Close Menu
لمن يهمه الأمر

ويلكم تو حماه سيتي

kebreet5 تعليقات3 دقائق

أول شي بحب رحب باسم كل العملاء والمتآمرين والامبرياليين وكبار الكسبة والمثقفين غير الثوريين..
بالسيد روبرت فورد قائد الثورة والملقب أبو محمد (الأساسي مو أخوه)
وأما بعد..
النا عتب عليك يا أبو محمد..يعني فوق ما استقبلناك بالورد ورشينا عليك رز،انت اجيت عملتلنا بالرز بصل..
الاعلام السوري فضحنا،ضروري تجي بلا موافقة أمنية انت التاني؟شو مفكرها سايبة؟
لك أبي هي دولة ممانعة..مو مزرعة أبو حافظ..دولة هي يعني فيها مؤسسات وقانون وعادات وتقاليد..واللزي منو
وأنتو يا أيها الحموية..لك مو على اساس سلفيين وقطاعين روس؟ شرشحتونا كيف مرقتو هاد الصليبي المارق الكافر الزنديق وما اخدتو بتار المعلم بن لادن اللي كبوه بالبحر؟
(بالعلامة كبوه بنفس المنطقة اللي كانت فيها البارجة الإلمانية…اللي بتحكي إلماني)…
يعني السيد الرئيس ضلو عم يشتغل بحنكة سياسية منقطعة النظير..لحتى خلا السفير الامريكي يجي على سورية ويسلم أوراق اعتمادو لأبو حافظ (تلت زقفات) شخصياً..وقلو اقعود بالشام..واستقبلناه بالشام وحفل استقبال وكلو تمام..يعني بما يليق بدولة ممانعة…
هيك بتخلوه يدنس تراب حماه؟ هاد شغلتو يدنس تراب الشام وبس!! وشغلتو يسلم ع الرئيس ويتصور معو..وبس!
سورية ضلت كزا سنة ما فيها سفير أمريكي..وكل رفقاتي اللي مقدمين فيزا كانوا عم يبكوا ويتبكبكوا وعم تتعسر أمورن..وبتزكر أنو أحد رفقاتي لما دري أنو جايينا سفير،انفردت سرائرو ونفش ريشو وقال يلا هانت هالسفرة..وامبسط كتير بذكاء السيد الرئيس وقدرتو الفائقة على جذب السفراء الاجانب بوساطة عيونو الزرق ووقفتك تجذبهم..
(بس الله يستر ما يطلع شي محلل من اللي بالي بالكون بكرة ع القناة السورية..ويقول انو السفير الامريكي لوطي..ساعتها في ناس بدو ينخرب بيتها وبيجوز تتطلق من ورا الموضوع)
طبعاً قبل ما انسى…رفيقي نفسو اللي تيسرت سفرتو،عم يمانع حاليا من فسط امريكا..حتى تشوفو قديش قبضاي..وعم يسب امريكا المتآمرة وعم يدعو السوريين لمقاطعة البضائع الامريكية..ما بقول غير الله يعمي شبيحة أبو حسين عنو (بدون 3 زقفات)…وأبو حسين بيكون معلمو للسفير أبو محمد..(باراك حسين أوباما)
المهم..انا قرأت مقال ع المندسة بيحكي عن أسرار زيارة سعادتو لحماه..وكاتب المقال ما قصر وجاد بالمعلومات اللي عندو..بس نقصتو معلومة مهمة..
السفير الامريكي صارلو اسبوعين عم يتردد على معهد غوته..وعم يشتري جرايد المانية..وباع الفورد واشترى مرسيدس..
كل هالشي تحضيراً لزيارتو التاريخية اليوم..لانو عندو اجتماع مع المخربين شيتنا..واللي متل ما كلياتنا منعرف،ما بيحكو غير إلماني..
يعني حبيباتي المنحبكجية..
بما أنو السفير متآمر وعميل وامبريالي وصهيوني وماسوني وسلفي ومن نمور التاميل..
ليش حاوينو بدمشق الصمود والتصدي؟
خيو ضبولو بأجتو وابعتوه..
هجروه متل ما هجرتو آلاف السوريين..
هددوه..ابعتولو هاد متلقي الكرات تبع الجيش السوري الالكتروني..يشلفو بكم كرة
اعتقلوه..عفسوه..
يا أخي اقنصوه..
اعملولو كمين..حاكوه إلماني وجيبوه ع الفي..
اتبعوا أي إجراء من الموجودين أعلاه بدل ما تخونوا سمانا فيه..
تقول جايبينو من تل أبيب نحنا؟!
لما موصين عليه ع الانترنت ودافعين حقو من Ebay ؟
بعدين الزلمة أجا بأدبو..وطلع بأدبو..
لما يكون ناوي يجينا ع ضهر دبابة وقتا منلعن شرف أهلو…
خليكون عم تدبكوا بالمسيرات المليونية شيتكون..
وعم تحضروا قناة الدنيا..
وعم تركعوا وتبوسوا..
المنحبكجية تركع..والثورة تسير..
ويلكم تو حماه أبو محمد..
ويلكم من حماه أبو حافظ..
وفورد لما شيفروليه..
أنا مع الآفانتي..

.


شاركها.

المقالات ذات الصلة

5 تعليقات

  1. Hado on

    كبوه من البحر وعالطريقة الاسلامية….. بس أهم شي ” اعتقلوه، عفسوه” لول لطيف المقال، وانشالله الولايات المتحدة زادو وحدة، هي صحي امارة، بس بتزبط بمعية أبو حسين 😉

    رد
  2. Hado on

    بس في شغلة مهمة نسيتها حضرتك، وكان المفروض تنذكر: الزيارة بكل بساطة هي عبارة عن تنفيس للضغط الاميركي، وبتنسيق وتعاون معهون، مشان يورجوهون انو ها ما عم نقتل حدا، كلو ماشي بالسليم (طبعا قبل ما يبلشو فيهون، لأنو بهالأسبوع الجاية اعظم والجمعة الجاية يا ساتر) وكانو مفكرين انو بعد حملة الترهيب والاعتقالات رح تخف التظاهرات بما أنو مسكو الروس (هيك مفكرين هنن) على الطرف التاني كتير مخجل انو يكونو عم يفوتو سفير عفسط (فسط هي حلبية بس بظن انو اهل حماة بيستخدموها كمان = بنص) سورية/يا ويكونو بهيك خضعو للضغط الاميركي واضطرو يورجوهون، لأنو هنن ما ممكن يخضعو والاميركان عباب طيزون بما أنون هنن دولة ممانعة، فعلى الطرف التاني تم التنسيق مع المخابرات والأجهزة الاعلامية (متل ما دائما بيعملو من يوم وعيت عالدنيا وصرت اقرا جرايد) انو يسبو عالسفير وعلي استقبلو، وحضرو البوطي كمان، يعني عفوا البوطي كيف لحق يكتب الخطبة ويعرف انو السفير هنيك؟ بيشوف حماة مباشر وبيخطب ارتجالي؟ المهم ممكن دري الخميس، البوقي اساسا مو مهم، وما بستبعد ابدا، يا سيدي وشخصيا متأكد انو بعتو مخابرات يرش ورد عسيارة السفير، والحموية خونة، وخلصت سيرة، بيكونو (بفكرون طبعا) رضو الاميركان، وضحكو عدقن الشعب وضربو وطينة حماة، والنظام كسبلو ساعة….

    رد
  3. Basdass on

    يقال أن السفير أخد غواصة متطورة ذات دفع رباعي من بلوعة السفارة بالمالكي نزولاً إلى المجرور العام نزولاً إلى نهر بردى حيث أن قناة بردى الممولة أمريكياً سهلت الموضوع ثم سبح عكس التيار 4×4 ليصل إلى الزبداني حيث كانت تنتظره طائرة أمير بانياس مع قوة من كتيبة أبو نظير اللواء ٥٥٠ مصيّف. تم الإنزال المظلي على مشارف حماة و زود السفير و مرافقيه بعدد ٥ ملاية زم لتجاوز حواجز الأمن ثم ما لبثوا أن رفعوا العلم الإسرائيلي لدى مرورهم بباب عمرو لتلافي الصدام مع السكان الغاضبين. و إليكم هذه الإعترافات من بياع القماش بالحريقة الذي زودهم بقماش أسود شيت الملايا…
    أنا من زمان بورد ملايا ضد الرصاص، فيلتمان بياخد من عندي، بترا يوس وقت راح عالعراق أخد 5 تدرع، حتى صدام بعت أخد، عندي طلبية لمعمر بس ما عام لاقيلو هاللون ألي متل وشو

    رد
  5. الخوارزمي on

    السؤال الاهم كيف دخل هذا الحاقد على الحضارة الاسلامية كيف دخل الى حماة وهي محاصرة……ولماذا لم يمنعوه رجال الامن الاشاوس وكيف خرج ولماذا لم يعتقلوه عندما خرج …والله بباب الحارة ما بيصير هيك…وئررررررربت

    رد
اترك تعليقاً