حبك للوطن لاااا يعني حبك للرئيس بل قد يتناقض معه!
يعني بالمشرمحي انت بتحب سورية و للا بتحب الأسد؟ لأنوللمعلومية بس هه سورية باقية و الأسد اذا ما أخدوه الثوار (كش برة و بعيد) رح يجي يوم و الله ياخدو…بتتركوا سورية يعني؟ و للا أملكن بحفّوظة نمبر تو؟
كرهك للتخريب و المخربين لا يعني أن تكره الثورة!
يعني لو حضرة جنابك مع التغيير بس كرهان الثورة لأنو كلها جراثيم و زعران و يااااي..شرِّف…فرجينا طولك…انزل و ثووووور بأكابرية و ستايل و عدِّل الكفة!! يعني لا بتثوروا و لا بتخلوا هالمعترين الطفرانين يثوروا؟
كرهك لماهر الأسد و رامي مخلوف يجب بالضروووورة أن يعني كرهك لبشار..
يعني يا حُبي يا نضري شلون هو منيح و شلون سامح لكل أفراد عيلتو يستولوا عالدولة؟ يعني بالله بالله إذا أنا كنت عندك عم بشرب قهوة بكل لطافة و ذوق و فتحت الباب (الفلقتين) لعيلتي كلها و دخلوا نهبوك و أكلوا البيض المسلوق و المقلي و البرشت و القشر ما بتقلعني و للا بتقلي أنت خليك
“منحبك” ما شفت منك شي؟
ممانعتك و كرهك لإسرائيل مو إلك وحدك
ليقووووم مفكر أنو ما حدا بيحب فلسطين غيرك هه؟ ليقوم مفكر أنو الثورة قامت و رح تخلينا نصير بقدرة قادر نحب إسرائيل (مع أنو إسرائيل و أميركا ضد سقوط الأسد..عجب ليش؟؟؟) يعني لهالدرجة ثقتك بأهلك شديدة؟ يعلى قطاطك!
طب هي كمان وحدة رايحة أموت منها! على أساااس الشعب السوري مؤمن بالله شلون زبطت معكن “مطرح ما بتدوس منركع و منبوس”؟
لك خاي…لك خييييت شلون قبلانين بواحد بدو ياكن تعبدوه و مسكِّر الجوامع ببعض المدن…لا و عم يقلكن (بضحكة متألقة) “تأخرت الإصلاحات 11 سنة و سسسسسسسسنقوم بإصلاحات”؟ طب هاد الوقت مين يدفع تمنو؟
يعني أبوي…يوووم اش لإيمت رح نستنى؟ و اش الاصلاحات اللي لسة متأملينها؟ أنا بقلكن! رفعت الأسد….عفواااا قصدي ماهر يلبس الجرايم براسو و يلم الملايين و يهرب و خلص! منرجع حبايب!!
بعدين يا روح…بدال ما تعترض على تهجير ولاد بلدك جاي تعترض لانو زارتن ممثلة أميركية “إسرائيلية”؟
أولا و قبل كل شي ميييييين قال أنجيلينا إسرائيلية؟ بربك منين جبتا؟ أنا نكشت غوغل و دودل و مالقيت هيك شي….وللا قلك؟ هي أكيد قناة الدنيا…ينعن دقنا إش مهضومة و بتحب التنكيت…هههه
تانيا مالك زعلان على أهل بلدك أنو هربوا من بلدك؟ بربك بمعبودك مصدق أنن مبسوطين بخيمة تحت الشمس؟ بربك مصدق أنو كلللللللل هالعالم راحوا تمثيلية؟ بربك أرجوووووووك جاوبني إنت بتترك بيتك مشان تقعد كلاجئ و يتصدقوا عليك بعد ما كنت صاحب أراضي لو ما خايف على أهلك و حياتك؟ إي حاجي عاد (على قولة أهل حومص يقبشوا قلبي)..
منرجع لقصة أنجلينا (بالله مو مبين أنو حارقة قلبي) يعني لوووووو كانت إسرائيلية و راحت تتحنن على شعبك يللي هجروا حبيبك مو لازم تلق حالك مية صرماية لأنك لسة بتحبو؟
لك إشبكن؟؟ إشبكننننننننننن…إصحوا من سباتكم! و للا جراثيم نظام ذبابة التسي تسي حلوة على قلبكن و جراثيم الحرية و الكرامة و العبودية لله وحدو صارت كخة و عم تحككن؟ وكل هاد مشان مين؟
أفففففف ياه!
.
