الله محبة نقية و ليست انتقائية !!!

بما إني مسيحية فبدي مون على شعبي المسيحي بكل طوائفه اللامتناهية… و قلو وطيتلي راسي و نكستلي عقالي (بعرف انو بيقولوها الشباب بس لزمتني للضرورة الشعرية )

المهم… تضرب منك لالو على هالوقفة المخزية من احداث سوريا، قاسميلي حالكن ما بين صامت أو مؤيد… والي بشوفكن بقول ما شالله على أوضاعنا شو كانت يعني عال العال بوجود هالنظام… وكأنوا نسيتو كيف قرى بأكملها هاجرت لامريكا لتشتغل هنيك متل الكلاب… عذرا بس هاد التعبير الوحيد الي بوصف اوضاعن والي مو مصدق خليه يسأل عن ضيع متل فيروزة و زيدل الي كانت تصدر الاوائل لسوريا و كيف تحولت احلام شبابن لطرق الهجرة الملتوية للوصول الى بلاد العم سام وبناتن للزواج بسن ال 14 لشخص معو جنسية بلاد العم سام، وطبعا فيه لسى السويد و سويسرا، و بلجيكا ووووو.

نسيتو الفرص الي ضاعت عليكن، انتو اصحاب العقول المبدعة بسبب النظام الطائفي.

نسيتي ابوكي يا رشا الي تسرح من وظيفتو برتبة بلا شرف بعد 35 سنة كان يداوم فيها بمؤسسة تابعة لوزارة الدفاع.
يوصل قبل الآذن و يسكر المعمل بإيديه لانو ضابطة رفعت فيه تقرير لتاخد السيارة الي انفرزتلو … نسيتي كيف هرم وبين اكبر من عمرو 10 سنين بعد هالقصة بشهرين وكيف صار يعطينا انا وانتي درس بعدم الشغل بالوظيفة من قلب ورب.

نسيت خالك يا رائد الي كان لازم يتعين سفير لثقافتو و حنكتو السياسية و تم رفض هالشي و اعطاء المنصب لشخص تاني بسبب الطائفة و تم تحديد سقف لطموحاتو
هاد سقف غير سقف الوطن الي بشار بدو يعمل اصلاحاتو تحتو … وما زال البحث بالتيلسكوب جاري حتى الان عن هذا السقف!!!

نسيت يا اخي، عنصر الامن رضوان الي كسر قناني الكازوز قدام بيتنا و اضطرت امي تنضفن، بابا وانتي وكل الحارة ما قدرتوا توقفو بوجهو

نسيتو يا قرايبيني هجرة ولادكن المهندسين والجامعيين للخليج لانو راتبن بيكفين بس 5 ايام من الشهر ولا بناتكن الي ما تزوجوا لانهن مو موظفات !!!

بجوز انسى موعد…. بس انسى ماضيي و حياتي ومستقبلي فهي صعبة كتيررر و انتو تخنتوها بصراحة

اصحوا بقى من اوهامكن الي صارت بلا طعمة … انو والله المسلمين بعبع بدن يدبحونا و يشربوا من دمنا … وبدن
يعملوا تطهير لسوريا منا !!!! وكأنوا قاعدين على قلبن نحن !!!!

وكأنو المسلم معاد فيه يصلي او يصوم وجارو مسيحي !! لك شبكن , ارجعوا لماضيكن مع ولاد الحارة , تذكروا ضحكاتكن مع رفقاتكن بالجامعات على بناتنا و بناتكن و بتعطونا ومابنعطيكم و اعجاب شبابن ببناتنا و اعجابنا برجوليتن

بس بعمرها ما تجاوزت هلحدود أو وصلت لمرحلة نفكر ندبح بعض … رجعوا اقرأوا تاريخ سوريا الطويل مو بس من 40 سنة و شوفولي شو كانت قصتو لفارس خوري

والي بيستشهدلي بمسيحية العراق شو صار فين، يعني عدا عن تخاذلن كمان من مقاومة الامريكان و عدم سماعنا لاي مقاومة مسيحية ضد المحتل، فانقتل منن بالظبط تمانمية و خمس عشرين مسيحي في حين انقتل من العراقين من بدء احداث امريكا قرابة المليون ونص، فوين المجازر!!!!

بدن يعملوا سوريا امارة اسلامية…
ما فهمت شو معنى هالتعبير … انو بدو يصير عنا خليفة و مجلس شورى مثلا !!! .. ولا بدوا يصير عنا بدل البوطي كذا بوطي و بنفتح فين معمل أحذية وكالي اماراتي سوريي حصريي !!!

حااااج صمت وحاج عازلين حالكن عن حركة الشعوب … انتو الكن بسوريا متل كل سوري و مسؤولين عنها … تمثيلية المستضعفين والحيادين و انتظار الأخرين ياخدوا موقف عنكم صارت مملة و قديمة وقفوا ولو مرة وقفة حق مع شعبكن السوري، مع الحراك الشعبي الي بعبر عنكم و عن مشاكلكم تجاه نظام ما عندو اي نية للاصلاح او ايقاف سرقة ثروات الوطن الي هي من حقكن … وقفوا مع اخواتكن السوريين على اختلاف طوائفهم و خلوا قلبكن ينبض بنبض الشارع و روحكم تعانق روح الشهدا الي ماتوا منشانكن
وبالأخير بدي قلكن : الله محبة نقية وليست إنتقائية !!!
سوريا قامت ………………. حقا قامت 🙂

طبعا بستثني من هاد العتاب :
الشباب المسيحي الي شارك بالكلمة او بالمظاهرة الشعب السوري

الشب المسيحي شادي الي بدوما
الي كان يروح على الجامع بس ليطلع بالمظاهرات و الي لمن اتصاوب و صاروا يقولوا
تشاهد تشاهد، قلن ولك أنا مسيحي و ضموا رجل وهابي و قلوا بدي بوسك بين عيونك

العيل الي رشت بالرز و بالورد
مواكب الشهدا بالحميدية بحمص و العيل المسيحية بدرعا الي فتحت بوابها وعالجت
جرحى المتصاوبين و هربتلن الاكل و شاركت بالخطابات ضد النظام

مستوصف فيروزة الي استقبل جرحى
حي عشيرة وعالجن وهربن من الامن بعد سماعن لقتل الجرحى بقلب المستشفيات بمدينة حمص

شكر لكل مواطن، حط طايفتو على جنب وقال انا سوري و الي مع الحق وقفة ولو بدها تكلفني روحي

بقلم: شذى