من دهنو سقيلو

من إحدى النقاشات على حيط أحد المندسين يلي برا البلد، المندس كتب:
“كم كنت مخطئا حين ظننت أن القوة بيد النظام… القوة الحقيقة لطالما كانت في يد الشعب”

بديه رد عليه :
“لتأكيد أن القوة لا تحتاج إلى القمع ولا تحتاج إلى الرعب والإرعاب .. لكن المحبة أيضاً تحتاج إلى الحماية والرعاية وبعض من القوة إذا سمحتهم لنا بها كمجتمع مدني فنحن لسنا جيشاً ولسنا قوى أمنية إننا مواطنون سوريون كنا نعيش بأمان وتم إنتهاك هذا الأمان بالرعب والتهديد لكن صدقني إننا نعيش بأمان وبحرية أكثر من الحرية والديمقراطية التي تعيش فيها أنت لسبب واحد وبسيط هو وعي الشعب السوري ووحدة الشعب السوري من دون شعارات ومن دون أي شئ على الإطلاق نحن نريد الحرية التي نعيشها والتي تريدون أن تحرموننا منها بحجة مايسمى ثورة يا أخي نحن ثوار
عريقون حررنا بلادنا فاين أنتم يا أيها الكسالى نحن نعيش هنا نعمل ونكد ونكدح ونبني بلدنا وانتم مستهترون وعابثون بالشعارات الفارغة صدقني الواقع والحقيقة تقول لكم أنتم حتى لاشيء .. وللأسف أقول ذلك كنت اتمنى لك موقعاً او موقفاً او مكاناً ارقى من ذلك ياصديقي”

بعدين بلش التخوين والى ما هنالك…. وهون انفتحت قريحتي ورديت:

طولو بالكون يا شباب رح تخسرو بعض مشان القائد، لك القائد بائد والشعب باقي، بكرا هو بيروح وانتو بتكونو ما استفتدتو شي غير انو خسرتو بعض….. هلأ سيد بديه، تعا لقلك، “نحن نريد الحرية التي نعيشها” عرفلّي بمعيتك، انا اخي مالي من هالبلد الهيئة اذا في حرية نعيشها، ما رح بلش بمناصصات رامي (نص نص يعني) لأنو حكي مردود علي، لأنو مافي اثبات، طيب ما رح بلش بمجلس المهرجين المنتخب، لأنو كمان مردود هادا الحكي، لأنو منتخب، شعب بيحب الضحك أخي، ألك عند ربو شي؟ طيب حلو الكلام، شعب مقفل على راسي، طيب والرئيس (يعني القائد) وابنو (كمان القائد يعني) شوهاد؟ قال والله ياسيدي باميركا اجا ابنو لبوش، يعني هنيك مافي ديمقراطية؟ طيب، ليش تلاتين سنة اب وعشرة ابن؟ قال القانون عنا بيسمح هيك، ومتل ما قلنا انتخبو الشعب…. ماشي، على راسي، دحشت صرماية بتمي وسكتت….
خلينا لكان نحكي بالحكي المثبت لما انا بحكي عالقائد المنتخب يلي الوطن العربي قليل عليه يا سيادة الرئيس، وبنشحط وبيلعنو سمايي، هادا الحكي منعرفو، ولما ما بيكون في تلفزيون غير التلفزيون الرسمي الغبي يلي ضر النظام اكتر ما يخدمو، ولما ما بيكون في جرايد غير تشرين والبعث والثورة (بغض النظر عن الاسامي يلي بتخليك تحس انو عم نشق طريقنا بعيدا عن العصور الوسطى) لما ما بيكون في غيرهون مرخص بالبلد ( اللهم من سنتين رخصو لمخلوف الوطن) هي بتكون حرية؟ هي ما بدها اثبات، هون ما عاد فيك تقلي الناس انتخبتون ياأخي، بس مو تقلي انت قدمت طلب رخصة وما عطوك شي؟؟؟ ساعتها بنفلج وبطل ثورة، والله يفرجها وربي يسر…. السلطات تلاتة: تشريعية وتنفيذية وقضائية، السلطة الرابعة هي الاعلام، هي عنا مو موجودة، وبدونها ما في حرية يا بديه ….ـ
طيب قيمنا من السلطة الرابعة، خلينا نقفز عالمادة الثامنة من الدستور، يلي البخيتاني بييستبعد تعديلها، شو هي المادة بلا صغرة؟ قال هي وكالة حصرية للبعث انو يمّشي البلد… بالله شو؟ وبركي تيسن هادا البعث، وجحش؟ شو بيعمل بحالو الشعب المقفل ابو مجلس المهرجين؟ قال والله مافي، مافي ياروحي، بعث يعني بعث، وبالترتيب: حافظ – بشار – حافظ…. طيب بركي حدا من شي حزب تاني بدو يمشي البلد، اخي حس حالو حربوق الزلمة، قال اي هادا حمار… له له شو هالحكي؟ ايه متل ما عم حاكيك لو حربوق كان دخل عحزب البعث !!! طيب هي حرية يا بديه؟ ونحنا بدنا نحرمكن منها؟ يا بديه، من البديهي انو في شي عم تتجاهلو لما عم تحكي عن حريتك بسورية الاسد، اي انو حرية هي اذا البلد كلو تسما على اسم القائد…. انو اخي ما عم نخونك هون، اعلام القائد هو يلي عم يخون بتعميم مخيف، بتعميم لو اتجنبوه من الاول ماكانت الناس فار دمها، انت هيك رأيك، ولك أخي الله يخليلك القائد، منيح هيك؟ بس تركونا نحكي، تركونا نجعر بالشارع…. يلا سيدي فاتحة خير هي ليكو ابو الريم، كبير هالابو الريم، والله البنك الدولي قليل عليك يا ابو الريم، ليكو بلش يعمل اعمال خيرية، روبن هود والله وحاتم الطائي بخيل امامك يا ابو الريم، اخد المال ولمو وحيوزعو عالشعب، لك هي بأكبر ديمقراطيات وحريات العالم ماصارت، لك اي بربي حرية، لك وينك بديه، انا اقتنعت خلص….. يا مندسين ، يسمو بدنكون شو بتلعو بلا طعمة!ـ

تصحيح:
رخصو لمخلوف “جريدة” الوطن، مشان ما يقلولي انو ما في اثبات انو رخصولو الوطن!!

.