كنت ماشي على أوتوسراد الفيس بوك, و متل العادة مطنش مليون سؤال و مليون طلب للانضمام لـ (Cause) يعبر عني انو بدي يضل عمو ابو حافظ رئيس عليي و على بلدي و هادا الشي انا برفضوا بالتأكيد, و على الطريق بنزول شفت شبيح من رفقاتي مشارك صفحة (قضية) باسم
“The Revolution In Qatar | الثورة القطرية ضد حمد بن خليفة”
و حاطط الكومينت التالية:
(كل سوري بيحب الوطن و حر و بيغار على بلده و بيخاف الله و الروح الوطنية لازم يدرئ فتنة قطر علينا و يحارب هالكلب المجوسي الأمير يلي عم يسوق لفتنة)
ايواه, وصلت معكون لهون! ترموا فتنة بقطر!
فتت عالصفحة و إذ باكل صفعة على تمي تخليني آعد ساعة و ربع عم اضحك, بتفوت بتلاقي كلها جماعة منحبك و سورية الاسد معكون و اذا بتسألهون شو مو عاجبكون بيقلك مجوسي و دب و موزة (كلمات دون القضية إن وجدت!) و عم يحارب سورية و الاسد العربي الكبير الواعي اخو المهندس المظلي الشهيد الرائد الركن العقيد الواصل لعند الله حالياً!
يعني يا عمو ابو حافظ يا عمو ماهر و يا عمو علي و آصف و حافظ و ايهاب و رامي و حمشو و الله يعني من طرف الجيبة بتقدوا تعملوا متل ما عمل عمو رامي و حمشو بالدنيا وقت طلعوا 10 زلمة دقيقتين و قبعت كاميرا الدنيا!!
ما صار شي هلق طلعو ابو 50 هندي و لبسوهون عقل و مشوهون بالدوحة عالكورنيش و خليهون يرقصوا شوي و الله مؤثرة اكتر! بعدين البركة ما شاء الله معكون كم ليرة خصوصي عمو رامي شركة رامكو اذا بتطلع هنودك لحالهون بيمشي حالك و بتصير اكبر مظاهرة يا حجي ليش الكحتنة!
شوف عمو حمشو و الله ترى أنت مو مقصر! يعني الشعب السوري كلو بيشهدلك قديش خدمت القضية و حاربت وسائل الاعلام المغرضة و على نافوخنا فضلك, حتى بدب الفتنة بقطر تكفونت يا كفو و حطيت بحث و تقرير صحفي عن جمعة العزة القطرية, يعني قديش زلمة كبير و ما بيهمك غير القضية أنت و شريكك الغريواتي!؟ و على فكرة, ناطرين قصيدة عمر “الفرّا” فيك بعد ما وظفتلوا ابنو الظريف نزار أبو جرافة دهبي…
بالنهاية .. أنو ازا الشعب القطري حابب يعمل ثورة فحلال عليه…بس انو ما هكذا تورد الإبل يا حمشو ويا شبيحة…أنو كزبتو كزبة المؤامرة وصدقتوها وعم تعملوها عينك عينك…فكري ازا القطريين كانو ناويين على ثورة بيكونوا غيروا عقلون هلأ…سيدي ما علينا،رح نعمل ثورة بقطر انشالله…بس لما نخلص من نظامكن اللي بأيدنا…
