بأول لحظات الاعتقال بيتم تقييدك بكلبشات غالبا!، وبيحطو طرميشة على عيونك أو بيخلو الواحد يقلب قميصه لفوق راسه لحتى ما يشوف قدامه..
بيعيطو وبيصرخو وبيدفشو لحتى يحسسو الواحد أنو هوي رايح على جهنم الحمرا.. وكل ما كان عندك قدرة على السيطرة على حالك بهي اللّحظات كل ما كانت قدرتك على السيطرة على الوضع أفضل بالأوقات الصعبة القادمة.
أول ما بتوصل بدّك تحضر حالك لأنو غالباً بيخلو الشّباب يشلحو تيابون كلها.. وبيطلبو من الواحد يعمل حركتين أمان وحركة الأمان معناتا أنه الواحد ينزل يقرفص على الأرض ويرجع يوقف مرتين لحتى يتأكدو انو مو مخبي شي بجسمه أو تحت تيابه..الملاحظة الأهم بهي المرحلة أنك ما تتفرج على عيون السجان أو العنصر اللي قدامك أبدا.. لانو متل كل الحيوانات رح بيحس أنك عم تتحداه وقت تتفرج بعيونه ورح يثور ويتوتر أكتر.. وهادا مو لصالحك..
اذا كنت شخص خطير (بنظرهم) فرح يتم وضعك بزنزانة على الفور ورح يخلوك لحالك بالزنزانة.. أما لو كنت أقل خطورة فرح تروح على الديوان ويتم اخذ معلومات عامة عنك وممكن أنو تضل عدة ساعات بالكوريدور تبع الفرع أو المركز اللي انت فيه وبدك تطول بالك لانو وقتها رح تكون ملطشة للي رايح واللي جاية!!
ممكن بحالات معينة وبالأوقات اللي بيصير فيها عجقة كتير بالسجون أنو يتركو الواحد مزتوت ع الارض 3 تيام ومغطى ببطانية ووشو للأرض ، وهي الطريقة هيي استكمال لمحاولة السيطرة على الشخص من الناحية النفسية.
المرحلة التانية بالنسبة الك رح تكون الزنزانة.. وكل فرع في مواصفات مختلفة لزنزاناته من حيث طولها عرضها وساختها وجود بطانية أو لا نوع الأكل وهيك قصص..
ممكن كمان أن يتم تحويلك لمهجع يكون فيه ناس كتير وعجقة.. ممكن أن يتم حشر الناس بغرف ضيقة كتير بحيث يكون مافي محل حتى للقعدة على الارض.. وببعض المهاجع الشباب بتقعد بالدور.. يعني ناس بيوقفو وناس بيقعدو.. من كتر العجقة..
كل سجن أو فرع بيكون له قوانين خاصّة فيه وتجاوز هي القوانين ممكن يخلي فترة سجنك تطول وتخلي وضعك بالسجن يكون أصعب من كل النواحي، ومشان هيك لازم تعمل علاقات مدروسة مع الناس اللي حوليك من المعتقلين السابقين تحكي معهم ولكن بدون ما تحكي معلومات شخصية عن حالك أو عن قصتك.. انما المطلوب انك تعرف منهم قوانين السجن والأعراف المتبعة فيه اضافة لأسماء السجانين أو المحققين إن امكن
مسموح يروح المعتقل على التواليت 3 مرات باليوم والمدة بتتراوح بين العشر ثواني وال30 ثانية بتفرق القصة بين كل فرع وفرع وبين كل سجان وسجان..
الأكل أحيانا بيكون بكميات مقبولة وأحيانا بيكون قليل كتير وشبه معدوم، يعني المسألة على طول بترجع للفرع اللي انت فيه ونظامه وقسوته أو لمدى العجقة والضغط على السجن أو الفرع اللي انت موجود فيه.. بكل الاحوال لازم تحضر حالك لأسوأ الاحتمالات..
آحر شي لازم تفكر فيه بالمعتقل هوي ايمت بدك تطلع.. لا تفكر بهي القصة قدر الأمكان لانو رح تصير هاجسك ورح يطول عليك الوقت اللي عم تقضيه بالسجن بسبب هادا الهاجس.. حاول تشغل حالك بالتفكير بأشياء.. أو بالكلام مع الاخرين لو كان هالشي مسموح.. وقت فيك تضحك اضحاك قد ما فيك واتقرب من الاشخاص اللي بيكونو معك بالمهجع واللي دمون خفيف وبيمزحو لانو هدول العالم بيخلو وجودك بالسجن أهون عليك…
الحلقة الجاية من ثورة بلا بورايد رح احكي فيها عن التحقيق والتعذيب……
[youtube=http://www.youtube.com/watch?v=ZVzWJBcI2Go&feature=youtu]
