بالأسبوعين الماضيين وأنا عم أللب بهالتلفزيون وهالأنترنت شفت شوية أخبار من هون ومن هون وحبيت أرجع أتذكرها هون.
– اعتقالات عشوائية في الشوارع و منع الشباب من دخول الجوامع.
– منع مادون الخمسين عاماً من الدخول لأداء صلاة الجمعة في جامع أبي حذيفة السهمي و جامع علي بن أبي طالب و
الجولاني و أنس بن مالك … الأهالي في حالة غضب …
– قوات الامن اعتقلت الكثير من الشباب دون الخمسين سنة أمام المسجد و ذلك قبل الصلاة و انتشار لقوات الجيش على
مداخل الحي.
– اقتحام عدد من عناصر الأمن جامع وقيامهم بضرب المصلين بوحشية.
– محاصرة الدبابات بعض المدن والقيام ببعض الاعتقالات.
وأنته عم تئرا بعرف شو خطر لبالك …..
* أديشهون هالإسرائيليين سافلين وحقرا، يعني معئول هيك وصلت الحقارة فيهون، ما عادو تركو حرمة لجامع أو مكان عبادة، الله يكون معكون يا أخوتي الفلسطينيين.
– هون لح أللك: أيييييييييييه طولي بالك شوي وصلي عالنبي ولا تخطوف الكباية من راس الماعون، لسا ما كملت سردة الأخبار … طلع عالراديو أنو مخربين يقومون باستهداف قطار من خلال تخريب سكة حديد.
* أي شو مشان شو هالراديو يضربو هنين وهالتسماية “مخربين”… شو مشانهون هدول الإسرائيلية؟؟
– برجع بئلك خدني بحلمك واسمعني بكلمتين.
– الاعتقالات العشوائية هي صارت بشوارع (الميدان وكورنيش الميدان) مو صارت بشوارع القدس الشرقية.
– جامع أبي حذيفة السهمي وجامع علي بن أبي طالب هدول مو برام الله أو بالقدس الشرئية … هدول بنهر عيشة بمدينة دمشق.
* شو مشان؟؟؟
– جاييك جاييك خليك معي شوي.
– قوات الأمن اللي اعتقلت من هم دون الخمسين ما كانت بعند المسجد الأقصى والحي هاد مو حي المغاربة بالقدس … الاعتقالات هي صارت عند جامع الحسن والحي المحاصر هوة حي الميدان.
– اقتحام الجامع هاد مالو لا المسجد الأقصى بالقدس ولا الحرم الإبراهيمي بالخليل … هاي صارت بمسجد آمنة بسيف الدولة بحلب.
* أيواه …!!!!!
– محاصرة الدبابات لبعض المدن، هدول المدن مو جنين ورام الله وأبو قيس …لاء لاء … هدول حمص ودير الزور والبوكمال اللي أكيد أكيد بتعرفهون.
– الراديو اللي عم يئول مخربين مو صوت إسرائيل عم يسمي الفلسطينيين … لاء هاي الإذاعة السورية الرسمية اللي عم تحكي عن اللي ضربو سكة القطار بين حلب والشام …
* هلأ هيك أنته عيني يعني هدول مو مخربين.
– مبلا مخربين بس التعبير هادا مأخود من صوت إسرائيل يعني من إذاعة العدو وباللغة العربية ما لئو غير هالتعبير اللي صرلون الإسرائيلية عم يستعملوه من مدري كم سنة …
* طيب معليش يسموهون الحوت الأبيض إذا بدك بس مو في مين خرب السكة.
– مممممم أكيد أكيد أنته ما أريت هالمقالتين.
– عود واستمخ عليهون…
* أيوااااااااااااااااااااااااااااااه… شو مشان؟؟ يحرء طرئهون يعني ما تركو وساخة للإسرائيلية إلا وساووها. لك شلون هدول بدهون يآتلو هدول إذا الاتنين أوسخ من بعض؟
- شفت كيف
by: MA2
