ليش لهل درجة ما منتحمل بعض؟
شو هاللئم؟ شو هالحقد اللامعلن؟ شو هالخوف المخبى من بعض؟
شو النطرة عالوقعة … شو هالتوعد؟ شو هالتمثيل؟ لشو هاد كلوهادا كلو مشان واحد ورت حكم هي البلد وراتة ؟
ولا امشان دين حاكمك؟ ولا امشان طائفة يا حرام مسكينة و معتازتك تناضل امشانا و تاخد بحقا ؟
امشان شو منكره بعض كسوريين؟
مين النا غير بعض؟ و شو يعني رئيس جمهورية لما يتغير ؟
ليش لنكره بعض؟
لأنو نصنا رافض بشار الأسد ؟ ليش مين هاد ؟ شو هو بالنسبة لسوريا ؟ بالنسبة لحياتك انت و عيلتك كانسان
عندك طموح و مستقبل عم يستناك
امشان شو منكره بعض هالكره ؟ مابدكن تعيشوا مع بعض؟ نقسمها يعني ؟
……………………
بشار شو هو ؟ مو موظف تحت خدمة سورية ؟
لك ليش عم تتعصب لربو او ربك ؟
امشان شو ؟ هاد الكره و المسبات العلنية و التوعد و القتل و اقتلهم يا سيدي و اقتلوهم يا عراعير و لنقتل الكفرة و قصف حماة و مشاهد موت من جديد و مشاهد فيديو رد على مشاهد فيديو و حارات مقسومة ببلوك…لك شو بدكن؟
لا عد حدا يجيب سيرة مؤامرات عنا مشكلة حقيقية هون كسوريين مو شايفينا؟
……….
معم نقبل بعض لك لييييييييييييش؟
امشان واحد خطابو ممل و سئيل و طويل و غليظ و أمثلتو تافهة و ولادية و بيستصغر عقول شعب بكاملو و بيقول سورية بخير ؟ “هادا اذا كان هو يلي كاتب خطابو”
و ماعمل شي بعشر سنين حكم فيهن متل قلتو بيوقعنا بمشكلة و بيضل كزا سنة ليحلها
و لو كان رئيس عادي فخلص وقتو انتهى مالو استثنائي و لا حتى 2%
…..
شو بدنا فيهن…عيلة الأسد و لا الشبيحة و لا المتطرفين و لا غيرن شو بدنا بهدول كلن
وين الناس العادية ؟ وين غالبية السوريين ؟ شو بدكن بهل المستوى الوضيع من التفكير الأسدي و لا العرعوري و لا غيرو ؟
هادا ديكتاتور و هدوليك متطرفين..انتو شو ؟
…..
نحنا كلنا من بلد متخلف بالنهاية اسمو سورية
نحنا متخلفين…سورية ليست نامية سورية بلد متخلف و يقبع تحت حكم أسرة واحدة كمان و تحكمه قوانين عشائرية
يلي مو قدران يستحمل طرف من الأطراف..امفكر اذا رأيو او حزبو او جماعتو انتصروا خلص؟
خلصت متل مابيكتبوا هدول يلي مو فهمانين الله وين حاطن
شو يلي خلص؟
نظام انهار بكل شي و يلي امفكر هي الثورة رح تخلص هيك و يبقا بشار و يرجع الامور متل قبل عم يحلم حلم دموي متل يلي امفكر انو هي الدولة ترجع اسلامية او سلفية او خلافة او شو مابدكن
شو يلي خلص؟ شو يلي رح يخلص؟
و باقي الناس شو رح يصير فيها ؟
لك ليش معم تعترف ؟ مانك قدران تتقبل حدا يشاركك بهي البقعة من الارض المسماة سورية ؟
بدك تقسمها ؟ كم دولة ؟ كم عرق ؟ كم طائفة ؟ كم متعصب لرئيس ؟ كم متعصب لمرجعية ؟ كم متدين ؟ كم لا متدين ؟
في حل أسهل و أسرع…خلي الكل يتشارك بحكم بلدو و خلي الرئيس يلي جاية مافي بإيدو سلطة مطلقة
و خليه يحكم أربع خمس سنين
اذا كان سيء الله بيقدرنا عليهن
خلي كل واحد على دينو الله يعينو
هي بيسموها مدنية يمكن
سورية مدنية … و رح تبقى مدنية و رح ناضل لتضل مدنية و حرة
و ليسقط التطرف و التعصب من عقولنا
…….
يلعن التخلف يلي ربونا عليه المتخلفين أبهاتنا
“مع عدم الاعتذار من الآباء”
بقلم: جمال داود
