شباط وأذار 2011
كان يا مكان
وهالحكي مو من زمان
بسالف العصر والأوان
لحتى كان
بتقول الأسطورة
وتخيلو معي الصورة
هالحكي موثوق
هيك قالتلي العصفورة
بأحد حواري الشام العتيقة
مدري بالحمدية مدري بالحريقة
وهالحكي عنا بسوريا
!!مو بدولة شقيقة
انو في ياسمينة قالت للفل
الشعب السوري ما بينذل
و وقت سمع بهالحكي سمو الأمير
وخوفا من انو الكرسي يطير
دغري بعتلنا سيادة الوزير
وصار يقول
عيب يا شباب.. عيب يا شباب
بس الأخ نسي
انو الحرية صارت عالباب
وبلا طول سيرة
هاد الي صار
قبل 15 أذار
*********************
هلئ بدرعا
كمان بشهر أذار
في شي شنيع صار
في كم ولد كانو عم يتفرجو عالأخبار
وما بيعرفو انو الدنية معباية اشرار
سمعو بجملة اسقاط النظام
فكروها غنية لح طير حمام
او انها كلمة متل أي كلام
كتبو هالجملة عالحيطان
وقرها كم واحد فهمان
اعتقلو الولاد بتهمة
وهن نفسية الأمة
والتشجيع على العصيان
راح وفد من الأهالي
لعند رئيس الفرع يا غوالي
ومن كتر مالو فهمان
صار بدو يربي النسوان
قالولو الأهالي
مو مشكلة
و ماشي الحال
بس تذكر
انو نسوان درعا
وراها رجال
صار الأخ ينط ما يحط
مو عرفان انو البحر …
هايج ولح يغرق الشط
ومن كتر مالو شاطر
أمر بتعذيب الولاد
وتخليع الأظافر
العما !!!!!
شو هالبني أدم
يلي قلبو معبة حقد وغل
ما تاري الغشيم نسيان انو
الشعب السوري ما بينذل
……يتبع
بقلم: وئام عيسى
