ذكريات أبو إلياس: الحلقة السابعة – وظيفة عز

..الوظيفة أيام زمان كانت شغلة كبيرة.. والموظف كمان كان إلو قيمتو بين الناس..

• الله محييك عمي أبو أيهم، مشان هيك عم اسألك ليش ما توظفت؟

والله يا ابني هالمكتبة اللي شايفها هلأ ورتة من والدي، وقضينا فيها لصدّينا، وبوقتا كانت لازمي عمي.. لازمي

• اي هيي لكن.. قول كان في من وراها مصاري، ههههه

هلأ هاد اللي آخد عقلك
ليك هي أبو وليم.. موظف من أكتر من تلاتين سنة، ورح يطلع تقاعد.. ولسا مبسوط بهالوظيفة

• صحي هالحكي عمي، طيب شو السر؟

(أبو وليم) اي مزبوط والله يا حمزة، ليش لاء
كان الموظف الحكومي يمشي ورأسو مرفوع يا أرض اشتدي ما حدا قدي .. قليلة يقولو فلان موظف حكومي .. ولا استاذ

• ليش شبها هلأ.. هي صار اقل راتب فوق العشرة..

يا فرحتي صار فوق العشرة والله، وبتوصل لاخر الشهر فاتح تمك للهوا
لك كنا ناكل ونشرب ونتبهنك… وبآخر الشهر يبقى معنا المبلغ الفلاني..
ما متل هلأ.. تعتير بتعتير

• والله العظيم غريب.. كل العالم بتقدم لقدام.. الا نحن لورا

اي لكن لك عمي.. الوظيفة قبل كانت الها احترامها ما كان يتوظف غير اللي عندو كفاءات وكان إلو احترامو ويحب شغلو ويخدم بمكانو من كل قلبو لأنو راتبو كان يكافي تعبو.. ما متل هلأ بعد هالفساد والزفت اللي نشرو بيت الاسد بين الموظفين
لك نشف حلقنا.. شوابو الياس.. لا شاي ولا قهوة؟!
أبو الياس: ما بتشبع انتي ابو بطن كبير!!

• ههه، لا عمي.. بس الطمعة بكرمك

شو شايف انت كمان كبر بطنك!!

• له له يا عميم.. طيب ما بدنا نعرف نتقل دم متل الخلق.. البطن الفاضي.. منشح
بدنا نمخمخ مزبوط

يا كريم.. خلينا نشوف خالتك اول وناخد الاذن، ههه

 • توكل على الله عمي.. بركي منسحبلك راتب التقاعد 

لا تخليني كبر بالحكي هلأ .. خليك مع ابو وليم وعف عني شوي..
أبو وليم: لك حمزة.. هي انتي عم تحكي عن الرواتب.. كيف شايف حالك على هالكم ليرة.. ايمت بدك تساوي بيت وتتجوز لكن!!
بدك تضلك هيك؟

• لا عمي شو نضل هيك الله يسامحك.. بدنا نسقط النظام.. والباقي كللو بهون

الله يقويكم يارب

• تسلم، بس السؤال الأهم عميم.. شلون في عالم لهلأ صابرة ومبسوطة عالوظيفة

لك عمي بالمشرمحي ومن الآخر.. هدول يا إيدن طويلة وعم يبلعو بهالرشاوي..
أو مجبر أخاك لا بطل وعم ينح بشغل تأني بعد الدوام.. الله يعين العالم أحسن شي

• شايف مالنا غير الشغل الخاص لكن.. قررت اشتغل..

يتبع…