تشكرات أفندم

بداية بحب رحب باسم كل الأكابر والأعيان بمبعوث جلالة السلطان رجب طيب أردوغان،مرعب نفوس الرجال وشاطر قلوب النسوان
وأما بعد…

سمعنا أنو مبعوثكم الكريم ذو اللب الفهيم جاية يزور بلد الأمن والأمان…وجايبلنا معو كم اقتراح وكم فرمان
ونحنا حابين نقلو أنو مزبوط الشعب الحوراني قويان عصو…وهالحوارنة يا بعدي صاروا يعرفوا يندسوا…
وأنو حكومتنا مالا شايفة وين الغلط ولا بدها تطسوا….شنو معلومك اللي ما بيعرف الموز،بيمصو..
على كل رح نحلف عليك ميت يمين معظم ،ما ترجعلنا لواء اسكندرون،وكمان منقلك مقدّم..
ورح نبلش نحكي بالمفيد، شنو أنتو العصملية وقتكن من دهب مو متلنا من حديد

هاد يا سيدي كان يا مكان، بقديم الزمان.. في أمير سلفي بحوران
ما حدا بيعرفلو عنوان…ولا شافو إنس ولا جان
نزلت عساكر الوالي بدها تلقطو وتجيبو
وكل ما عسكري شاف حوراني،بيضربو وبيصيبو
كل واحد على كتفو طبنجة…نازل فيها طقطقة تقول عم يعزف ع الكمنجة
اي بس يعني بلا منقود…هدول بيضلو عرب..مو يهود
قصدي يعني مو اسرائيلية…مشان ما يفكروني عم سب اليهود ويقلبوها طائفية

بقا يا ريت تشفلنا حل يا سيادة المبعوس..شنو شكلو هالوالي لا فيه مخ ولا ناموس
وعساكر الوالي هاد طبل وهداك فدان…نازلين دك بدرعا تقول قاعدين بالجولان
وتلفزيون عم يجيب أخبارو من ضرب المندل…بدو يورجينا الديك حمار،والبسطار صندل..
وضباط ع كتفها نجوم ونسر،وشعب درويش شاف نجوم الضهر
ونازلين فيهن بها الدبابات…تقول شايفين البيوت مستوطنات
وضرب رصاص من الفرقة الرابعة…ما وصل صوتو ع حلب..بس وصّل ع السما السابعة
يلي عملوه ما عملو فينا جمال باشا…ولا عملو هتلر بيهود الفلاشا

بقا صفنلك صفنة قبل ما تجي وتتعتر…أنو أهلا وسهلا،بس القصة ما خرج تتسكر…
واللي خلا حوران بالدم تسبح،لا فارقة معو تركيا…ولا مخلي للصلح مطرح
بقا فكري خيو خليك بسطنبول…هدول لا خرجون مبادرات ولا بيفهموا بالأصول

تشكرات أفندم…
سلم على معلمك كتير السلام
وقلو الشعب السوري السلفي…رح يلعن رب النظام ..

2742011