!آآآآآآآآآآآآآخ يا سورية! وسخك طفا للسطح

أنا اليوم مو الكاتبة اللطيفة اللي بتراضي هاد و بتطبطب على هاد و بتقول كلنا أخوة و كلنا حبابين! لأ أنا اليوم رح تكرهوني و يمكن تسبوني بس يمكن كلكن توافقوني الرأي. أنو سوريييييييييييية! سورية ..الرائعة… قلب العروبة النابض من وين عم تنتج كل هالوسخ؟ كل هالأوباش من وين عم يطلعوا؟ بدكن الحقيقة؟ أنا زعلانة كتير من سورية و خايفة أرجعلا حتى بعد الثورة. شلون بدي أرجعلها و شوف سائق التاكسي و صاحب الميني ماركت و مدير المطعم و أعز أصدقائي و أنا مالي متأكدة مين فيهن كان يسلم المتظاهرين السلميين للأمن بإيدو؟ شلون بدي بقى أتفرج على مسلسل سوري و يطلعلي ممثل حقير عامل حالو ناقد اجتماعي و لابسلي ابتسامة الطيبين و أنا بعرفو كان عم يسب المتظاهرين حتى بعد ما ينقتلوا و يوصفن بالحثالة و المخربين؟ شلون بدي أمشي بشوارع حلب أو حتى اللادقية و أنا عم بتلفت حوالي يا ترى هي الصبية كانت من معجبي ماهر الأسد و عاملو صورتو صورة بروفايلا؟

http://www.facebook.com/Colonel.Maher.Assad

هل يا ترى كان هالشب أبو العضلات شبّيح و مفتخر بتشبيحو؟ شوفولي هالموقع…أمانة للي حابب يعمل بطاقة تشبيح لا يستحي ها! و الله كنت مفكرة كلمة شبيح مسبة…طلعت مفخرة!

http://www.souriabkheir.com/showthread.php?p=8431#post8431

شوفولي هي الصفحة! فيها 6600 من معجبي ماهر الأسد! ولك العمى! العمى! مو هاد اللي قالوا عنو المنحبكجية أنو هو السبب بالوحشية اللي عم تصير بسورية و انو أخوه بشار مسكين و مخدوع و مالو علاقة؟ هلق صار معبود الجماهير؟ وللا مين ما كان المهم ما بدكن حرية؟
لا و الحرامي ابن الحرامي يللي حتى المنحكجية كانوا يسبوه و يحشكوا عليه صار أبو الفقراء؟ لك كيف و شلووووون؟ يا ناس ياهو مو هاد الواطي اللي عم ينهبنا كل ما دقينا تلفون؟ مو هو اللي تملك الدولة كلا و ما حدا بيسترجي يقلو وينك؟ مو انتو كنتو تقولوا رئيسنا كتير حباب بس رامي مخلوف حرامي و ماهر سفاح؟ نسيتو كل هالحكي و هلق صار منيح؟ لك فكروا شوي ..من وين الو المليارات؟ لك في 3500 شخص بيحبوووووووووووووه! و هدول فقط من مستخدمي الفيس بوك! يعني عم تجاكرونا بس جكر و للا عن جد بتحبوه؟ عالسرقة؟

http://www.facebook.com/RamiMakhlouF1

و اللي صادمني بس شوي عن جد أنو في من السوريين بيكرهوا القراءة. و أنا كنت بعرف بوجودن من قبل وما كتير بلومن من كتر ما حث نظامنا عالثقافة ماشاءالله! بس اللي بيقهر أنو بتبعتلن شغلة يقروها ليفهموا وجهة نظرك و بدون ما يقروها بيجادلوك فيها. يعني شي قسما بذات العزة بيجيب الجلطة.
هلق اللي صادمني كتير كتير هو زفارة لسان بعض السوريين! من الطرفين بس من المنحبكجية أكتر بكتير. يعني أول مرة بسمع كلمة نابية على التلفزيون ..هي من شبيح سوري عالجزيرة. وقف شعر راسي و انحولت. عم بسمع كمّ من الشتائم هائل. بعمري ما سمعت كلام بهالبذاءة بهالكترة بهالوقت القصير. يعني شي مقزز. و أنا و الله مو سينييه كتير ها! يعني عايشة كنت بحارة شعبية!
بس يللي صدمني أكتر شي و رح تبقى معي هالصدمة لآخر عمري هو أنو في إنسان بالعالم ممكن يعمل بأخوه الإنسان هيك. شلون بيقدر حدا يحط شبابنا و يعذبن هيك؟ واحد بيعذبوه لانو عمل مناشير و التاني بيعذبوه لأنو بسيارتو مكبِّر صوت! أنا ما عم بقدر أتخيل شلون في حدا قلبو بيطاعوا يمد ايدو على وش آدمي و يطالعلو عينو من محلها؟شلون بيقدر يسلخ جلد بني آدم؟ هدول جوات صدوره في قلوب و للا حجار؟ و للا صدورن فاضية؟ ايش ممكن تقول لإنسان أو كيف ممكن تشحنو بطريقة تخليه يقلع أظافر إنسان؟ هدول الناس سوريين؟ يعني عن جد أكلوا فول و حمص متلنا؟ و بيشربوا شاي كتير متلنا؟ و تربوا معنا بنفس الحارات و حبوا نفس الأغاني و أفلام كرتون اللي كنا نشوفها؟ لكن شلون طلعوا هيك؟ شلون سورية وصلت لهون؟ ليش ولا الدولة من الدول العربية حَوَت نفس الوحوش؟
والله يا سورية ما عم بعرفك!
أنا آسفة كتير على هالكلام يللي يمكن ما تلاقوله طعمة حاليا بس أنا مشدوهة!

by RamaPanorama