نكون عم نعمل شي أو عم نحاول نعمل شي … وعم نتفشش بعض بدال ما نواسي بعض وصراحة ما عد فيني اسكت لأني عم بشعر بالذنب اني ما عم بحكي … وعندي كم بحصة بدي بقهم ..
1- بين طوباوية السلمية وعشوائية الجيش الحر و بين المطرقة والسندان، ما عم تروح غير عالمعتر لحد الهلكان !!!
قبل ما بلش حكي، خليني وضح الهدف من كلامي حتى ما نفوت بمعمعة الشخصنة و مين معو حق ومين ما معو حق، ما بين اتهامات الجهل والعمالة و عدم الوجدان و كأنو يلي عم يحكي مو سائل على البلد
أنا مالح أرغي بموضوع الكفاح السلمي و الكفاح المسلح لأنو ببساطه في أمثلة من نجاح الطرفين و أمثلة من فشل الطريقتين، يعني مافي قاعدة ثابتة ومتغيرات المعادلة اكتر من انو تنحصر معنا، وبالمطلق السلمية بتطبيقاتها البسيطة واستراتيجياتها هي الطريق الأفضل والأصح على المدى المتوسط و الطويل رغم صعوبتها على المدى القصير. بس الموضوع على الأرض بلش ياخد غير اتجاهات ونحن هون منقسمين طرفين ما لازم يكونوا خصوم وإنما يشتغلوا مع بعض !! يا شباب هدفنا واحد ولازم نحط عقلنا براسنا !! ببوس أيدكم واحد واحد و وحدة وحدة ….
الانجراف ورا السلمية برومانسية حرام وفي عالم عم تموت بالعشرات. ولازم نشد الهمة لنصعد الشغل شوي ونجبر العصيان المدني انو يصير بكل طاقاتنا، حتى ولو بلوي الذراع، ولازم ما نوقف وتكون عملياتنا أكتر فاعلية …
تشجيع الجيش الحر بشكل أعمى كارثة لأنو ممكن يجيب مصايب الها أول وبلا ااخر ، ويلي بالأماكن الحامية وعم يحكي بموضوعية بيأكد هاد الشي ، وفي كتير شغلات فينا نعملها لنساعد بتنظيم الأمور وتكديرها ، فلا تنسو انو هاد الجيش ممكن يكون الجيش الوطني بعض سقوط النظام وما حدا بدو جيش أسوأ من جيش النظام …
برأيي الاتجاهين بيمشو كتير وما في شي بوقف بوش التاني ، وحرم طاقاتنا عم تروح على نقاشات ومساببات على انو أحسن . وخلينا نركز هي الطاقات بمشاريع
2- الطائفية
كلنا منعرف قديش هاد الشي عم يلتعب عليه من سنة وحتى من 40 سنة بالأحرى، لازم نحنا نكون أوعى من هيك بكتير ، و إذا مو هاممنا الحرب الأهلية نتذكر انو بكل واحد بدو يروح من كل طائفة لح يروح متلو واحد من كل الطوائف التانية ، وهالواحد ممكن يكون إنت !!
و إذا من كل بد مقتنعين تمام بشي بهاد الخصوص يا ريت على الأقل ما نسيء الظن بالعالم التانية يلي ما بتكون بتقصد شي …
3- السلبية
كلنا عم نموت ، وعنا أهل معتقلين أو شهداء أو تحت الضرب. وكلنا تحت الضغط ، ومجرد اللطم أو العصبية أو التفشيش أو اتهام العالم لح يخليك متوتر وغيرك لح يتوتر كمان ، فينا نطلع نمشي ، ناخد دوش ، نحشش ، نشرب ، بس ما نتفشش بغيرنا ، يعني إذا النظام مجرم رفقاتنا اللي حوالينا ما دخلهم…
4-العمل السري
بتخيل يا شباب يلي عم يشتغل عنجد للبلد ما بهمو إنو ينعرف إنو عم يشتغل ، نحن بثورة ، مو للبروظة و الشهرة ، في عالم عم تموت و ما حدا عم يعرفهم و يندفنو بدون شاهدة قبر …
5- التَوَنوُن …
لح إقتبس كلام صديق هون :
لكل واحد بيقول عن حاله “ثائر” و “وقف” يشتغل لأنه الثورة مو ماشية “تمام” و لأنه بلشت “تنحرف”… اسمحلي اسألك سؤال؟ عمرك كملت شي مشروع بحياتك؟ أخي إذا معك حق و حملت حالك و وقفت مصيبة لأنك تركت الساحة للغلطان! وإذا ما معك حق كمان مصيبة لأنه راسك يابس لدرجة الحرد… يعني بالحالتين مصيبة، لأنك إذا كنت مؤمن بنسبية الحقيقة فأنت استبدادي (بس مو صاححلك تمارس) و إذا كنت مؤمن بالحقيقة المطلقة فأنت متخاذل (لأنك تخليت عن تطبيق مبادئك)… و النتيجة بجميع الأحوال واحدة فضلت نفسك على غيرك و تركت الضحية بدمها عم تغرق (شكليا بعدين كيف تبررها لنفسك فهالشي لإلك لتريح ضميرك بس ما بغير شي)…
كلامي بكل محبة يا شباب ، بس حرام جهود هلورود قلبهم على البلد متلكم تروح على الفاضي …
حان وقت العمل ، وفي مشاريع كتير ممكن تنعمل خصوص بأول نقطة حكيتها …. لازم ننقذ الثورة والبلد أو التاريخ لح يلعنا …
