الحلقة الأولى
__________
هلاء الثورة والحرية وقفت عليي أنا؟
بعد ما خلصت المظاهرة شفت رفيقي واقف عالرصيف هوي وصاحبتو عم يفرجيها عالمظاهرة وكأنه عم يفرجيها ع شي عرض مسرحي وعلى ياي محلا هالغناي، وياي ليك هداك.
اللي زعجني أنو رفيقي ولا مرة شارك معنا، ما لأنه مخبر أو شبيح لاسمح الله ولا لأنه بيخاف لاء، لأنه عندو قناعة وبيقلك عطول : هلاء وقفت عليي أنا؟
بصراحة مدري كيف خطر ببالي الشهيد عدنان والشهيد هادي و الشهيدة زينب ، فار دمي بس قلت يا ولد رفيقك من جواته طيب روح حكيه بالهداوة.
سألته بتحب صاحبتك ؟
قللي كتير؟
قلتلو إذا رحت أنا هلاء وخطفتها ودبحتها متل النعجة و رشقتها قدامك وصرت اتعاجق و افتخر شو بتعمل فيي؟
قللي باكلك بلا ملح ؟
قلتلو بس أنا رفيقك يللي بتحبه ؟
قللي لأنك ساعتها بتكون مانك بشر وخطر ..
قللتلو طيب أختي ما أختك ؟
قللي أكيد
قلتللو أنا عملوا هيك بأختي زينب الله يرحمها .. ساعدني ؟
قللي جد ؟ والله أنا ديبك بس قللي شو أعمل؟
قلتللو تظاهر بدنا نسقط النظام يللي عمل هيك بأختي
قللي هلاء واقفة عليي؟
قلتلو : شفت!! إن شالله مفكر الثورة استيراد جاهزة بس صب وكول ، حبيبي إنت الثورة كل الثورة ، الثورة هيي كل واحد
إي واقفة عليك إنت وما بس هيك إذا ما تظاهرت رح تفشل الثورة ورح انحبس أنا ويقطعوا صاحبتك وإنت يا رح تموت دعس بالغلط بشي دبابة أو فطيس متل شي غنمة
شبك فيق لك فيق يا زلمي !! قسما بالله عيب !! ركبت قرون يعني !!
بحلقت فيه وسكتت شي دقيقة وهوي جمد بأرضه…
اتطلع فيي هيك وصار يبكي ويبكي
ضمني
وصار يعيط ع كتافي : وهي ويللا ما منركع إلا لله
ونزلنا سوا وعيطنا للشباب لنتظاهر مرة تانية لنحتفل فيه ودموعنا عم تصرخ حرية ، و دمك يازينب ما نسيانينو .
———————-
توأم الحرية
