مواطن شريف على قناة الدنيا!!

حادثة نادرة جداً من نوعها صارت على قناة الدنيا من كم يوم…صراحة أنا ما صدقت أنو يكون في مواطن شريف ووطني عم يحكي هيك ع شاشة الدنيا…خاصة لهجتو وهو عم يخاطب الرئيس ونبرة صوتو…وينك من زمان يا دكتور أكرم…أنا معجب فيك…لأ سيدي ومعجب بأخت اللي نفضك…
أول شي بحيي كلامك العاطفي وعاطفتك الجحاشة،وبأيدك بأنو لازم يوقفوا كل شي بها الفترة…أنا من عندي وقفت اللي قادر أني وقفو…
وبشد على أيدك تلحّقون يوقفوا الاصلاح لأنو قال قربوا يبلشوا فيه بقا دير بالك ازا دارت عجلة الاصلاح ما بتوقف شنو زيت الفرام هربان برات البلد،بس بما أنو قيادتنا الحكيمة عندها فرام بزيت وفرام بلبن فعالأغلب مافي مشاكل…
هلأ بس مالك ملاحظ أنو مطالبك تقيلة شوي معلم؟يعني كم خياط بدك لحتى يفصل بدلات عسكرية لكل شي شبيحة بالبلد؟؟أنو شبو الجينز ما عاد نعرف نقوص غير ازا لبسنا اخضر فستقي؟خيو اشتريلك نضارة ريبان تقليد من تحت جسر الرئيس أم الـ300 ورقة بتشوف الجينز أخضر…
استوقفني الفيديو بالثواني من 40 إلى 43…أنت إنسان عظيم يا دكتور أكرم،يعني الدكتور طالب ابراهيم عمري ما شفتو عم يهز راسو بها التناغم الجيبي المنتظم غير ع دورك…أنا بقول كل هزة فيها ع القليل شي 12 ريختر،غير المرتدات…يا سيدي انت كلامك طرب،ريتك تطرب بها الشكل شو مثقف وفهيم…الله محيي المبيض الي فقسك…
بالمناسبة أنا بعرف أنك مو طبيب…انت دكتور بالفيزياء (القوة ضرورية عندما تكون عادلة وعادلة عندما تكون ضرورية) وكمان الطاقة الحركية هي نصف الكتلة مضروبة بمربع السرعة…والذي منو
بعدين لك ما فشروا هالمندسين تحطولون قلوبكم ع الطاولة؟؟قلوبكن مكانها الطبيعي بين بيضاتكون بها المرحلة التاريخية…الطاولة نزلّي عليها لتر جاك دانييلز ولتر غراي غووز وشوية فستق حلبي مال حلب…وأنا بألف خير من الله
هلأ بما أنو نزلت اللتورة ع الطاولة وصرنا اصحاب كاس أنا وياك،خليني وشوشك وشويشة من باب المونة،يعني مو أصول تعيط هيك على سيدنا الرئيس…أنو بتضعف روحو القومية وبتوهن نفسيتو للزلمة…وخود بقا ازا حرد المعلم لبيت أهلو بيصير بدها جاهة الشغلة ليرجع…أصلاً ليش بدك تلبسو البدلة العسكرية لك أبي؟ما بيكفي جابوه على ملا وشو من بريطانيا لما استشهد المرحوم باسل وجابولو اساتذة عسكرية خصوصي كزا سنة مشان يتعلم نظام منضم؟بس مع ذلك طلع قدها وقدود وطلع الأولي على حالو ونجح بامتحان الشفهي والكتابي لشي 5 رتب عسكرية بنص ساعة…في زعيم بالعالم قدر يساويها؟! وبتقولو فيادتنا مو استثنائية….أصلا البدلة العسكرية قليلة عليك وأنت يجب أن تكون عارض أزياء يا سيادة الرئيس…
وأنا عم اسمعك عم تحكي عن الكتائب.. حسيت حالي كتير فخور
ومنتصر
ومعتزّ
وسعيد
وعبد الجبار
وسمير…
وبشير الجميّل…
وبطلب منك تنفذ حملة اعتقالات واسعة لكل الي ما بيحترمو البوط العسكري…حتى لو كان اديداس ابيض بشمرغي أو بوط نايك…أنو خيو ع سيرة النايك جاست دو ايت…ما بدها صفنة،بعدك عم تقرا؟نزيل بلش…لازم كل مواطن شريف يعتقل كم مثقف مندس ويفتح شي غرفتين تلاتة من بيتو معتقل…وفدية تحرير المندس المعتقل أنو يعلم 10 أطفال سوريين كلمة منحبك قراءة وكتابة ومحادثة،ويحفظن 3 أجزاء من أقوال القائد الخالد وتفسير المنطلقات النظرية للحزب..والذي منو
عودة للفيديو…والله يا أبو طليب معك حق تنفلج هالفالج من الدقيقة 2 إلى الدقيقة 2 و 5 ثواني…أنو ازا انت بوق أو طبل…هاد سب ووفر راكب على 20 بفل…بسيطة معلم قال البوق اللي ما بيعجبك بيصرعك..تمرن منيح قبل ما الدكتور أكرم ياخد مكانك ع الجزيرة…هو طبياً البوق fallopian tube بعد سن اليأس ما بيعودلو شغل…
كلهم أنذال يا معلم…جرذان ع قولة ملك ملوك افريقيا قائد ثورة الفاتح بنت فتوح…
عجبتني كلمة النصر لهذا الشعب…بيقولك أميرنا بندر صح لسانك يالشيخ وما عليك زود…وبيبوس خشمك يا طويل الخشم…
وبالنسبة لأبيات الشعر رائعة جداً…خاصة هاد تبع متبعّري (الاسم مو غريب عليي يمكن قصدك وزير الصحة الإيراني مسهل أكبر متبعري)…وهي أبيات من الشعر رداً على أبياتك…ألفون واحد ناوي يترشح متلك ع الدورة الجاية شيت مجلس الشعــــ(ب)ـــر

تدفّـق في البـطـحـاء بعد تبهطـلِ وقعقـع في البيـداء غيـر مزركـلِ‎
وســار بأركـان العقيـش مقـرنصـاً وهـام بكـل القارطـات بشنكــلِ‎
يقول وما بال البـحاط مـقرطمـاً ويسعـى دوامـاً بيـن هـكٍّ وهنكـلِ‎
إذا أقـبـل البعـراط طـاح بهمّـةٍ وإن أقـرط المحطـوش نـاء بكلكـلِ‎
يكـاد على فـرط الحطـيـف يبقـبـق ويضـرب ما بيـن الهمـاط وكنـدلِ‎
فيـا أيها البغـقـوش لسـت بقاعــدٍ ولا أنـت في كـل البحيـص بطنبـلِ
مع كل التمنيات بالانتصار للكتائب السورية معلم…

.