29-12-2011
حملنا حالنا ورحنا على الميدان ..ركبنا بهل الباص واز دليلنا الوحيد للمنطقة بيجيه تلفون وبيتركنا وبيمشي … بقينا بالباص مو عرفانين وين رايحين ..المهم سألنا الشباب يلي حوالينا طلعنا بالزاهرة القديمة ..والطريق عند كل مفرق بتشوف حاوية زبالة ..شو بدنا بحاوية الزبالة ..بدنا بالزبالة يلي جنبها ..صراصير الامن كوشات كوشات وعند جامع الماجد شفتون موقفين سيارة وعم يفتشوها …
المهم صرنا عند دوار البطيخة وبنيّتنا نرجع عل البيت بما انو مالح نقدر نتظاهر … بالرجعة كَونو (بما انو )مامعنا دليل اتصلت بالدليل يلي تركنا . …دلني .. لاقيتو عند المتحلق من طرف الزاهرة …اي شو بعرفني أنو زاهرة ..المهم نزلنا ونمشي نمشي ..نمشي نمشي ..كل ما بدنا نفوت من مكان نشوف كلاب الامن مبحووتين ..
رحنا من طرف الجزماتية طلعولنا بوشنا ..فتلنا وبوشنا على اول محل شاورما ..تكلفت حق سندويشات الشاورما … زكروني حاسب الشباب فيهم … نكشني رفيقي يلي جنبي آل “كول السندويشة نتفة نتفة منشان صار ما صار ..”والله كنا بالجزماتية عم ناكل شاورما ..”
ضلت السندويشة بأيدي شي نص ساعة بالاخير بعد فتل ودوران وما كنا نقدر نوصل للدقاق ..والساعة صارت شي 3 العصر … قررنا نخاطر ونتوجه على الدقاق ..مشينا وفتنا بهل الحارات صارنا بأبو حبل … قربنا ووشفنا الامن ادامنا ضلينا ساحبين لحتى صرنا جنبهم … واز واحد من رفقاتي قال “والله انا عازمكم لعندي “..برد عليه “على شو ؟ “… “على فلافل ” … بجاوبو التالت ” كمان متل المرة الماضية فلافل فرط ؟” …”ومشينا بهل السيرة ونحنا ماشيين بين الامن ..على ” في عندك بالبيت بندورة ؟ ” ….”في عندك ملح ولا نشحد شي رشة ملح ؟” …”والله انا بحب الفلافل بالسكر ” …
مرأنا والحمد لله … صار الدقاق ورانا… طبعاً ما استرجينا نفوت على الدقاق لأن وقتها لا فلافل ولا شاورما بتنفدنا …..
ضلينا ماشين وبتطلعلنا فرقة سلاحف النينجا … آلنا يلله شباب ..فلافل … فلافل .. … فتحنا نفس السيرة بس هل المرة ما نفدنا ….. ” بسسس بسس شباب هاتو الهويات ” ..ياسلام رحنا لعندو ..آل هاتو الهويات … شب واحد بس من الميدان والبقية من هون ومن هون ..يعني رحنا فيها ….
” وين كنتو ؟ بالمظاهرة ما !! ” …. ألنالو ” كنا بالجامعة ” عطيناه بطاقاتنا الجامعية (ما عليها مكان السكن ) …والاجدب مشيت عليه … صار يلت ويعجن على كنتو بالمظاهرة ..وعم تتعازموا عليها بالفسبوك … وما بعرف شو … أهم شي تتجاأر عليه ولا تتلبك وتخاف …
آل انا بعرفكن ازا كنتو بالمظاهرة بتكون تيابكم مغبرة .. تطلعنا على اواعينا ..وازا الشباب كل واحد جاي بأواعي العيد بواط بيضا عم تضوي ضوي ..والاسود عم يلمع ..المهم طلع معو الاهبل انو نحنا ما دخلنا وشباب اوادم ..” لا تواخزونا ” … ” الله يعطيكون العافية ” … وكل واحد من عم يدعي عليه بقلبو شكل ….
العبرة ……….. اهتم بنظافة ملابسك … كول شاورما …. ولا تخاف 🙂
———————————
بقلم : Rio Zaki L San
