جيرارد
—————
– لك ياأخي مدري شلون .. شعبنا تأأأأ ما ما خرج أخي ما خرج … ازا ماحدا فوق راسو و مشاه ما بيمشي…
+ لك يازلمي معك حق بس شوف … ليش صار هيك حمار ؟ ومين اللي خلاه يصير حمار ؟
– شو قصدك الدولة ؟ لا تقول الدولة أخي هيك كل الشعب وشعوب المنطقة … مريضة والدولة شو ماعملت
بيضل حمار هيك الله خلقو بتعرف انو في وحدة كسرت جهاز البصمة بالشغل بس لانو ما خرط مشطا انو تبصم؟
+ هلأ هي حمارة ما قلنا شي ههههههه بس انتبهت على شي؟
– شو ؟
+ هلأ بتنكر أنو شعب كوريا (الشمالية والجنوبية) شعب واحد ؟
– لا
+ طيب ليش الشعب الكوري الجنوبي متحضر ومرفه و الشعب الشمالي منحبكجي وحمار وطُنبر ؟
– أأأأأأأه ! ما بعرف
+ وفوقا هدول لا عندون سنة ولا علوية ولا شيعة ولا أكراد ولا هيئة ولا مجلس … فما بالك لما يكون عندك
طوائف وعرقيات متصور أديش رح تضيع الطاسة بهيك ظروف و أديش رح يصير في تخوين وانتو عملاء واخونجية ؟ بالعكس والله لو بيصحلون بكوريا يعملو عرقيات والله ليعملو .. بس منشان يضلو راكبين هالشعب، لاتحاسبني عدقة كلامي يمكن يكون في شي مو دقيق كتير بس لانو انا مو كوري لحتى أعرف تفاصيل انا عم قلك فكرة وشبهلك قصدي منشان تفهم عليي بس
حبيبي اللي صاير انو نحنا جماعتنا متل جماعة كوريا الشمالية … ليش شو مبالك ؟ الطلائع والجوزة والفولار كلو متل بعضو وعطيني بشي ما منفرق فيه عن كوريا الشمالية وكوبا وكازاخستان وهالدول القومجية المنحبكجية ؟ هدول مدرسة وحدة اشتراكية وعمال وشو بعرفني … بتلحق المواطن عالدعسة وبتخلي تحت تصرفا بكل شي … لك بتعرف انو بكوبا ممنوع مواطن يبيع سيارة لمواطن ؟ لازم يبيع الدولة والدولة بتبيع المواطن التاني ؟ هيك دول نفس الشو اسمو بس بغير ريحة … شو فارقة معون يحلو عن هالشعب وما يتشاطرو بقوانين بتزيد مركزية الحزب والدولة ؟مرة على رخصناكن المازوت وغلينالكن المازوت … ومرة جبنالكن شعير وزدنا محصول الشوندر … ومرة فتحنا خط مكرو جديد .. بس منشان المواطن يلتهي بأكلو وشربو ويضلو راكبين عليه وبعدين شوفة عينك مات الوالد اجا الولد وبلشنا نطبل لولد الولد والأخ وخود على طنبرة …
و كلون ممانعة كمان…
– خلص خلص أنا مليت حكي غير شي…
+ كيفك اليوم ؟
