عفس عفس أبو هادي

مع أني مكنتش ناوي…
بس نويت
والنية محلها القلب
وهالكم يوم صاير قلبي أقرب للكمبيوتر من حبل الكيبورد…
ما كنت ناوي جيب سيرة حزب الله
أنو قايملن موضوع المقاومة والممانعة ع جنب
وأنو الجماعة مو علاكين…وحرروا ارضن بالدم ورفعوا راس العرب
ع راسي…
بس بما أنو السيد أبو هادي بق البحصة اليوم،بحب قلو عن جد بهنيك يا سيد…
أنو ممنون أخت الساعة اللي قلت فيها انك بطل،وأنك بتوزع شرف على كل شي زعماء عرب
أنو اليوم وانا عم اسمع الخطاب شيتك…ما بعرف ما انفعلت متل العادة لما بيبلش يعلى صوتك وتحكي…
انو طلع معك انو كل الانظمة العربية مقفلة ما عدا النظام السوري مو مقفل؟
اسمحلي قلك ما حدا غيرك عم “يأفل”…
أنو خيو من يومين بس طلع ديني وقت شفت الفيديو اللي حرقوا فيه علم حزب الله بحمص
وقلت العمى قلبت طائفية،وما بيصير نتعامل هيك مع رموز المقاومة…
بس دقيقة تاج راسي…يعني ازا حرقوا علم الاخوان المسلمين لازم السنة ينبعصوا مثلاً؟؟
حزب الله وحزب الاخوان…هدول شغلتين بيعبروا عن اسلام سياسي وعسكري…
لذلك يلي بدو يقول الحكي على حزب الله بالعاطل هو حكي طائفي..بيكون هو الطائفي!!!
سيدنا ابو هادي…شفت فيديو البيضا شي؟
لما ما بتطلع عندك غير قناة الدنيا؟!
وقناة المنار اللي عم تجتر كل شي بتحكيه قناة الدنيا…
بالمناسبة طلع اسمك فيه…كان في حدا عم يناديلك
وشكلك…لبيت النداء
“عفس عفس أبو هادي”…ايه ايه ابو هادي…
شكراً ع التعفيس…
شكراً…
يا أبا الشهيد..
يلي ما اتذكرت شهداءنا بكلمة…
بتعرف شو؟رح وقف كتابة هون…
خسارة بطارية اللابتوب فيك…
في ناس أشرف منك بتستاهل ينكتب عنها