• لك الله يسعدلي هالمسا يا عميييم
لك أهلين بحمزة، فوت ابني فوت
• يا الله، يا الله، دستور يا حاضرين.. دستووور
لك فوت خلصني، على سيرة دستور، كيفو هالدستور..
• 89 بالمية بس موافقين، هههه
شو هالتواضع هاد، اي دستور من الحاضرين لكن
• طنش عمي طنش، كلو علاك فاضي، ماني عرفان دستور من هالنظام، ولا من غيرو
لك حمزة، حكي دغري وما تديقلي خلاقي، شوفي غير النظام ليش؟
بعدين ليش هيك جاي ايدك فاضية كالعادة.
• أبشر أبو الياس، بكرا احلى كيلو فوارغ لعيونك.. بعدين ما سمعت بأصدقاء سورية، مدري هو أصدقاء الأسد؟
هههه، اي وانتو مقتنعين بهيك شي لك ابني
• والله من القلة عم نتعلق بكل شي لك عمي، عم نتعلق بقشة
طيب شو رأيك اجمعلك هلأ كبارية الحارة، كلن رفقاتي، ومنصير نحن أصدقاء سوريا
• هههه، اي لكن، هاد الحكي اللي بينحكى
ولك ما فهمتوها لسا انو ما بدكن حدا
ابني، هي انت ورفقاتك وبقية العالم والناس، كلكن صيرو اصدقاء سورية، وما بدكن لا فلان ولا علتان
• خلص عمي، شوف الشباب ونحن جاهزين
اي وباخدلك معي هالعكازة، بركي طلعلو شي دكتاتور بالغلط
• ليش في غير هالدكتا.. تور اللي عنا، لعما بقلبو ايمت بدو ينقلع
اي عمي اي.. في كتير، ومنكم وفيكم كمان
• الله لا يقدر، شو عم تحكي عمي!
لكن لسا كل واحد بيحملي سلاح وبيوصلو شوية مصاري بصير بدو يعملي فيها عنتر، ويشوف حالو عالكبارية والصغار
• عمي، شوف لقلك، انا قريب من الشباب اللي عالارض ورح قلك شو عم يصير..
هات لنشوف، تفزلك
• والله يا ابو الياس لا فزلكة ولا شي، بس في كم واحد بدن فركة ادن كل فترة وفترة، وهي بالاخر تصرفات فردية، يعني ما فينا نعمم
اي هدول ما بس بدن فركة ادن
• اي عمي مزبوط، هدول بدن عكازة ابو الياس
عم تتمسخر ما هيك!!
• لا والله يا عميم، بس والله متل ما قلت.. نحن كلنا.. أصدقاء سوريا
يتبع…
