نص الحلقة الرابعة من ثورة بلابورايد- اذا اعتقلوك شو لازم تعمل؟!!

نص الحلقة الرابعة (مكتوباً) من سلسلة ثورة بلابواريد التي تصدر عن مجموعة قمح بالتعاون مع أيام الحرية…

مرحبا..
رح احكي بهي الحلقة عن الاعتقال من البيت أو من الشارع أو اثناء المظاهرة.. شو لازم تعمل.. كيف لازم تتصرف.. قبل الاعتقال.. اثناؤه .. شو اللي ممكن يكون ناطرك جوا المعتقل؟.. وشوية قصص تانية ..

بس تطلع بالمظاهرة رح تكون مهددّ بالاعتقال بالتّأكيد ومتل ما على طول منحكي انو الشب أو الصّبية فينا وقت بيطلع بمظاهرة ببلد متل سوريا بيكون بنفس الوقت حاطط روحو على كفو كرمال الكلمة اللي بدّو يهتف فيها… لازم تكون آخد بعين الإعتبار إنك رح تكون عرضة للضّرب أو القتل أو الاعتقال

بس يهجمو.. عليكون ويمسكوك لا تستسلم وضل عيّط واتحرّك ودفّش فيهون، لانّو ممكن بأيّ لحظة تنفد منهون.. لا توقّع حالك على الارض قدر الإمكان لأنو اذا وقعت رح يتكاترو عليك ويضربوك.. وما تترك اي شخص يوقع بين ايديهن بسهولة يعني اذا انمسك حدا من الشباب حاول تتجمع انت وكم شب وتخلصوه من ايديهون.. خبيط قتل شحط ما بعرف ..بدكون تخلصوه يعني بدكون تخلصوه!!!
عم تصير كتير.. كل يوم وكل ساعة عم يقدرو الشباب يفلتو بعض من الاعتقال بها الطريقة..

اذا صار وانمسكت لا سمح الله لا تخاف ولا ترتعب , هنن تعبانين ودايق خلقهن من الوضع اكتر مني ومنك..
وتذكر الملاحظات التالية :
– لا يوجد أي تنسيق بين المسؤولين بالفرع ومن يقوم بالاعتقالات… ولا يوجد اي تنسيق بين افرع الامن المختلفة يعني
عدد المعتقلين كبير كتير وما عم يلحقوا عليه اطلاقا.. مشان هيك ما عم بيضل جوا السجن غير الاشخاص اللي بيقدرو يمسكو عليه شي مهم..

– ممكن تاكل كم كف وكم ضربة وهي اكتر شغلة ممكن تتعرضلها في حال اخدوك من مظاهرة .. بس لازم انت بشطارتك وذكائك ما تخلي تهمتك تتعدى مجرد المشاركة بالمظاهرة.. ولازم تستغل فرصة أنو الاعتقال هون بيكون عشوائي وهنن ما بيعرفو عنك شي .. لا بيعرفو بشو انت ناشط ولا شو عم تعمل.. ولا بمين عم تلتقي…

– انت وبالباص يلي رح ياخدوك فيه ع مكان الاعتقال حاول تجهز رواية تحكيها وتثبت عليها وانت بالأصل لازم تكون مجهز هي الرواية رواية ببالك قبل حتى ما تروح على المظاهرة ،

– ممكن يجي السجان ويقلك انو اذا بتعترف بنساعدك , لا تصدق ابدا كل ما بتعترف كل ما بيزيد التعذيب حتى تعترف اكثر وممكن يحاولو يبتزوك بأهلك ويحكو حكي طالع مازل ويهددو ويتوعدو.. لا ترد عليهون ولا تخاف ما بيطلع بأيدون شي..

– كتير بيفيد بوقت التحقيق انو تعمل حالك اجدب وما بتعرف شي وقول انك كنت بهذا المكان صدفة ( ممكن تخترع شي كذبة لسبب وجودك بالمنطقة )..
خليك متماسك ولا تنهار …مهما هددوا ومهما حكوا ما بيطلع بايدهن شي لأنو انت أصلا ما عليك شي..

– لا تتفهمن .. ولا تبيع وطنيات.. هلأ مو وقت اظهار شجاعتك… هدفك الاساسي هوي انو تطلع لبرا السجن… لانو بدونك نحنا ما فينا نكفي الطريق……

– اثبت على روايتك قدام المحقق وبين زملائك بالمعتقل وحتى بالباص اللي اخدينكون فيه ع السجن لانو غالبا بيكون بيناتكن في مدسوسين عواينية أو مخبرين ليسمعو الكلام اللي عم بيصير بيناكون وليعرفو معلومات اكتر عنكون
القاعدة الاهم (أقل معلومات عن حالك.. وأقل احاديث ممكنة مع الاخرين )
و اذا كانو مسكوك ومعك شي مثل البخاخات , منشورات , كاميرات حاول تتخلص منهم باي طريقة حتىلواضطريت تزتون بالباص وقول مو الي ولا تاكل هم البصمات لأنو بسبب غشمنتون رح يمسك الغراض تبعاتك مية عنصر بعدك وما رح يبين شي من ششي..

– بيخلوك تكتب سيرة حياتك مية مرة.. وممكن يسألوك نفس الاسئلة مية مرة.. احفاظ الكليشة وعيدها نفسها بدون تغيير لانو كل تغيير بالأجوبة رح بيخلي تحقيقك يطول أكتر واكتر..

– جوا السجن الشبيحة والمخابرات بيسبو.. بيكفرو.. بيحكو أشكال الوان.. انت عليك تسكر أدنيك.. اعتبر هالحكي كلو مردود عليهون ولا تخليهون يستفزوك أو ترد ولا بكلمة…

بحال الاعتقال من البيت :
يا اما بيكون حدا مخبر عنك عوايني أو مخبر أو أنو حدا من رفقاتك حاكي اسمك وقت اعتقلوه وهون انت وشطارتك لازم تعرف كيف جابو اسمك مشان تزبط الحكي يلي بدك تحكيه براسك قبل ما يبدا التحقيق

هلأ بالبيت…
– رح يصادروا كتير شغلات ورح يفتشوا البيت عالمزبوط ..( لكن انت رح تكون اكيد عامل حسابك ومخبي كل شيء بمكان ما حدا بيعرفوه ) رح يصادروا الكمبيوتر و والموبايل و الكميرا و جواز السفر و الهوية و و .. زطلشي بيخطرلك .
بالبداية رح يتعاملو معك بلطف ويمكن يطلبوا منك انك تفتح حساب الفيس بوك تبعك ( طبعا انت رح تفتح حسابك الشخصي العادي يلي بيخلي اللي عم يتفرج عليه يحس انو الثورة عم تصير بموزانبيق

واتاكد انهن ناس اغبياء وهبل مالهن علاقة لا بالنت او الفيس بوك هنن بيقلولك انو رح ينادو للمختص وهادا المختص يلي ععم يحكو عليه بيجوز يفهم شوي صغيرة.. يعني اخد محو أمية بالكومبيوتر مو أكتر من هيك.. فلا تخاف منو
(اصحك تعترف انك بتحمل فيديوهات عالنت او بتبعت للقنوات او بتنسق مع حدا , لا تذكر كلمة تنسيق على لسانك ابدا لانو بتعلق ) وهي العلقة مصيبو حقيقية..

لا تخاف ولا تستسلم ولا تنهار وسمعني شو رح قلك :
. الاعتقال وسام رح تضل شايلو على صدرك .. وتحكي قصصو لولادك ..
الاعتقال مزيج من تجربة غريبة مجهولة مشرّفة ورائعة واللي ما تم اعتقاله بهي الاحداث رح بيضل حاسس حالو انو تاقصو شي كل عمرو.. فلا كتير تحمل الامور ولا تتدايق

* حاول بفترات الهدوء القليلة جوا المعتقل انو تستعيد ثقتك وترفع معنوياتك وتفكر انك عم تنال شرف مانو قليل ابدا..

* تذكر انه معك دوما سلاح العقل والارادة والحق وهذا السلاح اقوى من كل انواع التعذيب والقوة تبعهن

اتذكر انو نحنا مو نسيانيك، وانو عم نشتغل برا لحتى نطلعك، اتذكر انك تاج على روسنا كلياتنا، وانك مفضل علينا وعلى عيلنا وولادنا وعلى البلد كلياتا..
لحرية الك وإللي ولكل السوريين بكل الدنية..كنت معكون اليوم ..انا رفيقتكون ميس…

[youtube=http://www.youtube.com/watch?v=ri90Efaut18&feature=BFa&list=HL1322333844&lf=mh_lolz]