بالمدرسة في كتير مواد كنا ندرسها
عربي موسيقى تاريخ كتابة قصص جغرافيا قو ميية…رياضيات
وأكيد كان في مادة مفضلة لكل طالب ومادة سيئة مثل الرياضيات بالنسبة لإلي
درسنا…. إلي ترك والي نجح والي كمل
المهم كان في مادة كتابها كبيــــــــــــــر
ما كان يخلص وكان ما في تخرج منها
ليش ما بعرف….!!
بدرسوك ياها من وعيتك… لتموت
مع انو انت بتحفظها من أول فترة بس هنن حريصين على انك تكون من المجتهدين فيها
وماشالله علينا كلنا كنا من المتفوقين
المادة شفافة ومرنـــــة لدرجة انك بتدرسها بدون ما تعرف وهي المادة ما إلها مكان لتدرسها
يعني وين ماكان موجودة
طبعا ما إلها حصة معينة
والحلو فيها بتدرسها مثلا بشغلك وأنت عم تاكل وأنت ماشي عالطريق
وأنت نايم
عم قلكون مادة ولا أحلى من هيـــك
يعني 24 ساعة بتتثقف بهالمادة
طبعا بدون ملل يعني هي المادة لا يمل أبدا
من أهم دروسها
عيب ماما شو هالحكي….!!
بيجوا بياخدونا…!!
أصحك…!!
بروح بالدم…وبس!!
وطي صوتك الحيطان إلها ادان…!!
وكمان هاد درس هام
بس نوصل عالمدرسة الساعة 7 برد كتير
بيوقفونا بالباحة وبخلونا نردد أمة عربية واحدة ذات رسالة خالدة
وحدة……….حرية ….اشتراكية
طبعا هدول الدروس أهم دروس يعني هنن أساس النجاح بالمادة مع العلم وأنت عم تقول هالحكي ما بتتمعن بمعناها
لأنو هي المادة بتمنع التمعن يعني حفظ وبس
متى حفظتهن هانت المادة عليك كتير واعتبر حالك من المتفوقين الأوائل
تعلمنا آلاف الدروس طبعا انا ما عطيت كتير امثلة
وكبرنا وعششت المادة بدماغنا
وكل ما تكبر بتتكثف الدروس للمحافظة على مستواك بامتياز
طبعابس تكبر بيعطوك شهادة بتقدير ممتاز مافي لا بأس
لأنوكلوا شـــاطر باستثناء الكسالى إلي بيطردوهن من المدرسة حتى ما يأثروا علينا
هدول جماعة الفهم والتمعن وما بحبوا الحفظ
مبروك لقد نجحت وترفعت إلى درجة المواطن الصالح يعني بالعامية المنحبكجي
طبعا هون بتكون انفتحت بواب السما عليك
يعني بتمشي رافع راسك…أنا مواطن صالح
وللتأكيد على صلاحيتك بتمشي بلزق الحيط هي من أساسيات النجاح
وطبعا بعد هالمرحلة العليا من الدراسة بصير معك دبلوم بهالمادة
يعني بتنسى كتير كلمات أو بالأحرى قاموس عقلك بقلك هذه الكلمة غير موجودة
مثلا هالاسئلة: ليش غليانة الأسعار؟
كيف طلع بدون انتخاب؟
لوين آخدينوا؟
عندك بيت؟؟
كيف عايش؟؟
من أين له هذا؟
وبعض الكلمات طبعا كتيرة شوي بس رح نعطي أمثلة
سياسة…
قمع…
دولة …
دوائر حكومية…
الحالة سيئة…
يلعن هالعيشة…
بالإضافة لنفي قواعد التذمر مع النهي والتأكيد
يعني كلنا طلاب بالمدرسة متفوقين مدرسة الحياة طبعا
باستثناء بعض الطلاب الكسالى طبعا هدول مخضرمين بالكسل
بيتذمروا…بيلعنوا …مافي شي بيعجبهن
بيسألوا كتير وبنكشوا بالأخبار وبكل القصص
وبينطروا المادة على غلطة….. المادة الي عم نحكي عنها يعني
بيرسموا ضد المادة …بيكتبوا ضد المادة…بغنوا ضد المادة..الخ
مابعرف كيف ماقدرت تفوت هالمادة لدماغهن
حتى طلعوا كسلانين ورسبوا بالمواطنة الصالحة
و رسبوا بالقومية
وفي كسالى جداد كتبوا عالحيط من الممنوعات الممنوعات يعني مو هيك
مع انو كانوا شاطرين هاااا
بس شو صرلنا بلشنا نتراجع بالدراسة ونتكاسل شوي شوي
حتى صرنا من الراسبين ….!!
وفي ناس لساتها عم تناطح مع المادة
وبعدها منحبكجية للعضم
طيب إذا هنن منحبكجية يعني نحنا منكرهجية مثلا…!!
كل القصة انو اكتشفنا بهالمادة ….طبعا بكير عالاكتشاف نستنى بعد شي مية سنة تانية بس المهم اكتشفنا
انه اسمها القيد
طيب للحظة فتحنا مخنا و قررنا نفكر بالحرية طبعا بعد استخارة
عملنا مقارنة بسيطة بين القيد والحرية
القيد شي كتير سهل تحصل عليه يعني بتاخدوا بالرضاعة ومن جينات أبوك الوراثية
لهدرجة سهل بس قديه صعب تغيروا؟؟؟
الحرية شي كتير صــــعب حتى انك تفكر بالحرية بتحس بخوف وفرح احساس غريب
بس كمان انك تنال شهادتها صعب وصعب كتير
لأنو مادة القيد تدريسها أمكن وارسخ ببلدنا
بس أنا بالنسبة لإلي مستعدة عيد أيام دراستي طبعا بالحياة
سنين وسنين حتى أتعلم مادة الحرية
بدي صير كسلانة متل الشخص الي بروح على فندق الشام بيحكي بأعلى صوتوا بيلعن بدون خوف
و فوق هيك بيعطوه ورقة ليجسد لعنتوا عالورقة
اكيد هاد الشخص هو الكسول المخضرم الي عطاني أول درس بالحرية
و دخلني على بلد غير بلد القيد
شفت سوريا عم تطير بالسما وحيدة
بدون فرس وحشية …بدون جوانح غريبة
شكرا لأستاذي الكبير..
السيد علي فرزات
نجحت وصرت من الأوائل بمدرسة الحرية
الي أنت فيها من أعظم المعلمين…
عقبال كل المجتهدين المقموعيـن…
مهداة إلى فنان الكاريكاتير الأول: استاذي السيد علي فرزات
————————–
بقلم لبنى زاعـــور
