قصة اعتقال" بخاخ الكتروني"

(قبل ما يشحطوني … بشوي)
لمينا الشباب متل العادة . وعالتراويح ..

وين ما وين …. صَد ورَد .. المهم تم الاجماع على جامع مرتب .. يعني طالع طالع

وصلنا كنا خمسة .. خمس شباب كلو اصلي وعتيئ بالمصلحة (مصلحة التظاهر يعني) 🙂

ونحنا فايتين تفاجئنا بالعدد الضخم تبع الحيوانات المفترسة يلي فلتانين حولين الجامع

طبعا امتعض كم واحد … والكل انئرء (انزعج) بس شو بدنا نعمل ما باليد حيلة

صلينا العشا .. ومخنا كلو براااا .(الله بتقبل) :).

بلشت النرويح .. والوتوتات شغّالة بين الركع .. وكل ما نخلص ركعتين يصير اجتماع تشاوري بين كل شلة

جانب من الاجتماع بعد الركعة السادسة

“شو شكلهم مستكلبين .. شو بدنا نعمل ..؟؟؟ والله إذا طلعنا بدو يروح شباب كتير .. اي والحل ؟؟ يلا فكرو عالسريع .”

اقترحت انو نحاول نسحب الشباب لغير مكان .. وتم الاجماع .. وشكلنا لجنة مشان يخبرو العالم

خلصنا التمانة … وبوشنا لبرا .. عالبواب بلشنا نخبر الشباب .. وبالفعل حسيت انو الموضوع نجح

هون انا تركتهم ومشيت باتجاه المكان المنشود … وإززززز.. بينط واحد من على باب الجامع وبيطرء وحدة (تكبييير) 🙁

وطبعا متل المغتاطيس .. التمت العالم وبلشت المظاهرة .. انا بهاللحظات اتفقدت رفئاتي وانتبهت انو في منون فاتو فوتتون ..و بدون ما فكر شكيت معون .

يمكن 3دئايئ … كان القائد العام للشبيحة اعطى أمر الانقضاض عالعدو |يعني نحنا|

طبعا استفقدونا بكم وحدة غاز 3 يمكن ,,, مدري 2 ونص ..!! لأنو في وحدة رجعناها ما عجبتنا بس كنا شامين نصا 🙂

المهم انا هون ما بركد … بحاول اني كون ريلاكس وانو انا ما دخلني … وبمشي بين الكلاب بشكل طبيعي ,

بس يا فرحة ما تمتش .. 🙁

##########################

(وحاصلو … بخاخ في طريقه للأسر 🙁 ..)

كمالة الئصة
كنت عم ئول يا فرحة ما كملت 🙁
بالفعل ماااا كملت ..

عم اتمشى بين الكلاب وأموري بخير واوضاعي سليمة,,,, ويا غافل إلك الله …. سيارة تكسي صفرا وائفة,, بعيدة عني شلفة حجر .. بينزل منها شب طويل أشئوش(نحيف) , وأسمر وبيركد الركدة اللعينة هربان من الميليشيات الأسدية يلي كانو لاحئينو…. بس هو اسرع منن (حلاوة الروح طبعا) .. وجاية باتجاهي … ورجليه عم يدئو بميزو من الركد :)….

المهم قبل ما يوصل بشي 10متار بيغافلو سنفور شبيح (شبيح زمك) كان لاطي على جنب,, وبيسلخو هداك الزء (فركشو) وراح الاسمراني سطيح وشحط بالارض شي خمس ست متار .. ويا ستّار ..

اللـَّــــــه لا يوريكم فات راسو بالرصيف وكفت الدم وبخاخ طار عئلو ……. 🙁

بيني وبينو شي مترين حاولت طخي لأرفعو (حركة لا إرادية) كانو وصلو ئبلي,, دفشوني ومسكو هالمجرم الخطير يلي عم يهدد (الأمن القومي والوطني والأسدي) المشهد أشبه بحلقة عالناشيونال جيوغرافيك لما تنقض مجموعة من الضباع القذرة على حمل أبيض وديع … ( صعي على سيرة وديع … الله يلعن أبو وديع ..لأني متزاول منو كتير)

هالمسكين صار دمو حميمو .. بس هنن حالفين يمين على جميع الكتب السماوية والأرضية وحتى الخليوية(سيرتيل وام تي ان) انو لما يمسكو حدا لااااازم يضربوه … مشان هيك ما بينلامو يا شباب حرام … هي ||عقيدة|| ..ولازم نحترمها لأنو منيحة كتير لإزالة الشعر غير المرغوب فيه 🙂

سناولو بأول ضرب والتاني … كمان على راسو .. وهو عم يصرخ بالولي ..هي اللحظة أنا كنت مسلّم النمر وخالص .. يعني فصلت … وصرخت صوت فيهم … لك شبككككككم لعمة .!!؟؟ ما مسكتوووا ..؟؟ ليش عم تضربو .. طبعا الصوت كان اشبه بجعير لأنو كان طالع من جوا… وبالشامي ( من زميم عئلي)

هاد كان أخر مشهد بتذكرو قبل ما أكل ضربة على راسي ورا ادني مباشرة … فقدت وعيي لمدة 30 ثانية تئريبا … وصحيت وانا مشحوط عالأرض من ايديي ومتجهين فيني عالباص …مدري عالهونداية ؟؟.. لأنو حسيت حالي ||كيس بصل || مشحوط بنص سوء الهال بالزلبطاني ..

لما صرنا جنب الباص اجو تنين شبيحة اختصاص عتالة حملوني من رجليي هيك صرت معلق بالهوا .. ولتقريب المشهد كان اشبه بيلي بيحطو يالافلام الاجنبية لما قبيلة من الهنود الحمر بتخطف زلمة وبيحملوا مشان يشوو وياكلو عالعشاا :((

طبعا انا ما ورجيتهم اني صحيت أملاً بتخفيف الضرب لأني اكتشفت من الوجع يلي شعرت فيه انو انا لما دخت هنن كملو ضرب والدم عم يشر من انفي .. وحسيت ادني فيها مي وكأني كاين بالمسبح وشاككلي شي 50 مرة رواسي ,, بس اكتشفت بعدين انو ادني كانت عم تنزف كمان.

المهم .. الله يجزيهم جهنم هالشبيحة ما ئصرو يعني توصيلة ببلاش .. … لما وصلت على مركز التجمع حطوني بالارض وهون صرت اسمع ولويل وصريخ .. نسوان ورجال .. لأنو شكلي كان مبين انو خالص .. منتهي يعني كأنو ما زاد بخاخ.

كتو علي مي مشان اصحى وبلشو يئولو للعالم ماحدا ضربو….. ما حدا ضربو .. وواحد صار يئول(( آآفي شي الله وكيلكن آآفي شي يلا كل مين على بيتو عم قلكين آآفي شي) الله يلعن هااللهجة بصرماية شو كرهونا فيها (لا تزعلو مني رجــاءً .. بس بكرهها)).

لما صار يئول هيك للعالم حسيتو قناة الدنيا لما تنفي الخبر وهو عم ينعرض بكل قنوات العاالم

المهم انا هون بلشت صحصح ووئفت على رجليي .. طبعا مدودخ .. بجيّة زعيمهم .. ومع اصرار واحد كان وائف هنيك انو يتركوني خلوني روح يعني فلتوني .. صرت صرت أمشي متل السكران من عزم الضربة يلي أكلها …ئطّعت الشارع .. وكان همي بس اني بعد عن المنطقة …

لما وصلت عالطرف التاني … سمعت صوت شبيح عم يئول ||جيبو جيبو || واكتشفت انو انا المطلوب..

لهون اليوم بكفي وبكرة الحلقة الأخيرة لأنو ما زاد حيل اليوم سامحوني 🙂

ولا تواخذوني لأني طولت .. بس عم حاول أوصف الحالة متل ما صارت بالضبط
يتبع ..

##########################

وأخيرا عبّوني …. وربي يسر

كمالة ئصة أولت مبارح .. لاااأ أولت أولت مبارح 🙂

كنا عم نئول انو سنيور شبيح … صرخ بالعناصر… جيبــــــو … انا بعد ثانيتين اشتلئت أنو انا يلي جيبو 🙁 .. طلّعت لورا لئيت الاعداد يلي هاجمة كبيرة … لك كتااااار يخرب بيتون … والله ما عرفت شو بدي اعمل …

صفنت شوي |: .. لا والله ما صفنت بدون ما اصفن ..هروب يا ولد ….. ويا فكيك ونننننن … سلختا الركدة اللعينة … هون تحرك الجيش الاسدي كلو باتجاه فلول العدو السورياني الغاشم .. :((

بس واحد من المقاتلين المرّيين صرخ فيني وئللي ((وقف ولااا وقف … بقوصك ها )) انا هون عنجد صفنت بس انا وراكد , , لعمة والله ئلي بقوصك .. لا لا ما بيعملها مو حرزانة.. ما كملت صفنتي ... اشتغل ضرب الفشك .. 3 رصاصات .. للأمانة ما شفت ولا وحدة .. شكلو ,, إن كنّا بدنا نحسّن الظن بالزلمة انو ما كان ناوي يخلص الفلم برصاصة وضربهم بالهوا .. الله يعين هالهوا شو بدو بيتحمل ليتحمل .

مالكم بالطويل ..ركدو ورايي وجــــابوني 🙁 .. مع اني ماشي حالي بالركد .. بس مطرمخ من الضرب وراسي عم يفتل .. شي 15 عنصر يلي وصلو لعندي وعم يلهتو متل الكلاب .. انا ما عم الهت لأنو كان نفسي مئطوع ودوبي عم اتنفس .. طبعا بدون ما حدا يحلف عليهم .. الكل صار بدو يآجر بضرب هالحقير يلي مطلوب من 20 سنة وعليه 600 قضية ومحكوم إعدام ويللي بيمسكو بياخد مكافئة زبريار ليرة ..

هالمرة شحطوني هالوائف .. رجعنا لعند زعيم العصابة لأنو انا كنت عم حاول اني فهمهم انو معلمهم فلتني من شوي .. طلع فيني (شيخ الشبايحة) بنظرة الانتصار .. ||انو بجيبك ولو سحبوك العالم|| ,, وأشر براسو للقطيع يلي حوليه,, انو خدوا عالباص …

فتت عالباص.. اخدو موبايلي وهويتي .. وبعتولي واحد يتوصى فيني .. ربط ايديني وراني ببلاستيكة وشدا عالاخير .. كان التاني عم يبحبش بالموبايل .. طبعا شاف مقطع الفيديو تبع المظاهرة والله يرحمك يا بخاخ 🙁

فات لعندي .. بدون مقدمات كفكفة .. وبوكسات مسبات كلكم بتعرفوها .. واتهامات شي عاملو وشي مو عاملو بدي اضربو (على اساس يعني ).. بس الجحش كان عمرو شي 50 سنة … لك كبير مو صغير يعني ما بينضرب :) جابو بئية المجرمين عالباص… اتدحكلت لجوا مدري شلون ئلبت وتشئلبت وصلت لأخر كرسي … فات واحد معو سلاح وسئل وينو تبع الفيديو … وحط السلاح براسي … هون بس اكتشفت انو جفت عين وحدة . طبعا عتمة لأنو منزلين البرادي وصار يهددني انو بدو يخردئني إذا ما بعترف …
شي 10 دئايئ … شي فايت وشي طالع ..الكل عم يضربني .. وانا ساكت .. .. مدري شو صرلي سكتت .. وماعاد حسيت على شي وكأني بمنام ..

فجأة بيفوت واحد وبيشحطني لتحت وبيركبني بمكرو صغير .. (مكرو تبع العشرة .. واحيانا خمسة إذا بس عالدوار الأولاني) متلو بس مالو كراسي ,..بس كرسيين جنّابيات طوال وشلفني بالارض وفاتو ورااي 4 حيوانات.. بس مو أليفة منوووب

مشان الاختصار .. بدون تفاصيل اللي صار عالطربئ من ضرب وتنكيلوصلنا للفرع نزلت .. استلمني باكيرا … بيشبه باكيرا صاحبو لماوكلي 🙂 ..ساعدني لأمشي لأنو كان شوي صعب الموضوع عليي.. فتت لجوا أول شي اخدو الئشاط … والشواطات لك كلو بكفة والشواطات بكفة .. لأنو انا اساسا شاري البوط مشان الشواطات .. هيك …مرائي انا بالشواطات,,, صعب…المهم راحو

وفتشونا بالزلط ..اي بدون شي .. ( ربي كما خلقتني ) معليشي .. كلو فدا الثورة 🙂 .. يعني مو كلو كلو |: … لأنو لازم يضل شي كم شغلة ساااغ مشان نستمتع بالحرية بعد ما يطير الطير وانتو بألف خيـــر 🙂

استلمو الغراض .. حطونا بغرفة .. كنا شي 20 .. الكل وشو عالحيط .. وراسو مطخي لتحت ..

هون انا هديت شوي وكنيت بس اكتشفت انو رجلي عم تنزف كتير ,,, لأنو حسيت بالدم عم يخض ببوطي.. اعدت بالارض وكشفت عالجرح ,, صرخ فيني صوت (قوم ولا حيوان قوم وقف) ما رديت وطلعت فيه وئلتو ما فيني وئف رجلي عم تنزف وبدي اغسلها ..

غط شوي ورجع ئلي (قوم ولاك غسلها ورجاع) .. رحت ورجعت .. لئيت الدكتور بالكردور … عم يشتغل بالعالم ..منظر فريد .. دكتور فارد العدة بالكاريدور وعم يخيط ويعقم ويصلح بهالعالم … على فكرة هي من إنجازات الحركة الكاريدورية المجيدة…

خيطلي الجرج ولفو ,, وصار بيني وبينو نقاش .. كانت نظرتو استياء .. بس ما ئدر يحكي يلي بئلبو .. وأصر انوخرجي الله لا يئيمني لأني بدي اسقط النظام …..

لك بدي أعرف شو بيعنيلو النظام .. وهو ملحوش بأرض الكردور وعم يمارس مهنتو يلي مفروض تكون بمستفشى أو عيادة ..

مالنا فيه يصطفل.. رجّعوني عالغرفة وبعد شي ساعة نزلونا لتحت .. وتحت .. وتحت

وبلش الظلام .. ونام بخاخ وبكرة ان الله راد منسكر الئصة يلي ما كانت تخلص يخرب بيتها .. تنذكر وما تنعاد

يتبع …..

##########################

أوّل الرئص …… طيّارة

كمالة السيرة يلي ما كانت تخلص….

رفئاتي حبيباتي يلي نئرتو راسي بشان كمالة الئصة 🙂
سامحوني بس والله من هالاحداس يلي عم نشوفها ما عم تجي الئابلية عالكتابة..

وين كنا !!!؟؟…………….. اي عندما دحكلونا عالدرج ….

ونحنا نازلين ناولونا طيارة طيارة عالماشي .. بس مو اي طيارة …!!! هي تبع يلي بتحس البصلة السيسائية انشكت بسيخ اللحمة وصارت عالمنئل .. طبعا هي اصول الضيافة 🙁

رتل واحد راسنا مطخينو لتحت وعيوننا بالأرض ويا ويلو يلي بيرفع نضرو 🙁 ..لاحظو شغلة هلأ هي الحركة الذكية يلي نحنا مو عاطينا أهمية, بتنفّد عالحركة الكاريدورية ,, “يلي حكينا عنا المرة الماضية”… وهي سبب رئيسي برفع راس سوريا بين الدول .. يعني نحنا منطخي لتحت وهنن بيرتفعوا لفوء .. نسبة وتناسب … سدئوني مو عن عبَس منوب.

لبين ما وصلنا عالمهجع كانو نائريننا ستميت عبارة من تبعات (عراعير ..قديش مَيعطوكن تَطلعو بالمظاهرة..بدكِن تسقطو النظام ….الخ ) ومن هالعلاك المصدي يلي ملينا من سما.

طبعا انا كنت عم امشي وواحد ساندني .. وعم اتعكز عليه لأنو أمور المتورجل تبعي تعبانة .. وشكلي بدي تنزيل محرك :))

مالكم بالطويل وصلنا عالئآووش…. فتحوا الباب ((فوتو ولك حيوانات .. يلا ولااك)) عرفتوها هي الولاك ؟؟ .. “هي يلي بتنلفظ فيها الالف الاخرانية ئريبة لحرف العين شي بينفد عالجعير تئريبا بس على ألعن” لا تصفنو فيها كتير .. مو ضرورية 🙂

المهم فتنا كان المهجع صغير بالنسبة لعددنا .. وكان في اربع زلم بس ,, ولما فتنا نحنا عبينا المكان عالشّفة .. تفليل يعني,, الشباب استئبلونا وما ئصرو والنعم منهم .. وبما اني اكتر واحد متضرر, زبطولي بطانية عالارض مشان اتسطح وشربوني مي وشكلسولي أموري وآخر روااااء وكأني بالشيراتون ….

وبلش الهمس بين الشباب الاربعة .. وكم واحد من الجداد ليستفهمو منهم ( انا بعدين اشتلئت انو أهم شي بالنسبة للي جوا يعرف الأخبار) ..

كان الوئت متأخر, يعني ئريب الفجر أنا نمت شي شوي , ما بعرف اديش .. بس لما فئت حاولت جلس شوي بكعاب ايديي وعملت ناضور عالشباب …. وما بذل عليكم 🙁 .. متل الجـــــــاج .. إي حاااااج 😐 (( لااااااا سيدي مو حاااج )) الله وكيلكون حسيت حالي بمزرعة خالي .. بنص ئن الجاج وهنن نايمن بعد المغرب … طبعا الكتف بلزء الكتف .. واكتشفت انو رجليي دائيين بزلمة نايم بالعرض وراسي بينو وبين الحيط ميليين .. يعني مو خرج لا أرب,, ولا انرييه..

ضليت صافف :)) .. ئصدي متسطح .. حاولت ئوم .. تعذبت من الوجع .. حس عليي واحد من الشباب,, ئرب يساعدني .. كنت ئمت لحالي,,, عطشاااان بدي اشرب .. سئلتو أدن الفجر هز براسو ويـــاريتو ما هز 🙁 .. هز لتحت ,,يعني اي… ئلي شراب ماعليك حرج (اصدو لأني مريض).. انا ما ركبت معي اني افطر .. فتت توضيت .. ورجعت صليت عالأعد …..

ونمت … عنجد نمت عالكيبورد

بدي أكتب كمان بس مرهق وصارت الساعة 8 الصبح ومالي نايم

بس وعد ان الله راد الكمالة بكرة .. أو ئبل بكرة .. منشوفكم على خير 🙂

—————–
المصدر: حلاوة و زيتون – لتجمّع المعتقلين السوريين