من مندس لرئيس الجمهورية

من مندس لرئيس الجمهورية ( عندي أمل فيك )

تحية عربية
أنا المندس ابن المدس فلان ابن فلان جدي فلان

أعتذر عن عدم ذكر اسمي ليس خوفاً من مخابراتك ورجالك يا سيدي الرئيس , بل خوفاً من الأعلام وعدساته
أشتئتلك سيادة الرئيس صرلي شهرين ما شفتك عم بستناك وانت مو مبين وينك يا قائدنا ؟
صحيح أنا مندس وأبن مندس وصرمايه وعميل ع قولة يللي بحبوك وبحبو سوريا ويللي خايفين عليا من بعدك بس والله العظيم بحبك يا فخامة الرئيس .
بحبك كتير مو شوي بس شأت الظروف ولقيت حالي بين خيارين:
الأول : شعب سوريا
الثاني : أنت وحاشيتك

وأكيد يا معلمي كل واحد حر بيختار يللي أنا أخترتوا وبيصير مندس .
عزيزي القائد : من وقت ما خلفتني أمي وأنا عايش بدولة الرب الواحد والحزب الواحد والقائد الواحد
ولفترة التسعينات من القرن المنشطح صرت معلم بالهتافات والتصفيق والمسيرات الليله والنهارية الصيفة والشتويه وعلى تمي كلمة وحده للأبد يا حافظ الأسد بكل المراحل طلائعياً أو شبيبياً ولك حتى حرفياً .
بس شغلة للأبد ما طولت وبسنة 2000 الأمة العربيه خسرت رمزاً من الرموز ناصر الأمه الثاني قائدنا الخالد الباقي بالذاكرة رحمة الله عليه .
وهون كانت بداية قصتي أنا وأنت وكتير من الشعب , الكل أنتخبك من الصغير للكبير من أذن محلس الوزراء لرئيس المجلس من بواب البرلمان لصديقي صاحب مقولة الأمة العربيه قليله عليك يجب أن تحكم العالم وما بعد العالم وحتى الجيش أنتخبك من أصغر حاجب لحتى عمي مصطفى طلاس .
الكل شاف فيك الأمل وأنا أول الناس وشو يعني يتغير دستور لك عادي كرمال عين تكرم مرج دساتير .

أستلمت الحكم وبلشنا نشم هوا ليش الكذب الكذاب بروح ع النار منحكي يللي إلنا ويللي علينا بس تلت اربع سنين ضربتو الفرامل وبلشت العالم تتاخد على الحبوس وكل شي رجع متل أول مابعرف ليش بس بصراحة في عالم قالولي أنو حدا من حاشيتك قلك حاج لهون وأنا أنتفضت بهدا يللي قلي وقلتلو خسا الموت ارحم بس نحنا بوضع سيء وعندنا ضغوط خارجية وابراج عالميه وألف قصة وحكايه كل هالشيء لأنو عندي أمل فيك وبحبك .

ومرت الأيام والوضع على حالو وهالمندس يللي قدامك صاحب هالكلمات طفش من البلد متلو كتير من الشباب يللي حظون قليل بالبلد لا جد غني ولا أب غني الحال من بعضو .
ومرت سنه ورا سنة ولسه عندي أمل فيك وبدافع عنك وبحبك ومنحبك .
سيدي الرئيس : مرت السنين والأيام وبلشت الثورات في الوطن العربي وأشتعلت الشعوب ضد حكامون والكل بدو حريه , وأنا بعدي يحيك وبقول للكل سوريا غير مع أنو من جوا بلشت أفهم اللعبه وأفكار المندسين بلشت تنزرع براسي .
بس على طول قول للكل طبعاً الكلام عنك يا سيادة الرئيس عندنا رئيس مافي منو ما شاء الله عليه منحبو والله منحبو وكل شعبي بحبو ورح يعمل شي .
وبس بلشت الأحداث بدرعا وبلشت هالقنوات المغرضة تحكي وقفت قدام الكل وقلتلون عنك الأسد قدا وقدود .
ولبعد الأحداث وأنا عم دافع عنك شايف شو بحب فخامتك .

وهيك لحتى طلعت بخطابك التاريخي طبعاً هي الكلمة مو مني بس تعلمتا من أعلامك الفذ لأنو كل خطاباتك تاريخيه بس مع هيك عندي أمل فيك وبحبك .
وطلعت وقفت بنص البرلمان والله يجعلوا برلمان والله الروضة يللي تحت بيتنا أزبط منو المهم وبلا طول سيرة ع فخامتك كان خطابك التاريخي صدمة إلي ولكتير متلي أصبتني في حالة يأس مزمبه ليش لأني بحبك وحتى بعد الخطاب التاريخي عندي أمل فيك .
بلشت تكبر القصة والشهداء تكتر وكل يوم يطلقوا عليهم أسم مره قاعدة مرة سلفيين مرة أمارة مرة أبطال الديجتال ومرة السنافر أيه ولو أبو حافظ ومو هالئد شعبنا غبي صحيح محروم من كتير أشيا بس والله حربوء وبيعجبك بئا فهم هالأعلام يحترمنا شوي مو يطالعنا أخبار وأمراء وربي يسر .
ومع كل هدا ولسه عندي أمل فيك وبحبك..
بس يا فخامتك شوف الدبابات عم تقتل شعبي وأخواتي السوريين وضل حبك بدك تعذرني فخامتك
لأنو لهون وحاج وتلفزيونك وأعلامك يكذب أمة الله ويصدق حالو لأ بدك ما تواخذني فخامتك ما إلنا نقطه حمرا ع جبينا لا نصدق هالمهرجيين وعم حس يوم عن يوم أنو أمل تجوزت وماضل أمل ورح يجيها ولاد .لك على سيرة الأولاد كيفون ولادك إن شاء الله مبسوطيين وفرحانين وعايشين با أمان الله يخيليك ياهون ويربو بعزك ودلالاك ولا يحرمك منون وأولاد العكيد ماهر كمان الله يخليلو ياهون وصهرك الغالي أصف أن شاء الله عيلتو بخير الله لا يحرمكون من بعض يا سيادة الرئيس بس بحب ذكرك بشغلة متل ما بتحب ولادك في بدرعا وبحمص وبانياس وتل كلخ ودوما وادلب وكل سوريا ناس بتحب ولادا وأهلا متل ما بتحب ولادك وأكثر ويللي أستشهدوا عندون أهل محروق قلبون عليهون ومتل ما بتحط أصبعك بعينك بتوجعك رح توجع غيرك .
عزيزي الدكتور بشار ما بدي طول عليك يمكن عندك موعد مع بعض وجهاء المحافظات بس بحب قلك يللي عم تشوفون هني من جماعة منحبك والأمن والمخابرات والحزب منقيهون على كيفو بقا لا تشد ايدك وتفكر انو هدول من الشعب .

صحيح بطلت حبك متل قبل بس نصيحة ماحدا بفيدك غير الشارع والشعب لأنو هوي بحدد مصير سوريا , فتح عيونك منيح يا معلمي وبتقول هالأخوت المندس بعتلي رسالة وطلع كلامو صح لأنو ما ضل كتير والصبر رح ينفد من صدورنا

وشكراً لتفهمكم وقرائتكم
مع تحياتي أنا المندس أبن المندس بس بضل عربي سوري غضب عن الكل

.
. 

بقلم: small mondas